Watermelon: పుచ్చకాయను వీరు ఎట్టి పరిస్థితుల్లో కూడా తినకూడదు.. దూరంగా ఉంటే మంచిది..

వేసవి కాలం రాగానే అందరికీ ముందుగా గుర్తొచ్చే పండు పుచ్చకాయ. ఎండ వేడి నుంచి ఉపశమనం పొందడానికి, శరీరాన్ని చల్లబరుచుకోవడానికి చాలామంది దీనిపైనే ఆధారపడతారు. ఇందులో దాదాపు 90 శాతం నీరు ఉండటం వల్ల డీహైడ్రేషన్ సమస్య తలెత్తదు. విటమిన్ ఎ, సి మరియు శక్తివంతమైన యాంటీఆక్సిడెంట్లు ఉన్న ఈ పండు ఆరోగ్యానికి ఎంతో మేలు చేస్తుంది. అయితే, అమితంగా తింటే అమృతం కూడా విషమే అన్నట్లు.. పుచ్చకాయ విషయంలో కూడా కొన్ని జాగ్రత్తలు తప్పనిసరి. ముఖ్యంగా ఈ ఐదు రకాల సమస్యలు ఉన్నవారు పుచ్చకాయకు దూరంగా ఉండటం లేదా మితంగా తీసుకోవడం మంచిది.

శ్వాసకోశ సమస్యలు..

పుచ్చకాయ ప్రకృతి సిద్ధంగా చలువ చేసే గుణం కలిగి ఉంటుంది. అందుకే ఇప్పటికే జలుబు, దగ్గు లేదా ఆస్తమా వంటి కఫ సంబంధిత సమస్యలతో బాధపడేవారు దీనిని తింటే ఆ ఇబ్బందులు మరింత ఎక్కువయ్యే అవకాశం ఉంది.

మధుమేహం (Diabetes)..

పుచ్చకాయలో గ్లైసెమిక్ ఇండెక్స్ ఎక్కువగా ఉంటుంది. అంటే దీనిని తిన్న వెంటనే రక్తంలో చక్కెర స్థాయిలు వేగంగా పెరిగే అవకాశం ఉంది. కాబట్టి షుగర్ వ్యాధిగ్రస్తులు వైద్యుల సలహా మేరకు చాలా తక్కువ పరిమాణంలో తీసుకోవాలి.

జీర్ణక్రియ ఇబ్బందులు..

ఇందులో ఫ్రక్టోజ్ అనే చక్కెర ఉంటుంది. కొంతమందికి దీనిని అరిగించుకోవడం కష్టమవుతుంది. ఫలితంగా కడుపు ఉబ్బరం, గ్యాస్ లేదా విరేచనాలు వంటి సమస్యలు తలెత్తవచ్చు.

అధిక బరువు..

పుచ్చకాయను పగటిపూట తీసుకోవడం వల్ల పెద్దగా ఇబ్బంది ఉండదు కానీ, రాత్రిపూట తింటే అందులోని చక్కెరలు కొవ్వుగా మారి బరువు పెరిగేలా చేస్తాయి. రాత్రి సమయంలో మన జీర్ణ వ్యవస్థ నెమ్మదిగా పని చేస్తుందని గుర్తుంచుకోవాలి.

చర్మ మార్పులు

అతిగా పుచ్చకాయ తినడం వల్ల అందులోని లైకోపీన్ అనే పదార్థం ప్రభావంతో చర్మం రంగు పసుపు లేదా నారింజ రంగులోకి మారే ప్రమాదం ఉంది. దీనిని వైద్య పరిభాషలో ‘లైకోపెనియా’ అని పిలుస్తారు.

వేసవి తాపం నుంచి తప్పించుకోవడానికి పుచ్చకాయ ఒక మంచి ఎంపికే, కానీ మీ ఆరోగ్య పరిస్థితిని బట్టి దానిని సరైన సమయంలో, సరైన పరిమాణంలో తీసుకోవడం ఉత్తమం.