Paramannam: బెల్లం పరమాన్నం మొదటిసారి చేసినా సూపర్ హిట్ అయ్యే 100% పక్కా ఫార్ములా! ఇలా చేసి చూడండి..

Bellam Paramannam పండుగలొచ్చినా, ఇంట్లో పూజలు లేదా శుభకార్యాలు జరిగినా నైవేద్యంగా ముందుగా గుర్తొచ్చేది బెల్లం పరమాన్నం. అయితే చాలా మందికి పరమాన్నం వండేటప్పుడు పాలు విరిగిపోవడం లేదా కాసేపటికే చేసిన ప్రసాదం రాయిలా గట్టిపడిపోవడం, లేదంటే మరీ నీళ్లలా మారిపోవడం జరుగుతుంటుంది. అసలైన కమ్మదనం దక్కక నిరాశ చెందుతుంటారు. ఆలయాల్లో పెట్టే ప్రసాదంలా నోట్లో వేస్తే వెన్నలా కరిగిపోయేలా, చల్లారినా అదే క్రీమీ టెక్స్చర్‌తో ఉండాలంటే సరైన పద్ధతి, కొలతలు పాటించాల్సిందే. ఆ అసలైన సీక్రెట్స్, తయారీ విధానం ఈ స్పెషల్ స్టోరీలో తెలుసుకుందాం.

పర్ఫెక్ట్ కొలతలు (ఒకే గ్లాసుతో):

* బియ్యం: 1 గ్లాసు

* చిక్కటి పాలు: 4 గ్లాసులు

* నీళ్లు: 2 గ్లాసులు (రైస్ ఉడికించడానికి), అర గ్లాసు (పాకం కోసం)

* తురిమిన బెల్లం: 2 గ్లాసులు

* యాలకుల పొడి: అర టీస్పూన్

* పచ్చికర్పూరం: చిటికెడు (తినేది మాత్రమే)

* నెయ్యి: 2 టేబుల్ స్పూన్లు

* జీడిపప్పు, కిస్మిస్: సరిపడా

తయారీ విధానం:

ముందుగా ఒక గ్లాసు బియ్యాన్ని నీళ్లతో శుభ్రంగా కడిగి, కనీసం అరగంట పాటు నీటిలో నానబెట్టుకోవాలి. ఇలా నానబెట్టడం వల్ల అన్నం పాలల్లో త్వరగా, మెత్తగా ఉడుకుతుంది. తర్వాత స్టవ్ మీద గిన్నె పెట్టి 4 గ్లాసుల పాలు, 2 గ్లాసుల నీళ్లు పోయాలి. ఇలా నీళ్లు కలపడం వల్ల పరమాన్నం చిక్కదనం సరైన రీతిలో వస్తుంది. పాలు పొంగి వచ్చాక, నానబెట్టిన బియ్యాన్ని నీళ్లు లేకుండా అందులో వేయాలి. మంటను లో-టు-మీడియం ఫ్లేమ్‌లో ఉంచి అన్నాన్ని నిదానంగా మెత్తగా ఉడికించాలి. అన్నం మెత్తగా, దగ్గరగా (దద్దోజనం కన్సిస్టెన్సీలా) ఉడికిన తర్వాత అవసరమైతే గరిటతో కొద్దిగా మెదపాలి. ఇప్పుడు ఇందులోనే అర టీస్పూన్ యాలకుల పొడి, గుడి ప్రసాదం సువాసన కోసం చిటికెడు పచ్చికర్పూరం వేసి కలిపి స్టవ్ కట్టేసి మూతపెట్టి పక్కన ఉంచాలి.

అసలైన సీక్రెట్ – తీగపాకం:
చాలామంది బెల్లం కరిగిన వెంటనే ఆ నీళ్లను నేరుగా అన్నంలో కలిపేస్తారు. దీనివల్ల చల్లారిన కాసేపటికి ప్రసాదం నీరైపోతుంది. అలా జరగకూడదంటే.. ఒక గిన్నెలో 2 గ్లాసుల తురిమిన బెల్లం, అర గ్లాసు నీళ్లు పోసి కరిగించాలి. బెల్లం కరిగాక మంటను తగ్గించి లేత తీగపాకం వచ్చే వరకు దానిని మరిగించాలి. తీగపాకం రాగానే స్టవ్ ఆపి, ఒక నిమిషం పాటు ఆగి, ఆ వేడి పాకాన్ని వడకడుతూ పక్కన పెట్టుకున్న పాలన్నంలో పోసి బాగా కలపాలి. ఇలా చేయడం వల్ల పాలు విరిగే అవకాశమే ఉండదు. పైగా ఎంత చల్లారినా పరమాన్నం గట్టిపడకుండా క్రీమీగా ఉంటుంది.

చివరగా స్టవ్ మీద చిన్న కడాయి పెట్టి రెండు స్పూన్ల నెయ్యి వేసి, జీడిపప్పు, కిస్మిస్‌లను దోరగా వేయించాలి. బంగారు రంగులోకి రాగానే నేతితో సహా పరమాన్నంలో వేసి కలిపేస్తే ఘుమఘుమలాడే అమృతం లాంటి బెల్లం పరమాన్నం రెడీ అయిపోతుంది. ఈ చిన్న చిన్న ట్రిక్స్ పాటిస్తూ చేస్తే మొదటిసారి చేసేవారు కూడా వందకు వంద మార్కులు కొట్టేయొచ్చు.