Spider Control : వర్షాకాలంలో సాలీళ్ల బెడదా.? ఈ సహజమైన స్ప్రేలతో చెక్ పెట్టండి.!

Spider Control : వర్షాకాలం ప్రారంభం కాగానే వాతావరణంలోని తేమ, చిన్న చిన్న కీటకాల వ్యాప్తి కారణంగా ఇళ్లలో దోమలు, ఈగలు, ఎలుకలతో పాటు సాలీళ్ల సమస్య కూడా విపరీతంగా పెరుగుతుంది. ముఖ్యంగా తేమతో కూడిన వాతావరణంలో సాలీళ్లు ఇంటి లోపల ఎక్కువగా గూళ్లు అల్లుతాయి. ఇంటి అటకపై, గోడకు అమర్చిన టీవీ వెనుక, గోడ గడియారం వెనుక, తలుపుల మూలల్లో ఇవి మన కంట పడకుండా దాక్కుంటాయి. ప్రతి మూలలో కనిపించే వాటి గూళ్లు ఇంటి అందాన్ని పాడు చేయడమే కాకుండా చికాకు కలిగిస్తాయి. అందుకే ఈ సాలీళ్లను ఇళ్ల నుండి సులభంగా తరిమికొట్టడానికి కొన్ని అద్భుతమైన సహజ చిట్కాలు ఇక్కడ ఉన్నాయి.

ఘాటైన వాసనలతో సాలీళ్లకు చెక్ : సాలీళ్లకు ఉండే సున్నితమైన గ్రాహకాల (Sensory Receptors) కారణంగా వాటికి కొన్ని రకాల ఘాటైన వాసనలు అస్సలు పడవు. అలాంటి సహజమైన సువాసనలతో కూడిన నూనెలను ఉపయోగించి సాలీళ్లను దూరం పెట్టవచ్చు.

పుదీనా నూనె (Peppermint Oil): పుదీనా యొక్క ఘాటైన మెంథాల్ వాసన సాలీళ్ల నాడీ వ్యవస్థకు అంతరాయం కలిగిస్తుంది. రీసెర్చ్‌గేట్.నెట్ (ResearchGate.net) పరిశోధనల ప్రకారం, 75% కంటే ఎక్కువ పరీక్షలలో పుదీనా నూనె సాలీళ్లను విజయవంతంగా దూరంగా ఉంచినట్లు తేలింది.

లావెండర్ నూనె (Lavender Oil): మనకు ఆహ్లాదాన్నిచ్చే లావెండర్ సువాసన దోమలు, ఈగలు, చీమలు , సాలీళ్లకు మాత్రం అస్సలు నచ్చదు. ఇది పురుగుమందులకు ఒక గొప్ప సహజ ప్రత్యామ్నాయంగా పనిచేస్తుంది.

తులసి , థైమ్ (Basil and Thyme): తులసి, థైమ్ మొక్కల సువాసనలు సహజంగానే దోమలు, ఈగలను తరిమికొడతాయి. ఇళ్లలో కీటకాల సంఖ్య తగ్గితే, వాటిని ఆహారంగా చేసుకునే సాలీళ్లు కూడా ఆటోమేటిక్‌గా వేరే చోటికి వెళ్ళిపోతాయి.

హోం మేడ్ నేచురల్ స్ప్రే.. ఇలా తయారు చేసుకోండి

ఒక స్ప్రే బాటిల్‌లో సుమారు అర లీటరు నీటిని నింపాలి. అందులో పైన పేర్కొన్న ఏదైనా ఒక సుగంధ తైలం (ఎసెన్షియల్ ఆయిల్) ఐదు చుక్కలు, అలాగే రెండు నుండి మూడు చుక్కల ద్రవ సబ్బును (Liquid Soap) వేసి బాగా కలపాలి. ఇలా తయారైన మిశ్రమాన్ని సాలెపురుగులు ఎక్కువగా చేరే అవకాశం ఉన్న ఇంటి తలుపులు, కిటికీలు , గది మూలలపై చల్లాలి. ఇంకా సులభంగా చేయాలనుకుంటే, చిన్న దూది ఉండలపై కొన్ని చుక్కల సుగంధ తైలాన్ని వేసి వాటిని కిటికీల దగ్గర, అరల మీద లేదా గది మూలల్లో ఉంచినా మంచి ఫలితం ఉంటుంది. అలాగే, తెల్ల వెనిగర్ , నీటిని సమాన భాగాలుగా కలిపి చల్లడం వల్ల కూడా ఆ వాసనకు సాలీళ్లు రావు.

ఇల్లు శుభ్రంగా ఉండటానికి మరికొన్ని సులభమైన చిట్కాలు

సాలీళ్ల సమస్య శాశ్వతంగా పోవాలంటే ఇంటి పరిసరాలను కూడా శుభ్రంగా ఉంచుకోవాలి. అందుకోసం తలుపులు, కిటికీల చుట్టూ ఉన్న చిన్న చిన్న పగుళ్లను పూర్తిగా మూసివేయాలి. ఇంట్లోకి ఎక్కడా నీరు కారకుండా చూసుకోవడంతో పాటు పరిశుభ్రతపై ప్రత్యేక శ్రద్ధ పెట్టాలి. కిటికీల దగ్గర పెరిగే పొదలు, మొక్కలను క్రమం తప్పకుండా కత్తిరించుకోవాలి. ఇంటి గోడల దగ్గర ఎలాంటి చెత్తాచెదారం లేకుండా చూసుకోవాలి , చెట్ల కొమ్మలు గోడలను తాకకుండా కత్తిరించాలి. వీటన్నింటితో పాటు, సాలెగూళ్లను తొలిదశలోనే తొలగించడానికి క్యాబినెట్ల వెనుక, టీవీ వెనుక భాగాలను క్రమం తప్పకుండా తనిఖీ చేస్తూ శుభ్రం చేసుకోవాలి.