Raaka : ‘రాకా’ షూటింగ్ అప్డేట్ ఇచ్చిన అల్లు అర్జున్

ఐకాన్ స్టార్ అల్లు అర్జున్ అంటేనే సరికొత్త సంచలనాలకు చిరునామా. వైజాగ్ వేదికగా జరిగిన మల్టీప్లెక్స్ లాంచ్ ఈవెంట్‌లో తన అభిమానులకు, సినీ ప్రియులకు ఆయన ఊహించని బిగ్ అప్‌డేట్ ఇచ్చారు. కార్యక్రమం ముగింపులో ఆయన చేసిన వ్యాఖ్యలు ఇప్పుడు సోషల్ మీడియాలో దావానలంలా వ్యాపిస్తున్నాయి. తాను ఈ ఈవెంట్ కోసం ఎక్కడి నుంచో ప్రత్యేకంగా వచ్చింది లేదు… నేరుగా ‘రాకా’ చిత్ర షూటింగ్ స్పాట్ నుంచే వచ్చానని బన్నీ వేదికపై వెల్లడించారు. ప్రస్తుతం ఈ అత్యంత ప్రతిష్టాత్మక ప్రాజెక్ట్ షూటింగ్ ముంబై వేదికగా శరవేగంగా జరుగుతోందని చెప్పారు. “నేను నేరుగా ముంబైలో జరుగుతున్న ‘రాకా’ షూటింగ్ సెట్స్ నుంచే ఇక్కడికి వచ్చాను. వైజాగ్ ప్రజలను, అభిమానులను కలుసుకుని థియేటర్ లాంచ్‌ను పూర్తి చేసుకోవడం నాకు చాలా ముఖ్యం. అందుకే ‘సార్, మా వైజాగ్ వెళ్ళాలి… ప్రజలందరినీ ఒకసారి పలకరించి, థియేటర్ లాంచ్ పూర్తి చేసి వచ్చేస్తాను’ అని దర్శకుడిని కోరి ఒక్క రోజు బ్రేక్ తీసుకుని వచ్చాను. మళ్ళీ రేపటి నుంచే నాన్ స్టాప్ షూటింగ్‌లో పాల్గొంటున్నాను” అని ఐకాన్ స్టార్ పేర్కొన్నారు.

సినిమా షూటింగ్ ఎంత బిజీగా ఉన్నప్పటికీ, వైజాగ్ ప్రజలతో ఉన్న అనుబంధం కోసం ప్రత్యేకంగా ఒక రోజు షూటింగ్‌కు విరామం ఇచ్చి రావడం బన్నీ అంకితభావానికి, అభిమానుల పట్ల ఆయనకున్న ప్రేమకు అద్దం పడుతోంది. డైరెక్టర్ దగ్గర పర్మిషన్ తీసుకుని మరీ ఈ వేడుకకు వచ్చా అని చెప్పడం గమనార్హం. వేదికపై బన్నీ నోటి వెంట ‘రాకా’ అనే పేరు వినపడటంతోనే అక్కడ ఉన్న అభిమానుల కేరింతలతో ప్రాంగణం హోరెత్తిపోయింది. ఏ మాత్రం సమయం వృధా చేయకుండా, తిరిగి రేపటి నుంచే ముంబైలో ‘రాకా’ షూటింగ్‌లో జాయిన్ అవుతున్నట్లు చెప్పడం ఈ ప్రాజెక్ట్‌పై ఉన్న అంచనాలను మరింత పెంచేసింది.