Actor Banerjee: చిరంజీవి బయోపిక్పై నేనలా అనలేదు
ఈమధ్య కాలంలో సినీ పరిశ్రమలో బయోపిక్ల ట్రెండ్ నడుస్తుండడంతో.. మెగాస్టార్ చిరంజీవిపై కూడా ఓ బయోపిక్ తీస్తే బాగుంటుందని ఒక వేదికపై సీనియర్ నటుడు బెనర్జీ చెప్పుకొచ్చారు. దీంతో, చిరు బయోపిక్కి బెనర్జీ ప్లాన్ చేస్తున్నారన్న వార్తలు ఊపందుకున్నాయి. ఈ విషయంపై ఆయన తాజాగా క్లారిటీ ఇచ్చారు. చిరు బయోపిక్పై తాను చేసిన వ్యాఖ్యల్ని వక్రీకరించారని అన్నారు. చిరు బయోపిక్ తాను తీస్తానని వస్తున్న వార్తల్లో ఏమాత్రం వాస్తవం లేదని స్పష్టం చేశారు.
బెనర్జీ మాట్లాడుతూ.. ‘‘చిరంజీవి చాలా మంచి మనిషి. ఆయనతో నాకు గొప్ప అనుబంధం ఉంది. ఒక వేదికపై చిరంజీవి ప్రస్తావన వచ్చినప్పుడు.. ఆయనపై బయోపిక్ తీస్తే బాగుంటుందని, చిత్రపరిశ్రమలో ఆయన పడిన కష్టాలు, విజయాలు, అవార్డులు, రివార్డులతో సినిమా తీస్తే అద్భుతంగా ఉంటుందని అన్నాను. అది కూడా ఆయన అనుమతి తీసుకొనే ఆ వ్యాఖ్యలు చేశాను. కానీ.. నేనే ఆ బయోపిక్ తీస్తానని చెప్పలేదు. నా వ్యాఖ్యల్ని వక్రీకరించి, సోషల్ మీడియాలో అసత్య ప్రచారం చేశారు’’ అంటూ చెప్పుకొచ్చారు. దీంతో, చిరు బయోపిక్పై నెలకొన్న మిస్టరీకి చెక్ పడినట్లు అయ్యింది.
ఇదిలావుండగా.. మెగాస్టార్ చిరంజీవి ప్రస్తుతం వరుస ప్రాజెక్టులతో బిజీగా ఉన్నారు. గాడ్ ఫాదర్, భోళా శంకర్, మెగా154 (వాల్తేరు వీరయ్య) షూటింగుల్లో ఉన్నారు. ఈ మూడు చిత్రాలూ వచ్చే ఏడాదిలో ప్రేక్షకుల ముందుకు వచ్చేందుకు సన్నద్ధమవుతున్నాయి. రీసెంట్గా వచ్చిన ఆచార్య పెద్దగా ఆడకపోవడంతో, ఈ చిత్రాలపై చిరు పూర్తి శ్రద్ధ పెట్టారు. మరోవైపు, తన వద్దకు వస్తోన్న కథల్ని కూడా చిరు వింటున్నారు.