Floor Cleaning Tips: ఇల్లు తుడిచాక నేల జిడ్డుగా మారుతోందా? ఈ తప్పులే కారణం.. ఇలా చేస్తే మెరిసిపోతుంది!

Floor Cleaning Tips: ఇల్లు శుభ్రం చేయడం అనగానే అందరికీ ముందుగా గుర్తొచ్చేది ఇల్లంతా ఊడ్చి మాప్‌ పెట్టడమే. ఎంత కష్టపడి ఇల్లంతా తడిగుడ్డతో తుడిచినా, ఆ తర్వాతి అనుభవమే అసలైన శుభ్రతను చెప్తుంది. పోచా పెట్టిన తర్వాత నేల మెరుస్తూ, దానిపై నడుస్తుంటే పాదాలు శుభ్రంగా అనిపిస్తేనే మనం సరిగ్గా శుభ్రం చేశామనే తృప్తి దక్కుతుంది. కానీ చాలామందికి దీనికి పూర్తిగా విరుద్ధమైన అనుభవం ఎదురవుతుంటుంది. తుడిచిన కాసేపటికే నేలపై ఒక జిడ్డు పొర లాంటిది పేరుకుపోయి, నడుస్తుంటే పాదాలు నేలకు అంటుకుంటున్నట్టు అనిపిస్తుంది. దీనివల్ల గాలిలోని ధూళి, మట్టి చేరి శుభ్రం చేసిన కాసేపటికే ఇల్లు మళ్లీ మురికిగా మారిపోతుంది. మీ ఇంట్లో కూడా ఇలాగే జరుగుతుంటే ప్రతీసారీ నేల సరిగ్గా శుభ్రపడలేదేమో అని అనుకుని, దాన్ని పదే పదే గట్టిగా రుద్ది తుడవాల్సిన అవసరం లేదు. ఎందుకంటే సమస్య నేలలో లేదు, మీరు తుడిచే విధానంలోనే ఉంది. మోతాదుకు మించి క్లీనింగ్ లిక్విడ్ వాడటం, మురికి నీటినే మళ్లీ మళ్లీ ఉపయోగించడం, నేల రకానికి సరిపడని ప్రొడక్ట్స్ ఎంచుకోవడం వంటి చిన్న చిన్న పొరపాట్లే నేల జిడ్డుగా మారడానికి కారణమవుతాయి. అసలు ఇలా ఎందుకు జరుగుతుంది, దీనికి సులువైన పరిష్కారాలు ఏమిటో ఇప్పుడు వివరంగా తెలుసుకుందాం.

ఇల్లు తుడిచాక నేల జిడ్డుగా ఎందుకు మారుతుంది?

అంత శ్రద్ధగా తుడిచినా నేల ఎందుకు అతుక్కుంటుందనే సందేహం మీకు రావచ్చు. దానికి ప్రధాన కారణం మీరు వాడే క్లీనర్ అవశేషాలు నేలపైనే ఉండిపోవడం. చాలామంది క్లీనింగ్ లిక్విడ్ లేదా ఫినాయిల్ ఎక్కువ ఉపయోగిస్తే నేల బాగా శుభ్రపడి ప్రకాశిస్తుందని పొరబడుతుంటారు. కానీ అది నిజం కాదు. అవసరానికి మించి క్లీనర్ వాడినప్పుడు లేదా తుడిచిన తర్వాత దాని అవశేషాలు సరిగ్గా పోనప్పుడు, అది ఫ్లోర్ మీద ఒక సన్నని జిడ్డు పొరను ఏర్పాటు చేస్తుంది. నీరు ఆరిపోయాక ఈ పొరే కాళ్ల కింద జిడ్డుగా తగులుతుంది. దీనివల్ల ధూళి త్వరగా అతుక్కుని, కష్టపడి తుడిచిన ఇల్లు క్షణాల్లో మళ్లీ గలీజుగా కనిపిస్తుంది.

ఒకే మురికి నీటితో ఇల్లంతా తుడిస్తే..

మనం ఇల్లు తుడుస్తున్న కొద్దీ బకెట్‌లోని నీరు క్రమంగా మురికిగా మారుతుంటుంది. నేలపై ఉన్న మట్టి, ధూళి, నూనె జిడ్డు, క్లీనర్ అవశేషాలన్నీ ఆ నీటిలోనే కలిసిపోతాయి. అంత మురికిగా మారిన నీటిలో మళ్లీ మళ్లీ పోచా ముంచి ఇల్లంతా తుడిస్తే, మురికి వదిలిపోవడానికి బదులు మళ్లీ ఇల్లంతా సమానంగా విస్తరిస్తుంది. ముఖ్యంగా వంటగది, బాల్కనీ లేదా ఇంట్లోకి ఎక్కువమంది వచ్చిపోయే ప్రదేశాలను తుడిచిన నీటితోనే బెడ్‌రూమ్‌లు లేదా ఇతర గదులను తుడుచుకుంటూ పోవడం తప్పుడు పద్ధతి. నీరు బాగా మురికిగా అనిపిస్తే వెంటనే దాన్ని మార్చేయడమే శ్రేయస్కరం.

మంచి నీళ్లే వాడుతున్నారా?

