Ragi Halwa Recipe: పండగలకు, పబ్బాలకు నోరు తీపి చేసుకోవాలని ఉంటుంది. కానీ ప్రస్తుతం బయట దొరికే స్వీట్లు తినాలంటే భయమేస్తోంది. ఇంట్లోనే హెల్తీతోపాటు టేస్టీగా ఓ రెసిపీ చేద్దాం. సాధారణంగా గోధుమ హల్వా చేస్తాం. కానీ ఆరోగ్యంగా ఉండే మరో మంచి ఆప్షన్ రాగి హల్వా. రాగితో చేసే ఈ స్వీట్ తినడానికి జెల్లీలా మెత్తగా, నోట్లో వేసుకుంటే కరిగిపోతుంది. ఈ ప్రత్యేకమైన రుచితో అందరినీ ఆకట్టుకుంటుంది. ముఖ్యంగా రాగి ఆరోగ్యానికి మంచిదే కాబట్టి పిల్లల నుంచి పెద్దల వరకు ఎవరైనా తినొచ్చు. సాంప్రదాయంగా రాగి హల్వా చేయాలంటే రాత్రంతా రాగి నానబెట్టి, దాని పాలు తీసి, పాకంలో కలిపి చాలాసేపు కలుపుతూ చేయాలి. కానీ అదే రుచి తక్కువ టైంలో రావాలంటే రాగిపిండితో చేసే ఈ సింపుల్ విధానం బాగా ఉపయోగపడుతుంది.
READ MORE: Andhra Pradesh: రెవెన్యూ శాఖలో ఆ పోస్టు పేరు మార్పు
కావాల్సిన పదార్థాలు..
రాగిపిండి – పావు కప్పు
బెల్లం – పావు కప్పు
నీరు – మొత్తం సుమారు 2 కప్పులు
నెయ్యి – 1/8 కప్పు (కొద్దికొద్దిగా వేసుకోవాలి)
జీడిపప్పు – 5 (ముక్కలుగా)
తయారు చేసే విధానం..
ముందుగా రాగిపిండిలో కొద్దిగా నీరు వేసి ముద్దలు లేకుండా బాగా కలపాలి. ఇంకా స్మూత్గా రావాలంటే మిక్సీలో ఒకసారి తిప్పి పలుచని బట్టలో వడకట్టి రాగిపాలు తీసుకోవాలి. ఇలా తీసిన పాలు పక్కన పెట్టాలి. ఇప్పుడు ఒక పాత్రలో బెల్లం, కొద్దిగా నీరు వేసి మరిగించాలి. బెల్లం కరిగిన తర్వాత వడకట్టి మలినాలు తీసేయాలి. మరొక పాన్లో కొద్దిగా నెయ్యి వేడి చేసి జీడిపప్పు బంగారు రంగులో వేయించి పక్కన పెట్టాలి. అదే పాన్లో రాగిపాలు పోసి తక్కువ మంటపై నిరంతరం కలుపుతూ ఉండాలి. ఇది నెమ్మదిగా చిక్కబడుతుంది. అప్పుడే బెల్లం పాకం వేసి మళ్లీ కలపాలి. కాస్త గట్టిపడే సమయంలో నెయ్యిని కొద్దికొద్దిగా వేస్తూ కలుపుతూ ఉండాలి. ఒకేసారి మొత్తం నెయ్యి వేయకూడదు. కొంతసేపటికి హల్వా జెల్లీలా మెరుస్తుంది. ఇక నెయ్యి సైతం లోపలికి పీల్చుకోదు. చివరగా వేయించిన జీడిపప్పు వేసి కలిపి స్టౌ ఆఫ్ చేయాలి. ఈ రాగి హల్వా తినడానికి చాలా రుచిగా ఉంటుంది. ఆరోగ్యకరంగా కూడా ఉంటుంది. పండుగ రోజుల్లో లేదా ఇంట్లో ఏదైనా ప్రత్యేక సందర్భం ఉన్నప్పుడు సింపుల్గా, తక్కువ సమయంలో చేసేయొచ్చు.
