Kitchen Hacks : నాన్-స్టిక్ అవసరమే లేదు.. ఈ ట్రిక్‌తో స్టీల్ పాత్రలే సూపర్.!

Kitchen Hacks : చాలా మంది ఇళ్లలో స్టెయిన్‌లెస్ స్టీల్ (Stainless Steel) పాత్రల్లో వంట చేసేటప్పుడు ఆహారం అడుగున అంటుకుపోతుందని ఫిర్యాదు చేస్తుంటారు. దీనివల్ల వంట చేయడం మాత్రమే కాదు, ఆ తర్వాత ఆ పాత్రలను తోమడం కూడా పెద్ద తలనొప్పిగా మారుతుంది. ఈ చిరాకు తట్టుకోలేక చాలా మంది స్టీల్ పాత్రలను పక్కన పెట్టేసి నాన్-స్టిక్ పాత్రలను వాడుతుంటారు. అయితే, తప్పు పాత్రలది కాదు.. మనం వండే పద్ధతిదే అని నిపుణులు చెబుతున్నారు. స్టీల్ పాత్రల్లో కూడా ఆహారం అస్సలు అంటుకోకుండా, నాన్-స్టిక్ పాన్ లాగా వండుకోవడానికి ఒక అద్భుతమైన చిట్కా ఉంది. అదేంటో ఇప్పుడు చూద్దాం.

ఆహారం అంటుకోకుండా ఉండాలంటే ఏం చేయాలి? (వాటర్ డ్రాప్ టెస్ట్)

పాత్రలో నూనె లేదా వండే పదార్థాలను వేయడానికి ముందే.. ఖాళీ గిన్నెను లేదా పాన్‌ను మీడియం మంట మీద కొన్ని నిమిషాల పాటు వేడి చేయాలి. పాత్ర బాగా వేడెక్కిన తర్వాత, అందులో కొన్ని నీటి చుక్కలను చల్లాలి. అప్పుడు ఈ క్రింది రెండు విషయాలను గమనించాలి. నీరు వెంటనే ఆవిరైపోతే.. పాత్ర ఇంకా వంటకు సరిపడా వేడెక్కలేదని అర్థం. నీరు చిన్న ముత్యాల లాగా మారి, పాత్రలో ఇటు అటు తిరిగితే.. పాత్ర వండటానికి సరైన వేడికి (ఉష్ణోగ్రతకు) చేరుకుందని అర్థం..

నీటి చుక్కలు ముత్యాల్లా కదిలిన ఆ సెకనులోనే పాత్రలో నూనె వేయాలి. నూనె కొద్దిగా కాగిన తర్వాత ఆహార పదార్థాలను వేసి వండితే.. అది అస్సలు అంటుకోకుండా చాలా పర్ఫెక్ట్‌గా వస్తుంది.

దీని వెనుక ఉన్న శాస్త్రీయ కారణం ఏంటి?

స్టీల్ పాత్రలో నీటి చుక్కలు ముత్యాల్లా తిరగడం వెనుక ‘లైడెన్‌ఫ్రాస్ట్ ఎఫెక్ట్’ (Leidenfrost Effect) అనే ఆసక్తికరమైన సైన్స్ కారణం ఉంది. పాత్ర సరైన ఉష్ణోగ్రత వద్ద వేడెక్కినప్పుడు, మనం చల్లే నీటి చుక్కల కింద ఒక సన్నని ‘నీటి ఆవిరి పొర’ (Vapor Layer) ఏర్పడుతుంది. ఈ ఆవిరి పొర ఒక కుషన్ (Cushion) లాగా పనిచేసి పాత్రకు, నీటికి మధ్య ఘర్షణను తగ్గిస్తుంది. అందుకే నీటి చుక్కలు పాత్రకు అంటుకోకుండా గాల్లో తేలుతున్నట్లుగా అటు ఇటు తిరుగుతాయి.

మనం వంట చేసేటప్పుడు కూడా ఇదే సైన్స్ పనిచేస్తుంది. ఈ ఆవిరి పొర ఆహారానికి, స్టీల్ పాత్రకు మధ్య ఒక గోడలా నిలిచి, ఆహారం అంటుకోకుండా నాన్-స్టిక్ పాన్ లాగా సులభంగా పైకి లేచేలా సహాయపడుతుంది.

స్టీల్ పాత్రల్లో వండేటప్పుడు చేసే 3 ముఖ్యమైన తప్పులు

పాత్రను సరిగ్గా వేడి చేయకపోవడం: చల్లగా ఉన్న పాన్‌లోనే నేరుగా నూనె, ఆహార పదార్థాలు వేయడం వల్లనే అవి పాత్రకు గట్టిగా అంటుకుపోతాయి.

నూనెను ముందే పోసేయడం: పాత్ర సరైన వేడికి చేరుకున్న తర్వాతే నూనె పోయాలి. ముందే నూనె పోస్తే ఈ సైన్స్ ట్రిక్ పనిచేయదు.

వేసిన వెంటనే తిప్పేయడం: గుడ్డు, చేపలు లేదా మాంసం వంటివి పాన్‌లో వేసిన వెంటనే గరిటెతో తిప్పడానికి ప్రయత్నించకూడదు. వాటి కింది భాగం బాగా వేగి, పక్వానికి వచ్చినప్పుడు అవే స్వయంగా పాత్రను వదిలి పైకి వస్తాయి. అంతవరకు కాస్త ఓపిక పట్టాలి.

స్టెయిన్‌లెస్ స్టీల్ పాత్రలే ఎందుకు శ్రేష్ఠమైనవి?

సాధారణ నాన్-స్టిక్ పాత్రలతో పోలిస్తే స్టెయిన్‌లెస్ స్టీల్ పాత్రలు ఆరోగ్యానికి ఎంతో మంచివి , ఎక్కువ కాలం మన్నిక వస్తాయి. వీటిపై గీతలు (Scratches) పడే అవకాశం ఉండదు. టమోటాలు, చింతపండు వంటి యాసిడ్ గుణాలు కలిగిన పదార్థాలను వండినా కూడా ఈ పాత్రలు రసాయన చర్యలకు లోనవవు.

సరైన ఉష్ణోగ్రత , కొద్దిగా ఓపిక ఉంటే స్టెయిన్‌లెస్ స్టీల్ పాత్రలలో ఆహారం అంటుకుపోయే సమస్యను పూర్తిగా దూరం చేయవచ్చు. కాబట్టి, ఇకపై స్టీల్ పాత్రలను పక్కన పెట్టకుండా, వండడానికి ముందు ఈ చిన్న “వాటర్-డ్రాప్ టెస్ట్” చేసి చూడండి. మీ వంట అనుభవమే మారిపోతుంది..