Ragi Ponganalu: మహిళలకు అమృతం లాంటిది.. ఐరన్, క్యాల్షియం కావాలంటే వారంలో రెండుసార్లు ఇవి తినండి!

Ragi Ponganalu: ఈ రోజుల్లో హెల్తీ లైఫ్‌స్టైల్, సాంప్రదాయ ఆహారాలపై జనాల ఆసక్తి చాలా పెరిగింది. ముఖ్యంగా బరువు తగ్గాలనుకునే వారు, ఐరన్ లోపం (అనీమియా), జుట్టు రాలడం వంటి సమస్యలతో బాధపడేవారికి ‘రాగులు’ ఒక అద్భుతమైన ఛాయిస్‌గా పని చేస్తున్నాయి. అయితే రోజూ రాగి జావ లేదా రాగి సంకటి తింటే బోర్ కొడుతుంది అనుకునే వారి కోసం.. కేవలం 10 నిమిషాల్లో ఎంతో రుచిగా, క్రిస్పీగా తయారు చేసుకోగలిగే ‘రాగి పొంగణాలు’ (Ragi Ponganalu) రెసిపీని సింపుల్‌గా ఎలా చేసుకోవాలో ఈ స్టోరీలో తెలుసుకుందాం.

నిజానికి రాగి పొంగణాలు అనేవి రక్తహీనత, జుట్టు రాలడం, అధిక బరువు.. ఇలాంటి సమస్యలన్నింటికీ చెక్ పెట్టే సూపర్ హెల్తీ బ్రేక్‌ఫాస్ట్. వీటిని పిల్లల నుంచి పెద్దల వరకు అందరూ ఎంతో ఇష్టంగా తినేలా, కేవలం పదే పది నిమిషాల్లో ఈ గుంత పొంగణాలను ఎలా తయారు చేసుకోవాలంటే..

కావలసిన పదార్థాలు:

రాగి పిండి – 1 కప్పు

బొంబాయి రవ్వ (ఉప్మా రవ్వ) – 1 కప్పు

పెరుగు – 1 కప్పు

ఉల్లిపాయ – 1 (సన్నగా తరిగినది)

క్యారెట్ తురుము – 1 కప్పు

పచ్చిమిర్చి – 3 (సన్నగా తరిగినవి)

జీలకర్ర – 1 టేబుల్ స్పూన్

కొత్తిమీర – కొద్దిగా

వంట సోడా – పావు స్పూన్

ఉప్పు – రుచికి సరిపడా

నూనె – పొంగణాల ఫ్రైకి సరిపడా

తయారీ విధానం
ముందుగా ఒక మిక్సింగ్ బౌల్ తీసుకొని అందులో ఒక కప్పు రాగి పిండి, ఒక కప్పు బొంబాయి రవ్వ, ఒక కప్పు పెరుగు వేసి బాగా కలుపుకోవాలి. ఆ తర్వాత అందులో సన్నగా తరిగిన ఉల్లిపాయ ముక్కలు, క్యారెట్ తురుము, సన్నగా కట్ చేసిన పచ్చిమిర్చి, కొద్దిగా కొత్తిమీర, ఒక చెంచా జీలకర్ర, రుచికి సరిపడా ఉప్పు వేసి అన్ని కలిసేలా మిక్స్ చేయాలి. ఈ మిశ్రమంలో కొద్దికొద్దిగా నీళ్లు పోస్తూ.. పిండిని మరీ పల్చగా కాకుండా, మరీ గట్టిగా కాకుండా సాధారణ పొంగణాల పిండి లాగా కలుపుకోవాలి. రవ్వ నానుతుంది కాబట్టి ఒక 10 నిమిషాల పాటు ఈ పిండిని పక్కన పెట్టుకోవాలి.

పొంగణాలు వేసుకునే ముందు పిండిలో పావు స్పూన్ వంట సోడా (బేకింగ్ సోడా) వేసి ఒక్కసారి బాగా కలుపుకోవాలి. దీనివల్ల పొంగణాలు లోపల మెత్తగా, పైన క్రిస్పీగా వస్తాయి. ఇప్పుడు స్టవ్ ఆన్ చేసి గుంత పొంగణాల పెనం (Appam Pan) పెట్టుకుని, అన్ని గుంతల్లో కొద్దికొద్దిగా నూనె వేయాలి. పెనం వేడెక్కిన తర్వాత స్పూన్‌తో పిండిని తీసుకొని గుంతల్లో వేసుకోవాలి. మూత పెట్టి మీడియం ఫ్లేమ్‌పై రెండు వైపులా గోల్డెన్ బ్రౌన్ కలర్ వచ్చేంత వరకు క్రిస్పీగా కాల్చుకోవాలి. అంతే.. ఎంతో రుచికరమైన, వేడివేడి హెల్తీ రాగి పొంగణాలు రెడీ అయిపోతాయి.

రాగుల్లో క్యాల్షియం, ఐరన్ – ఫైబర్ కంటెంట్ చాలా ఎక్కువగా ఉంటుంది. ముఖ్యంగా మహిళల్లో వచ్చే అనీమియా (రక్తహీనత) సమస్యను తగ్గించడానికి, జుట్టు కుదుళ్లను బలంగా మార్చడానికి ఈ రాగి పొంగణాలు అద్భుతంగా పనిచేస్తాయి. వీటిని అల్లం చట్నీ లేదా పల్లీల చట్నీతో తింటే టేస్ట్ అదిరిపోతుంది.