Abhilasha: 40 యేళ్ళ తర్వాత మళ్ళీ చిరంజీవి సూపర్ హిట్ మూవీ టైటిల్ తో….
Abhilasha: చిరంజీవి నటించిన సూపర్ హిట్ మూవీ ‘అభిలాష’ విడుదలై, చూస్తుండగానే నలభై యేళ్ళు గడిచిపోయింది. అయితే ఇప్పుడు అదే టైటిల్ తో విద్య ప్రాధాన్యతను తెలియచేస్తూ ఓ సినిమా రాబోతోంది. మనిషి చైతన్యానికే కాదు… సమాజ చైతన్యానికి, అభివృద్ధికి విద్య ఎంతగానో దోహదం చేస్తుంది. అలాంటి విద్య ప్రాముఖ్యతను తెలియచేస్తూ, సి.హెచ్. శిరీష ‘అభిలాష’ సినిమా నిర్మించారు. అమర్ దీప్ హీరోగా, అశ్విని రెడ్డి హీరోయిన్ గా నటించిన ఈ సినిమాకు శివప్రసాద్ చలువాది దర్శకుడు. ఈ సినిమా ట్రైలర్ ను హైదరాబాద్ లోని ప్రసాద్ ప్రివ్యూ థియేటర్ లో ప్రముఖ నటుడు పృథ్వి విడుదల చేశారు. ఈ సందర్భంగా ఆయన మాట్లాడుతూ, “చిన్న సినిమా, పెద్ద సినిమా అనే తేడాలు లేవు. ఏది ఆడితే అదే పెద్ద సినిమా. ట్రైలర్ చాలా బావుంది. ఓ మంచి పాయింట్ తో ఈ సినిమాను తీయడం సంతోషం” అని అన్నారు.
దర్శకుడు శివప్రసాద్ చలువాది మాట్లాడుతూ, “అసభ్యతకు తావులేకుండా నవరసాల్లోని అన్ని అంశాలను మేళవించి ఈ సినిమాను తీశాం. 1983లో వచ్చిన చిరంజీవి గారి ‘అభిలాష’ చిత్రానికి, ఈ సినిమాకు కథాపరంగా ఎలాంటి సంబంధం లేదు. ఆ చిత్రంలో ఉరి రద్దు చేయాలని చూపిస్తే, ఇందులో చదువు వద్దన్న విలన్ ను హీరో ఎలా ఎదుర్కోవడం జరిగిందన్న అంశాన్ని చూపించాం” అని చెప్పారు. నిర్మాత సి.హెచ్. శిరీష మాట్లాడుతూ, పాత్రలకు సరిపోయే మంచి ఆర్టిస్టులను ఎంపికచేసుకునిఈ చిత్రాన్ని తీశామని అన్నారు. ఇటీవల వచ్చిన చిన్న చిత్రం ‘బలగం’ తరహాలోనే ఈ సినిమా కూడా విజయవంతం కావాలనే ఆకాంక్షను సీనియర్ నటులు అశోక్ కుమార్, సమ్మెట గాంధీ వ్యక్తం చేశారు. తమ కెరీర్ కు ఈ సినిమా ఎంతో ఉపయోగపడుతుందని హీరో అమర్ దీప్, హీరోయిన్ అశ్విని రెడ్డి అన్నారు. ఈ కార్యక్రమంలో నటీనటులు బెల్లంకొండ వెంకట్, ఐడ్రీమ్ అంజలి, జబర్దస్త్ రాజమౌళి, సంగీత దర్శకుడు ఎం.ఎం. కుమార్, ఫైట్ మాస్టర్ నభా, గీత రచయిత తిరుపతి, స్క్రీన్ ప్లే రచయిత పాండు చరణ్, సహనిర్మాత వెంకట్రావు తదితరులు పాల్గొన్నారు.