Ameesha Patel: ఫస్ట్ డే కలెక్షన్ల కంటే హీరోయిన్ల ప్రమోషన్‌కే ఖర్చే ఎక్కువ! అసలు బండారం బయటపెట్టిన అమీషా పటేల్..

Ameesha Patel: ఇండస్ట్రీలో ప్రమోషన్ల పేరుతో సాగుతున్న మితిమీరిన ఆర్భాటాలపై బాలీవుడ్ సీనియర్ నటి అమీషా పటేల్ చేసిన కామెంట్స్ ఇప్పుడు దుమారం రేపుతున్నాయి. ఈ రోజుల్లో చాలా మంది హీరోయిన్స్ వాస్తవాలను మరిచి లేని స్టార్‌డమ్ భ్రమల్లో విహరిస్తున్నారంటూ ఆమె కుండబద్దలు కొట్టారు. ముఖ్యంగా సినిమా ఫస్ట్ డే కలెక్షన్స్ కంటే, ప్రమోషన్ల పేరిట నిర్మాతల జేబులు గుల్ల చేస్తూ హీరోయిన్లు చేసే ఖర్చులే ఎక్కువగా ఉంటాయంటూ తీవ్రస్థాయిలో విమర్శించారు. సోషల్ మీడియా వేదికగా ఓ నెటిజన్ అడిగిన ప్రశ్నకు బదులిస్తూ అమీషా పటేల్ సినిమా ఇండస్ట్రీలోని చీకటి కోణాన్ని నిర్భయంగా బయటపెట్టారు. చాలా మంది హీరోయిన్లు తమ అసలైన స్థాయి ఏంటో అంగీకరించే స్థితిలో లేరని ఆమె ఎద్దేవా చేశారు.

“స్టార్‌డమ్‌పై ఉండే భ్రమల్లోనే కాలం గడుపుతున్నారు. సినిమా ప్రమోషన్ల సమయంలో ప్రొడ్యూసర్ల ఖర్చుతో వీళ్లు చేసే హడావుడి, హంగామా చూస్తే విస్మయం కలుగుతుంది. వాళ్లు చేసే ఆ ప్రమోషన్స్ ఖర్చు.. ఆ సినిమా ఫస్ట్ డే రాబట్టే కలెక్షన్ల కంటే ఎక్కువగా ఉంటోంది. తెరపైనే కాదు, రియల్ లైఫ్‌లోనూ వాళ్లు అంతటి లగ్జరీ జీవితాన్ని నిజంగానే గడపాలని కోరుకుంటున్నా” అంటూ తీవ్ర స్థాయిలో వ్యంగ్యాస్త్రాలు సంధించారు. అయితే ఆమె తన కామెంట్స్‌లో ఏ ఒక్కరి పేరునూ నేరుగా ప్రస్తావించకపోయినా, ప్రస్తుతం పీఆర్ హంగులతో హల్‌చల్ చేస్తున్న పలువురు ప్రముఖ హీరోయిన్లనే టార్గెట్ చేశారన్న గుసగుసలు స్టార్ట్ అయ్యాయి. తన కెరీర్, సినిమాల ఎంపికపై కూడా అమీషా ఆసక్తికర విషయాలను పంచుకున్నారు. ఏదో ఒక ప్రాజెక్ట్ వచ్చిందని రొటీన్‌గా ఉండే పది సినిమాలు చేసుకుంటూ పోయే కంటే, చరిత్ర సృష్టించే ‘గదర్’ లాంటి ఒక్క బ్లాక్‌బస్టర్ చేసినా చాలని ఆమె తన మనసులోని మాటలను పంచుకున్నారు. ప్రమోషన్స్ హంగామాతో బాక్సాఫీస్‌ను గెలవలేరని అమీషా చేసిన ఈ కామెంట్స్ ఇప్పుడు సోషల్ మీడియాలో హాట్ టాపిక్‌గా మారాయి.