Male Fertility: సిగరెట్ మాత్రమే కాదు.. ఈ అలవాట్లు కూడా స్పెర్మ్ కౌంట్‌ను దెబ్బతీస్తున్నాయి..

Male Fertility: ప్రస్తుత కాలంలో సంతానలేమి సమస్యలు పెరుగుతున్నాయి. ముఖ్యంగా ప్రస్తుత ఆహారపు అలవాట్లు, లైఫ్ స్టైల్, ఒత్తిడి ఇలా పలు కారణాలు పురుషుల్లో ‘‘శుక్ర కణాల’’లను దెబ్బతీస్తున్నాయి. చాలా మంది పురుషుల్లో వీర్య కణాల సంఖ్య తగ్గిపోతుంది. దీనికి ప్రధాన కారణంగా సిగరేట్, పొగాకు వినియోగం అని చాలా మంది భావిస్తుంటారు. కానీ ఇతర అలవాట్లు కూడా ఈ సమస్యను మరింత పెంచుతాయని వైద్య నిపుణులు చెబుతున్నారు.

వీర్యంలో ప్రతీ మిల్లీలీటర్‌కు 15 మిలియన్ల కన్నా తక్కువ స్పెర్మ్ ఉంటే దానిని ఒలిగోస్పెర్మియా (Oligospermia) అంటారు. ఒకవేళ వీర్యంలో స్పెర్మ్ అసలే లేకపోతే దానిని అజూస్పెర్మియా (Azoospermia)గా పిలుస్తారు. ఇలాంటి పరిస్థితుల్లో గర్భధారణ అనేది చాలా కష్టం అవుతుంది.

లో- స్పెర్మ్‌ కౌంట్ కు లక్షణాలు ఉంటాయా?

స్పెర్మ్ కౌంట్ తక్కువగా ఉన్న చాలా మందిలో ఎలాంటి లక్షణాలు కనిపించకపోవచ్చు. అయితే, ఏడాది పాటు భార్యతో దాంపత్య జీవితం తర్వాత కూడా గర్భం రాకుంటే ఏదైనా సమస్య ఉందని భావించాలి. కొందరిలో లైంగిక ఆసక్తి తగ్గడం, అంగస్తంభన సమస్యలు, వృషణాల్లో నొప్పి, వాపు లేదా గడడ్డలు వంటి లక్షణాలు కనిపించవచ్చు.

స్పెర్మ్ కౌంట్ తగ్గడానికి కారణాలు ఇవే:

సిగరెట్, పొగాకు మాత్రమే కాకుండా అధిక బరువు (ఊబకాయం), దీర్ఘకాలిక మానసిక ఒత్తిడి, మద్యం అధికంగా తీసుకోవడం, మాదకద్రవ్యాల వినియోగం, హార్మోన్ల అసమతుల్యత వంటి అంశాలు కూడా స్పెర్మ్ కౌంట్‌ను తగ్గిస్తాయి. అదనంగా కొన్ని ఇన్‌ఫెక్షన్లు, వేరికోసెల్ (Varicocele), థైరాయిడ్ సమస్యలు, కొన్ని మందులను ఎక్కువకాలం వాడటం కూడా పురుషుల సంతానోత్పత్తి సామర్థ్యంపై ప్రభావం చూపవచ్చు.

చికిత్సతో మెరుగవుతుందా?

తక్కువ స్పెర్మ్ కౌంట్ ఉన్నంత మాత్రాన పిల్లలు కలుగరని కాదు. ప్రస్తుతం మందులు, జీవనశైలిలో మార్పులు, ఆధునిక ఫెర్టిలిటీ చికిత్సల ద్వారా ఈ సమస్యను అధిగమించవచ్చు. పోషకాహారం తీసుకోవడం, వ్యాయామం, బరువు నియంత్రణ, ఒత్తిడిని తగ్గించుకోవడం, సిగరేట్, పొగాకు అలవాట్లకు దూరంగా ఉండటం స్పెర్మ్ నాణ్యత, సంఖ్యను మెరుగుపరుస్తుంది.