బాలీవుడ్ నటుడు జాన్ అబ్రహం నటించిన పేట్రియాటిక్ మూవీస్ కు కొదవలేదు. మరీ ముఖ్యంగా ‘పరమాణు’, ‘సత్యమేవ జయతే’ చిత్రాలతో జాతీయ వాదుల మనసుల్ని ఈ యాక్షన్ హీరో బాగానే దోచుకున్నాడు. మరోసారి వారందరి మెప్పు పొందేందుకు జాన్ అబ్రహమ్ చేసిన ప్రయత్నమే ‘ఎటాక్ -1’. ఇండియాస్ ఫస్ట్ సూపర్ సోల్జర్ మూవీగా చెప్పబడుతున్న ఈ సినిమా ఏప్రిల్ 1న జనం ముందుకు వచ్చింది.
సోల్జర్ అయిన అర్జున్ షేర్గిల్ టెర్రరిస్ట్ అటాక్ లో తీవ్రంగా గాయాలపాలవుతాడు. బాడీ మొత్తం పేరలైజ్ కావడంతో వీల్ ఛైర్ కే పరిమితం అవుతాడు. అలాంటి వ్యక్తిని డాక్టర్ సాబా (రకుల్ ప్రీత్ సింగ్) ఫ్యూచరిస్టిక్ సైన్స్ టెక్నాలజీతో సూపర్ సోల్జర్ గా మార్చుతుంది. ఆమె చేసిన ప్రయోగానికి అర్జునే పావుగా మారతాడు. పార్లమెంట్ ను కేంద్రంగా చేసుకుని ఈ దేశంపై కెమికల్ దాడికి పాల్పడాలనుకున్న టెర్రిస్టులకు అర్జున్ తన సూపర్ పవర్స్ తో ఎలా బుద్ధి చెప్పాడన్నదే ఈ చిత్ర కథ.
విశేషం ఏమంటే పేట్రియాటిక్ మూవీ అనగానే మాతృదేశాన్ని ఉద్దేశించి హీరోలు పేజీల కొద్ది సంభాషణలు చెబుతూ ఉంటారు. అలానే టెర్రరిస్టులకు సమయం చిక్కినప్పుడల్లా హితబోధ చేస్తుంటారు. గతంలో జాన్ అబ్రహం చిత్రాలలోనూ ఇలాంటి సన్నివేశాలు బాగానే ఉండేవి. కానీ ఇందులో అలాంటి వాటికి డెబ్యూ డైరెక్టర్ లక్ష్య రాజ్ ఆనంద్ ఆస్కారం ఇవ్వలేదు. దీనినో సైంటిఫిక్, యాక్షన్ థ్రిల్లర్ మూవీగా మలిచాడు. కాళ్ళు చేతులు చచ్చుబడిపోయిన సోల్జర్ ను నయా సాంకేతిక పరిజ్ఞానంతో లేచి నిలబడేట్టు చేయడమే కాకుండా అతన్ని సూపర్ సోల్జర్ గా తయారు చేయడం, తిరిగి దేశానికి అతని సేవలను వినియోగించుకోవడం అనే పాయింట్ అందరినీ ఆకట్టుకునేదే. దీనికి నటీనటుల నటనతో పాటు సాంకేతిక నిపుణుల ప్రతిభ కూడా తోడైంది.
జాన్ అబ్రహంకు ఈ తరహా పాత్రలు చేయడం కొట్టిన పిండి. పేరలైజ్డ్ సోల్జర్ గానూ, సూపర్ హీరోను తలపించే సోల్జర్ గానూ జాన్ అబ్రహం మెప్పించాడు. రకుల్ ప్రీతి సింగ్ పోషించిన డాక్టర్ పాత్ర కూడా భిన్నంగా ఉంది. అర్జున్ లవ్ ఇంట్రస్ట్ గా నటించిన జాక్విలిన్ ఫెర్నాండేజ్ తో పోల్చితే రకుల్ ప్రీత్ సింగ్ కు ఇందులో స్క్రీన్ స్పేస్ ఎక్కువ లభించింది. దాన్ని ఆమె చక్కగా యుటిలైజ్ చేసుకుంది. ఇతర ప్రధాన పాత్రలను రత్న పాథక్ షా, రజిత్ కపూర్, ప్రకాశ్‌ రాజ్ తదితరులు పోషించారు. వారి నుండి చక్కని నటనను దర్శకుడు రాబట్టుకున్నాడు. మూవీ రన్ టైమ్ తక్కువ ఉండటంతో పాటు ఎక్కడా అనవసరమైన లాగ్స్ లేకపోవడం కలిసొచ్చింది. శషావత్ సచిదేవ్ మ్యూజిక్ ఆకట్టుకునేలా ఉంది. ఈ మూవీ ఎంతవరకూ రియలిస్టిక్ గా ఉందనే విషయాన్ని పక్కన పెడితే, సినిమా ప్రారంభం నుండి చివరి వరకూ రేసీగా సాగిపోయింది. యాక్షన్ చిత్రాలు, కాస్తంత భిన్నమైన కథాంశాలను ఇష్టపడే వారికి ‘ఎటాక్’ మూవీ నచ్చుతుంది. అయితే మరీ ఎక్కువ అంచనాలు పెట్టుకుని మాత్రం థియేటర్ కు వెళ్ళకూడదు.
రేటింగ్: 2.5/5
ప్లస్ పాయింట్స్
జాన్ అబ్రహం నటన
యాక్షన్ సన్నివేశాలు
ఆసక్తి కలిగించే కథ
మైనెస్ పాయింట్స్
బోర్ కొట్టే ప్రధమార్థం
పండని సెంటిమెంట్ సీన్స్
ట్యాగ్ లైన్: పేట్రియాటిక్ ఎటాక్!