Crispy Poori Recipe: పూరీలు వెంటనే అణిగిపోతున్నాయా? ఈ చిన్న ట్రిక్ పాటిస్తే గంటల తరబడి ఉబ్బి కరకరలాడతాయి

Crispy Poori Recipe: ఇంట్లో పూరీలు చేసినప్పుడు అవి పెనంలో బాగా ఉబ్బినా, ప్లేట్‌లోకి తీసిన కొద్దిసేపటికే మెత్తబడి అణిగిపోవడం చాలా మందికి ఎదురయ్యే సమస్య. అదే పెళ్లిళ్లు, హోటళ్లలో ఇచ్చే పూరీలు మాత్రం గంటల తర్వాత కూడా ఉబ్బి కరకరలాడుతూ కనిపిస్తాయి. దీంతో వంటవాళ్ళు ఏదైనా ప్రత్యేక పదార్థం ఉపయోగిస్తారా అనే సందేహం చాలామందికి వస్తుంది. వాస్తవానికి పిండిని కలిపే విధానం, నూనె వేడి, వేయించే టెక్నిక్ వంటి చిన్న చిన్న చిట్కాలే పూరీల రుచిని, ఆకారాన్ని పూర్తిగా మార్చేస్తాయి.

పూరీలు బాగా రావాలంటే మొదట పిండిపైనే శ్రద్ధ పెట్టాలి. చాలా మంది చపాతీ పిండిలాగే మెత్తగా కలిపేస్తారు. అయితే పూరీల కోసం పిండి కొద్దిగా గట్టిగా ఉండాలి. అలా చేస్తే పూరీలు నూనెను తక్కువగా పీల్చుకుని ఎక్కువసేపు ఉబ్బి ఉంటాయి. హోటల్స్ లో తరచూ ఉపయోగించే చిన్న చిట్కా ఏమిటంటే గోధుమపిండిలో ఓ రెండు టీ స్పూన్ల బొంబాయి రవ్వ కలపడం. ఇది పూరీలకు కరకరలాడే టెక్స్చర్ ఇవ్వడమే కాకుండా, అవి త్వరగా అణిగిపోకుండా సహాయపడుతుంది. కొంతమంది పిండిలో ఒక స్పూన్ వేడి నూనె కూడా కలుపుతారు. దీంతో పూరీలు మరింత క్రిస్పీగా తయారవుతాయి. అలాగే పిండి కలిపిన వెంటనే కాకుండా 15 నుంచి 20 నిమిషాలు మూతపెట్టి ఉంచిన తర్వాత పూరీలు ఒత్తడం మంచిది.

పూరీల మందం కూడా చాలా కీలకం. మరీ పల్చగా ఒత్తితే అవి సరిగ్గా ఉబ్బవు, పైగా విరిగిపోయే అవకాశం ఉంటుంది. మరీ మందంగా ఉంటే లోపల సరిగా ఉడకవు. అందుకే అన్ని పూరీలను ఒకే పరిమాణంలో, ఒకే మందంతో ఒత్తితే అవి సమానంగా వేగి చక్కగా ఉబ్బుతాయి. నూనె వేడి సరైన స్థాయిలో ఉండటం కూడా అంతే ముఖ్యం. నూనె చల్లగా ఉంటే పూరీలు ఎక్కువ నూనె పీల్చుకుని మెత్తబడిపోతాయి. మరీ ఎక్కువ వేడిగా ఉంటే బయట మాత్రమే కాలిపోతాయి, లోపల సరిగా ఉడకవు. కాబట్టి పూరీని నూనెలో వేసిన వెంటనే అది నెమ్మదిగా పైకి తేలుతూ ఉబ్బడం ప్రారంభించాలి. అదే పూరీ మంచిగా వచ్చేందుకు సంకేతం.

పూరీలను వేయించే విధానంలో కూడా ఒక చిన్న టెక్నిక్ ఉంది. పూరీని నూనెలో వేసిన వెంటనే గరిటెతో మెల్లగా పైభాగాన్ని నొక్కితే వేడి నూనె పూరీపైకి చేరి అది పూర్తిగా ఉబ్బుతుంది. ఆ తర్వాత మరోవైపు తిప్పి రెండు వైపులా గోల్డ్ కలర్ వచ్చే వరకు వేయిస్తే పూరీలు బయట కరకరలాడుతూ, లోపల మెత్తగా ఉంటాయి. పూరీలను ఒకదానిపై ఒకటి వెంటనే పేర్చకుండా, నూనె పూర్తిగా వడకట్టిన తర్వాత మాత్రమే ప్లేట్‌లో పెట్టడం కూడా మంచిది. ఇలా చేస్తే ఆవిరి కారణంగా అవి మెత్తబడే అవకాశం తగ్గుతుంది. అవసరమైతే టిష్యూ పేపర్‌పై కాసేపు ఉంచి తరువాత సర్వ్ చేయవచ్చు.

ఇలాంటి చిన్న చిన్న చిట్కాలను పాటిస్తే ఇంట్లోనే హోటల్  స్టైల్ పూరీలు సులభంగా తయారవుతాయి. పిండిలో కొద్దిగా బొంబాయి రవ్వ, వేడి నూనె కలపడం, పిండిని కొంచెం గట్టిగా కలపడం, సరైన ఉష్ణోగ్రతలో వేయించడం, ఒకే మందంతో ఒత్తడం వంటి పద్ధతులు పాటిస్తే పూరీలు గంటల తరబడి ఉబ్బి, కరకరలాడుతూ ఉండే అవకాశం ఎక్కువగా ఉంటుంది. తినేటప్పుడు రుచిగా కూడా ఉంటాయి.