Shilpa Shetty : ఫారెన్ వెళ్ళాలా.. 60 కోట్లు కట్టండి!

ప్రముఖ బాలీవుడ్ నటి శిల్పా శెట్టి, ఆమె భర్త, వ్యాపారవేత్త రాజ్ కుంద్రాలకు ₹60 కోట్ల మోసం కేసులో బాంబే హైకోర్టులో గట్టి ఎదురుదెబ్బ తగిలింది. విదేశాలకు వెళ్లేందుకు అనుమతి కోరుతూ వారు దాఖలు చేసిన పిటిషన్‌ను న్యాయస్థానం తీవ్రంగా మందలిస్తూ తిరస్కరించింది. ప్రయాణం చేయాలంటే ముందుగా ఆరోపణలకు సంబంధించిన పూర్తి మొత్తాన్ని, అంటే ₹60 కోట్లను డిపాజిట్ చేయాలని స్పష్టం చేసింది. అంతేకాకుండా, వారిపై జారీ అయిన లుకౌట్ సర్క్యులర్‌ (LOC)పై స్టే ఇచ్చేందుకు కూడా నిరాకరించింది. మరోవైపు, శిల్పా-రాజ్‌ల తరఫు న్యాయవాది ప్రశాంత్ పాటిల్ ఈ ఆరోపణలన్నింటినీ ఖండించారు. తాము దర్యాప్తు సంస్థలకు వాస్తవాలను తెలియజేస్తామని ఆయన పేర్కొన్నారు. ఈ కేసులో తదుపరి విచారణను హైకోర్టు అక్టోబర్ 14వ తేదీకి వాయిదా వేసింది.

Also Read:Baahubali : భళ్లాల దేవుడి పాత్రకు హాలీవుడ్ నటుడిని అనుకున్న రాజమౌళి..

ముంబైకి చెందిన 60 ఏళ్ల వ్యాపారవేత్త, లోటస్ క్యాపిటల్ ఫైనాన్షియల్ సర్వీసెస్ డైరెక్టర్ అయిన దీపక్ కొఠారి చేసిన ఫిర్యాదు మేరకు ముంబై పోలీసుల ఆర్థిక నేరాల విభాగం (EOW) ఈ కేసును దర్యాప్తు చేస్తోంది. 2015 మరియు 2023 మధ్య కాలంలో శిల్పా శెట్టి, రాజ్ కుంద్రాలు తమ వ్యాపార విస్తరణ పేరుతో తన వద్ద నుండి పెద్ద మొత్తంలో డబ్బు తీసుకుని, దానిని వ్యక్తిగత అవసరాలకు వాడుకున్నారని కొఠారి తన ఫిర్యాదులో ఆరోపించారు. కొఠారి కథనం ప్రకారం, 2015లో శిల్పా, రాజ్‌లు తమ కంపెనీ ‘బెస్ట్ డీల్ టీవీ ప్రైవేట్ లిమిటెడ్’ కోసం ₹75 కోట్ల రుణం కావాలని ఒక మధ్యవర్తి ద్వారా తనను సంప్రదించారు. మొదట 12 శాతం వడ్డీకి అంగీకారం కుదిరింది. అయితే, ఆ తర్వాత దానిని రుణంగా కాకుండా ‘పెట్టుబడి’గా మార్చాలని వారు కోరారని, నెలవారీ రాబడితో పాటు అసలు తిరిగి చెల్లిస్తామని హామీ ఇచ్చారని కొఠారి ఆరోపించారు. ఈ ఒప్పందంలో భాగంగా, కొఠారి ఏప్రిల్ 2015లో ₹31.95 కోట్లు, సెప్టెంబర్ 2015లో ₹28.53 కోట్లు బదిలీ చేశారు. అయితే, ఆ తర్వాత ‘బెస్ట్ డీల్ టీవీ’ కంపెనీ మరో పెట్టుబడిదారుడిని మోసం చేసిన కేసులో దివాలా చర్యలు ఎదుర్కొంటున్నట్లు కొఠారికి తెలిసింది. తాను ఇచ్చిన డబ్బును తిరిగి పొందడానికి ఎన్నిసార్లు ప్రయత్నించినా విఫలమయ్యాయని, శిల్పా-రాజ్‌లు ఆ నిధులను నిజాయితీగా దుర్వినియోగం చేశారని ఆయన ఆరోపించారు. ఈ పరిణామాల మధ్యలోనే 2016లో శిల్పా శెట్టి ఆ కంపెనీ డైరెక్టర్ పదవికి రాజీనామా చేశారు.