Shahid Kapoor: అల్లు అర్జున్ ఫ్యాన్స్‌కు క్రేజీ న్యూస్! AA23లో ఆ బాలీవుడ్ హీరో ఎంట్రీ?

Shahid Kapoor: ఐకాన్ స్టార్ అల్లు అర్జున్ హీరోగా, స్టార్ దర్శకుడు లోకేష్ కనగరాజ్ దర్శకత్వంలో తెరకెక్కుతున్న భారీ పాన్ ఇండియా చిత్రం AA23. ఈ చిత్రం ప్రకటించిన రోజు నుంచే దీనిపై రోజురోజుకూ అంచనాలు పెరుగుతున్నాయి. అల్లు అర్జున్ – లోకేష్ కనగరాజ్ కాంబినేషన్‌లో వస్తున్న తొలి సినిమా కావడంతో ఈ ప్రాజెక్ట్‌పై దేశవ్యాప్తంగా భారీ ఆసక్తి నెలకొంది. ప్రముఖ నిర్మాణ సంస్థ మైత్రీ మూవీ మేకర్స్ ఈ చిత్రాన్ని అత్యంత ప్రతిష్టాత్మకంగా నిర్మిస్తోంది.

తాజాగా ఈ సినిమాకు సంబంధించి మరో ఆసక్తికరమైన వార్త సినీ వర్గాల్లో చక్కర్లు కొడుతోంది. బాలీవుడ్ స్టార్ హీరో షాహిద్ కపూర్ ఈ చిత్రంలో ఓ కీలక పాత్రలో కనిపించే అవకాశాలు ఉన్నాయనే ప్రచారం జోరుగా సాగుతోంది. కథలో కీలక మలుపు తీసుకొచ్చే పవర్‌ఫుల్ క్యారెక్టర్ కోసం చిత్రబృందం షాహిద్ పేరును పరిశీలిస్తున్నట్లు ఇండస్ట్రీ వర్గాల్లో టాక్ వినిపిస్తోంది. ఈ ప్రాజెక్ట్‌లో షాహిద్ కపూర్ భాగమైతే, నార్త్ మార్కెట్‌లో ఈ సినిమాకు మరింత క్రేజ్ పెరిగే అవకాశం ఉందని ట్రేడ్ వర్గాలు భావిస్తున్నాయి. అయితే ఈ విషయంపై ఇప్పటివరకు చిత్రబృందం నుంచి ఎలాంటి అధికారిక ప్రకటన బయటికి రాలేదు.

ఇక ఈ సినిమా గురించి మరో ఆసక్తికరమైన ప్రచారం కూడా వినిపిస్తోంది. లోకేష్ కనగరాజ్ తన మార్క్ స్టైల్‌లో పూర్తి స్థాయి యాక్షన్, ఇంటెన్స్ డ్రామాతో ఈ స్టోరీని సిద్ధం చేశారని, ఇందులో హీరోయిన్ పాత్ర ఉండకపోవచ్చని చర్చ జరుగుతోంది. అల్లు అర్జున్‌ను ఇప్పటివరకు చూడని పవర్‌ఫుల్ అవతార్‌లో చూపించేలా స్క్రిప్ట్‌ను డిజైన్ చేసినట్లు సమాచారం. షాహిద్ కపూర్ ఎంట్రీతో పాటు ఇతర ప్రచారాల్లో ఎంతవరకు నిజం ఉందో తెలుసుకోవాలంటే మేకర్స్ నుంచి అధికారిక ప్రకటన వచ్చే వరకు వేచి చూడాల్సిందే.