Neem Juice Daily : వేప రసం మంచిదే.. కానీ రోజూ తాగితే ఈ ప్రమాదాలు తప్పవు.!

Neem Juice Daily : ప్రకృతి మనకు ప్రసాదించిన అద్భుతమైన వృక్షాలలో వేప చెట్టు అత్యంత ముఖ్యమైనది. ఈ రోజుల్లో మంచి ఆరోగ్యం కోసం చాలామంది ఖరీదైన హెల్త్ ప్రొడక్ట్స్ వెంట పడుతున్నారు. కానీ, మన చుట్టూ ఉన్న చెట్లు, ఆకులలోని ఔషధ గుణాలను తెలుసుకుని వాడుకుంటే సగం రోగాలను సులభంగా దూరం పెట్టవచ్చు.

ఆయుర్వేదంలో వేప ఆకులను ఒక నిధిలా భావిస్తారు. వేప రసంలో ఉండే యాంటీమైక్రోబియల్ (సూక్ష్మక్రిమి నిరోధక), యాంటీ ఇన్‌ఫ్లమేటరీ (శోథ నిరోధక) గుణాలు శరీరాన్ని డిటాక్స్ చేయడానికి, చర్మ ఆరోగ్యాన్ని కాపాడటానికి, జీర్ణక్రియను మెరుగుపరచడానికి , బ్లడ్ షుగర్ లెవెల్స్ కంట్రోల్ చేయడానికి అద్భుతంగా పనిచేస్తాయి. అయితే, వేప రసం ఆరోగ్యానికి మంచిదే అయినప్పటికీ, దాన్ని అమితంగా తాగితే కొన్ని తీవ్రమైన సైడ్ ఎఫెక్ట్స్ వస్తాయని వైద్య నిపుణులు హెచ్చరిస్తున్నారు. అవేంటో ఇప్పుడు చూద్దాం..

అందరికీ సరిపడదు (ముఖ్యంగా వీరు దూరంగా ఉండాలి!)
వేప రసం అందరి శరీర తత్వాలకూ పడదు. ముఖ్యంగా గర్భిణీ స్త్రీలు, పాలిచ్చే తల్లులు, లో-షుగర్ (రక్తంలో చక్కెర స్థాయిలు తక్కువగా ఉన్నవారు) సమస్య ఉన్నవారు దీనికి దూరంగా ఉండాలి. అలాగే ఏదైనా ఆరోగ్య సమస్యకు మందులు వాడుతున్న వారు డాక్టర్ సలహా లేకుండా వేప రసాన్ని అస్సలు తీసుకోకూడదు. దీనిని అతిగా తాగడం వల్ల లివర్ (కాలేయం) పై ఒత్తిడి పెరగడం లేదా కడుపుకు సంబంధించిన సమస్యలు వచ్చే ప్రమాదం ఉంది.

శరీరాన్ని లోపల పొడిబార్చేస్తుంది
వేప ఆకులకు ప్రకృతిసిద్ధంగానే చల్లబరిచే , పొడిబార్చే (Dryness) గుణం ఉంటుంది. అందుకే వేప రసాన్ని అవసరానికి మించి ఎక్కువ కాలం పాటు తాగుతూ ఉంటే, అది శరీరం లోపల విపరీతమైన పొడిదనానికి దారితీస్తుంది. ఫలితంగా చర్మం పొడిబారిపోయి, వయసు పెరగకముందే ముఖంపై ముడతలు రావడం (అకాల వృద్ధాప్యం) లాంటి లక్షణాలు కనిపిస్తాయి.

కణజాలాలను బలహీనపరుస్తుంది
మనం వేప రసం తాగితే శరీరం శుభ్రపడుతుంది (డిటాక్స్ అవుతుంది) అని బలంగా నమ్ముతాం. కానీ, పరిమితి దాటి చేదు పదార్థాలను ఎక్కువగా తీసుకోవడం వల్ల రక్తం, కండరాలు, కొవ్వు వంటి శరీరంలోని ఏడు ప్రధాన కణజాలాలు (Tissues) క్రమంగా బలహీనపడటం లేదా క్షీణించడం ప్రారంభమవుతుంది. దీనివల్ల మీరు ఎంత మంచి పౌష్టికాహారం తింటున్నా కూడా ఎప్పుడూ నీరసంగా, అలసటగా అనిపిస్తుంది.

కీళ్ల నొప్పుల సమస్య
శరీరంలోకి ఎక్కువ మొత్తంలో చేదు పదార్థాలు ప్రవేశించినప్పుడు అది వాత దోషంపై ప్రతికూల ప్రభావం చూపిస్తుంది. దీనివల్ల మన కీళ్లలో ఉండే జిగురు పదార్థం (కందెన ద్రవం) ఎండిపోవడం మొదలవుతుంది. ఫలితంగా కీళ్లలో బిగుతుతనం పెరిగి, నడవాలన్నా, కదలాలన్నా తీవ్రమైన కీళ్ల నొప్పులు వచ్చే అవకాశం ఉంది.

వేప రసాన్ని సేవించాల్సిన సరైన పద్ధతి ఏంటి?

వేప రసాన్ని ఔషధంలా వాడాలే తప్ప ఇష్టమొచ్చినట్లు తాగకూడదు. దీనిని ఎప్పుడూ చాలా తక్కువ మోతాదులో.. అంటే కేవలం 10 నుండి 15 మిల్లీలీటర్ల మోతాదులో మాత్రమే తీసుకోవాలి. ఈ రసాన్ని కొద్దిగా నీళ్లలో కలుపుకుని, ఉదయాన్నే ఖాళీ కడుపుతో తాగడం మంచిది. డాక్టర్ పర్యవేక్షణ లేకుండా నెలల తరబడి దీనిని అసలు వాడకూడదు. ఏ సహజ సిద్ధమైన ఔషధమైనా సరే, మన శరీర పరిస్థితిని బట్టి పని చేస్తుంది. కాబట్టి మీ ఆరోగ్య స్థితిని బట్టి ఒకసారి డాక్టర్‌ను సంప్రదించి, సరైన మోతాదులో వాడుకోవడం ఎల్లప్పుడూ సురక్షితం..