మీరు క్లీనింగ్ పద్ధతులన్నీ సరిగ్గా పాటిస్తున్నప్పటికీ ఈ సమస్య ఎదురవుతుంటే, మీ ఇంట్లో వాడే నీటిని ఒక్కసారి పరిశీలించండి. కొన్ని ప్రాంతాల్లో హార్డ్ వాటర్ వస్తుంటుంది. ఈ నీటిలోని ఖనిజాలు (మినిరల్స్) నేలపై ఒక తెల్లటి లేదా జిడ్డు పొరలాగా పేరుకుపోతాయి. ఈ లవణాలు క్లీనర్ అవశేషాలతో కలిసినప్పుడు నేల మరింత మురికిగా, జిడ్డుగా మారుతుంది. కాబట్టి ప్రతీసారీ సమస్యను కేవలం మురికితోనే ముడిపెట్టడం సరికాదు.

అన్ని రకాల నేలలకు ఒకే క్లీనర్ సరిపడదు..

ఇంట్లో ఏ రకమైన ఫ్లోరింగ్ ఉన్నా ఒకే రకమైన క్లీనర్ వాడటం ఏమాత్రం మంచిది కాదు. టైల్స్, మార్బుల్, కలప (వుడ్), లామినేట్.. ఇలా ప్రతీ నేల ఉపరితలానికి దాని సొంత అవసరాలు ఉంటాయి. సరిపడని ప్రొడక్ట్ వాడటం వల్ల అది నేలపై కెమికల్ అవశేషాలను వదిలేసి, ఫ్లోర్ యొక్క సహజమైన మెరుపును పూర్తిగా పాడుచేస్తుంది. అందుకే మార్కెట్‌లో క్లీనర్ కొనేటప్పుడే అది మీ ఇంట్లోని ఫ్లోరింగ్ రకానికి సరిపోతుందో లేదో ఖచ్చితంగా చూసుకోవాలి.

జిడ్డుగా మారిన నేలను మళ్లీ మెరిపించే సులువైన మార్గం..

ఒకవేళ క్లీనర్ పొరల వల్ల నేల జిడ్డుగా మారినట్లు మీకు అనిపిస్తే, దాన్ని సరిచేయడానికి కేవలం మంచినీటితో (ప్లెయిన్ వాటర్) మరొకసారి తుడవండి. దీనికోసం శుభ్రమైన మోప్ తీసి, మంచి నీటిలో తడిపి, నీరు ఏమాత్రం లేకుండా బాగా పిండండి. ఈసారి నీటిలో ఎలాంటి క్లీనర్ లేదా ఫినాయిల్ వేయకుండా కేవలం తడిగుడ్డతో ఇల్లంతా తుడవండి. ఇది నేలపై మిగిలిపోయిన క్లీనర్ అవశేషాలను పూర్తిగా తొలగించడానికి సహాయపడుతుంది. అలాగే పెద్ద ఇల్లు తుడిచేటప్పుడు మధ్యమధ్యలో బకెట్ నీటిని మారుస్తూ ఉండాలి. మురికి నీటితోనే మళ్లీ తుడిస్తే ప్రయోజనం లేకపోగా, మురికి ఇల్లంతా పాకుతుంది.

ఎక్కువ క్లీనర్ వేస్తే ఎక్కువ శుభ్రత రాదు..!

సాధారణంగా ఫ్లోర్ క్లీనర్ బాటిల్ వెనుక ఎంత పరిమాణంలో వాడాలో స్పష్టంగా రాసి ఉంటుంది. కానీ చాలామంది కొలత లేకుండా అంచనాతో ఎక్కువ లిక్విడ్‌ను నీళ్లలో పోసేస్తుంటారు. ఎక్కువ ప్రొడక్ట్ వాడినంత మాత్రాన శుభ్రత పెరుగుతుందనే గ్యారంటీ లేదు. పైగా అది నేలపై ఉండిపోయి, ఆరిన తర్వాత జిడ్డు పొరగా తయారవుతుంది. కాబట్టి ఎంత అవసరమో అంతే పరిమాణంలో క్లీనర్ ఉపయోగించండి. తుడిచిన తర్వాత కూడా నేల జిడ్డుగా అనిపిస్తే, తదుపరిసారి క్లీనర్ మోతాదును తగ్గించి వాడండి.

తుడిచే ముందు ఈ పని తప్పకుండా చేయండి..

నేలపై నేరుగా తడిగుడ్డ పెట్టడానికి కంటే ముందు, ఇల్లంతా జాడించి ఊడ్చడం లేదా వ్యాక్యూమ్ క్లీనర్ ద్వారా దుమ్ము, జుట్టు, ఎండిన మట్టిని పూర్తిగా తొలగించాలి. అలా చేయకుండా నేరుగా తడిగుడ్డ పెడితే, ఆ మురికి నీటిలో కలిసి పోచా ద్వారా ఇల్లంతా వ్యాపిస్తుంది. పొడి మురికిని తొలగించాకే క్లీనర్ కలిపిన నీటితో ఇల్లు తుడవాలి. అవసరమనిపిస్తే చివర్లో ఒక్కసారి శుభ్రమైన మంచి నీటితో తడిగుడ్డ వేయవచ్చు. అలాగే నేలపై నీటి చారలు పడకుండా ఉండాలంటే, మోప్‌ను ఎప్పటికప్పుడు గట్టిగా పిండి మాత్రమే వాడటం ఉత్తమం.