బాలీవుడ్ అగ్ర దర్శకుడు సంజయ్ లీలా భన్సాలీ అనగానే మనకు వెంటనే గుర్తొచ్చేది భారీ చారిత్రక నేపథ్యాలు, కళ్లు చెదిరే సెట్టింగులు, సాంప్రదాయ కట్టుబొట్టు. కానీ ఇప్పుడు ఆయన పూర్తిగా రూటు మార్చేశారు. తన మార్క్ పీరియాడికల్ డ్రామాలను పక్కనబెట్టి, ఏకంగా ఓ భారీ ఆధునిక ప్రపంచాన్ని సృష్టించే పనిలో పడ్డారు. అదే ‘లవ్ & వార్’ (Love & War). ఈ సినిమాలో లేడీ సూపర్ స్టార్ అలియా భట్ లుక్ ఇప్పుడు నెట్టింట అగ్గి రాజేస్తోంది. ఈ అప్ కమింగ్ మూవీలో రణబీర్ కపూర్, అలియా భట్, విక్కీ కౌశల్ లాంటి క్రేజీ తారాగణం నటిస్తున్న సంగతి తెలిసిందే. ఇప్పటికే మేకర్స్ వదిలిన రణబీర్ కపూర్ ఫస్ట్ లుక్ కు ట్రెమండస్ రెస్పాన్స్ రాగా.. తాజాగా అలియా భట్ ఫస్ట్ లుక్ పోస్టర్ ను సోషల్ మీడియా వేదికగా విడుదల చేశారు. ఈ పోస్టర్ చూసిన ఫ్యాన్స్ ఒక్కసారిగా షాక్ అవుతున్నారు. మునుపెన్నడూ చూడని రేంజ్ లో అలియా ఇందులో తన గ్లామర్ తో విధ్వంసం సృష్టిస్తోంది.
ఓ కుర్చీలో ఎంతో స్టైలిష్ గా, బాస్ లేడీలా కూర్చున్న అలియా.. స్లిట్ స్కర్ట్, తలపై ఓ స్పెషల్ హెడ్ పీస్ ధరించి ఇచ్చిన పోజు కుర్రకారుకు మతిపోగొడుతోంది. ఆమె లుక్, స్టైలింగ్, కళ్లల్లో కనిపిస్తున్న తీక్షణమైన హావభావాలు ఒక సరికొత్త ‘మోడ్రన్-రెట్రో’ ఫీల్ ను పంచుతున్నాయి. ఎప్పుడూ కాస్త క్యూట్ గా లేదా డీసెంట్ రోల్స్ లో మెప్పించే అలియా.. ఈ చిత్రంలో మాత్రం పూర్తిగా ఒక కొత్త అవతార్ లో విశ్వరూపం చూపించబోతోందని పోస్టర్ చూస్తేనే అర్థమవుతోంది. భన్సాలీ సినిమాల్లో హీరోయిన్ల ప్రజెంటేషన్ ఎంత అద్భుతంగా ఉంటుందో ప్రత్యేకంగా చెప్పక్కర్లేదు.. ఇప్పుడు ఈ ఆధునిక ప్రపంచంలో అలియాను ఆయన చూపించబోయే విధానం అందరినీ ఆశ్చర్యపరచడం ఖాయంగా కనిపిస్తోంది. ఈ మూవీని 2027 జనవరి 21న హిందీతో పాటు తెలుగు, తమిళ భాషల్లో ప్రపంచవ్యాప్తంగా అత్యంత భారీ ఎత్తున విడుదల చేయనున్నారు.