గీతా ఆర్ట్స్, స్వప్న సినిమా నిర్మాణ భాగస్వామ్యంలో పవన్ సాధినేని దర్శకత్వంలో తెరకెక్కుతున్న ప్రతిష్టాత్మక చిత్రం ‘ఆకాశంలో ఒక తార’. దుల్కర్ సల్మాన్ హీరోగా రూపొందుతున్న ఈ సినిమా టీజర్ తాజాగా విడుదలై ప్రేక్షకులలో అమితాసక్తిని రేకెత్తిస్తోంది. పల్లెటూరి వాతావరణంలో మొదలయ్యే ఈ ప్రయాణంలో కల్పన అనే యువతి పదో తరగతిలో జిల్లా ఫస్ట్‌గా నిలుస్తుంది. ఆమెలోని ప్రతిభను గుర్తించిన కృష్ణ (దుల్కర్ సల్మాన్), ఆమెను ఉన్నత చదువుల దిశగా ప్రోత్సహిస్తూ అండగా నిలబడతాడు. కేవలం ఊరి పొలిమేరలు దాటడమే కాకుండా, భూమి సరిహద్దులైన ఆకాశాన్ని, అంతరిక్షాన్ని తాకడమే లక్ష్యంగా సాగే ఒక అమ్మాయి కల, దానికి తోడ్పడే వ్యక్తి త్యాగం ఇందులో భావోద్వేగభరితంగా కనిపించాయి.
ఈ టీజర్‌లో సమాజంలోని పితృస్వామ్య భావజాలం, అమ్మాయిల విద్యపై ఉండే వివక్షను చాలా ఘాటుగా ప్రదర్శించారు. “ఇంటి పని, వంట పనులు నేర్పకుండా బళ్ళు బలాదూర్లని తిరగనిస్తే ఇలానే తయారవుతారు” అంటూ కుటుంబ సభ్యుల నుంచి వినిపించే మాటలు సమాజంలో ఆడపిల్లల చదువు, వారి ఉన్నత ఆశయాలపై ఉండే సంకుచిత మనస్తత్వాన్ని సూటిగా వేలెత్తి చూపుతున్నాయి. ఈ ఒక్క సంభాషణ టీజర్‌లోని అసలైన ఎమోషన్ ను నొక్కిచెబుతూ, సమాజంలో నెలకొన్న వాస్తవ పరిస్థితులపై చర్చను రేకెత్తిస్తోంది. గ్రామీణ ప్రాంతంలో పుట్టిన ఒక సామాన్య బాలిక కలలు కంటూ, పరిశోధనలు, రాకెట్ సైన్స్, అంతరిక్ష పరిశోధనా కేంద్రాల దాకా ఎదిగిన వైనం విజువల్స్‌లో స్పష్టంగా కనిపిస్తోంది. జి.వి. ప్రకాష్ కుమార్ అందించిన నేపథ్య సంగీతం సన్నివేశాలలోని గాఢతను మరింత పెంచింది. ‘ఆకాశంలో ఒక తార’ నవంబర్ 20, 2026న థియేటర్లలోకి రానుంది.