Palakura Ullikaram Recipe : పాలకూర ఉల్లికారం.. అన్నం, చపాతీల్లోకి అదిరిపోయే రుచి.. ఇలా చేస్తే ప్లేట్ ఖాళీ అవ్వాల్సిందే.!

Palakura Ullikaram Recipe in Telugu: పాలకూర ఆరోగ్యానికి ఎంతో మేలు చేస్తుందన్న విషయం తెలిసిందే. అయితే ఎప్పుడూ చేసే పాలకూర పప్పు లేదా ఫ్రై కాకుండా, కొంచెం వెరైటీగా ‘పాలకూర ఉల్లికారం’ ప్రయత్నిస్తే ఆ రుచే వేరుగా ఉంటుంది. అన్నం లేదా చపాతీ దేనిలోకైనా సరిపోయే ఈ కమ్మని వంటకాన్ని తక్కువ సమయంలో ఎలా తయారు చేసుకోవాలో ఇక్కడ చూద్దాం.

కావలసిన పదార్థాలు:

పాలకూర: 3 పెద్ద కట్టలు
ఉల్లిపాయలు: 3 మీడియం సైజు
వెల్లుల్లి: 1 మీడియం సైజు రెమ్మలు
కారం: 1 టేబుల్ స్పూన్
ఉప్పు: రుచికి సరిపడా
నూనె: 3-4 టేబుల్ స్పూన్లు
పోపు దినుసులు: 1 టేబుల్ స్పూన్ (ఆవాలు, జీలకర్ర, పచ్చిశనగపప్పు, మినప్పప్పు)
ఎండు మిరపకాయలు: 3
కరివేపాకు: 1 రెమ్మ
పసుపు: 1/2 టీస్పూన్
పొడులు: వేయించిన ధనియాల పొడి (1 టీస్పూన్), వేయించిన జీలకర్ర పొడి (1/4 టీస్పూన్)

 

తయారీ విధానం:
1. పాలకూరను సిద్ధం చేయడం:
ముందుగా పాలకూరను 3-4 సార్లు శుభ్రంగా కడిగి, నీరు లేకుండా పూర్తిగా వడకట్టాలి. ముదురు కాడలను తీసివేసి, లేత కాడలతో సహా పాలకూరను వీలైనంత సన్నగా కట్ చేసుకోవాలి. ఇలా సన్నగా తరగడం వల్ల ఉల్లికారంలో పాలకూర బాగా మగ్గి, ముద్ద కూరలా రుచికరంగా వస్తుంది.

2. ఉల్లికారం తయారీ:
ఒక మిక్సీ జార్ తీసుకుని అందులో కట్ చేసిన ఉల్లిపాయ ముక్కలు, వెల్లుల్లి రెమ్మలు (పొట్టు తీయకుండా వేస్తే రుచి బాగుంటుంది), కారం , రుచికి సరిపడా ఉప్పు వేయాలి. వీటిని మరీ మెత్తటి పేస్ట్‌లా కాకుండా, ఉల్లిపాయ ముక్కలు అక్కడక్కడా తగిలేలా బరకగా గ్రైండ్ చేసి పక్కన పెట్టుకోవాలి.

3. పోపు , ఉల్లికారం వేయించడం:
స్టవ్ మీద పాన్ పెట్టి నూనె వేయాలి. నూనె వేడెక్కాక పోపు దినుసులు (ఆవాలు, జీలకర్ర, పప్పులు) వేసి చిటపటలాడనివ్వాలి. ఆ తర్వాత ఎండు మిరపకాయలు, కరివేపాకు వేసి వేయించాలి. ఇప్పుడు సిద్ధం చేసుకున్న ఉల్లికారాన్ని ఈ పోపులో వేసి లో ఫ్లేమ్ మీద బాగా వేయించాలి. ఉల్లికారంలోని పచ్చి వాసన పోయి, నూనె పైకి తేలే వరకు వేయించడం వల్ల కూరకు మంచి రుచి వస్తుంది.

4. పాలకూరతో వండటం:
ఉల్లికారం వేగిన తర్వాత కట్ చేసి పెట్టుకున్న పాలకూరను వేసి బాగా కలపాలి. పాన్‌పై మూత పెట్టి లో ఫ్లేమ్ మీద మగ్గనివ్వాలి. మధ్య మధ్యలో అడుగు అంటకుండా కలుపుతూ ఉండాలి. పాలకూర బాగా మగ్గిన తర్వాత పసుపు, ధనియాల పొడి , జీలకర్ర పొడి వేసి మరో నిమిషం పాటు వేయించాలి.

కూరలోని తేమ తగ్గి, నూనె సైడ్స్ నుంచి వస్తున్నప్పుడు స్టవ్ ఆఫ్ చేయాలి. అంతే, ఎంతో రుచికరమైన పాలకూర ఉల్లికారం సిద్ధం. దీన్ని వేడివేడి అన్నంలో నెయ్యి వేసుకుని తిన్నా లేదా చపాతీతో తిన్నా చాలా అద్భుతంగా ఉంటుంది.