US: ఖతార్‌లో అమెరికా సైనిక విమానం అదృశ్యం.. రంగంలోకి సైన్యం!

పశ్చిమాసియాలో అగ్ర రాజ్యం అమెరికాకు మరో ఎదురుదెబ్బ తగిలింది. ఇరాన్ సమీపంలో KC-135 స్ట్రాటోట్యాంకర్ అనే అతిపెద్ద విమానం మిస్సింగ్ అయింది. ఈ విమానం అమెరికా సైనిక కార్యకలాపాల్లో ఒక కీలకమైన ఆయుధం. ముఖ్యంగా ఫైటర్ జెట్‌లు, బాంబర్లు, ఇతర విమానాల్లో సామర్థ్యాన్ని పెంచడానికి గగనతలంలోనే ఇంధనం నింపడానికి ఉపయోగిస్తుంటారు. అలాంటి శక్తివంతమైన విమానం మిస్సింగ్ అయింది.

ఈ విమానం యునైటెడ్ అరబ్ ఎమిరేట్స్‌లోని అల్ ధఫ్రా వైమానిక స్థావరం నుంచి బయలుదేరింది. ఇరాన్ సమీప ప్రాంతాల్లో ఆపరేషన్లు నిర్వహించిన తర్వాత ఖతార్ వైపు మళ్లింది. కొద్దిసేపటికే విమానం ల్యాండింగ్ కోసం కిందికి దిగేందుకు ప్రయత్నించింది. ఈ క్రమంలో వృత్తాకారంలో కదులుతున్నట్లు ఫ్లైట్ ట్రాకింగ్ డేటా సూచించింది. అనంతరం 7700 ఎమర్జెన్సీ డిస్ట్రెస్ కోడ్‌ పంపించింది. ఈ కోడ్ విమానంలో అత్యవసర పరిస్థితిని సూచిస్తోంది. అనంతరం విమానంతో సంబంధాలు తెగిపోయాయి. అయితే విమానం ప్రమాదానికి గురైందా? లేదంటే ఎక్కడైనా ల్యాండింగ్ అయిందా? అన్నది క్లారిటీ రాలేదు. లేదంటే శత్రు చర్య ఏదైనా జరిగిందా? అన్నది ఇంకా నిర్ధారణకు రాలేదు.

ఫ్లైట్ ట్రాకింగ్ డేటా ప్రకారం.. విమానం కొంతసేపు గాల్లో చుట్టూ తిరిగిన తర్వాత దిగేందుకు ప్రయత్నించినట్లు తెలుస్తోంది. కానీ ఆ తర్వాత అకస్మాత్తుగా రాడార్ నుంచి మాయమైంది. ఈ ఘటనకు కారణం సాంకేతిక లోపమా? లేక శత్రు దాడా? అనే విషయం ఇంకా స్పష్టత రాలేదు. అమెరికా నుంచి కూడా ఇప్పటివరకు ఎలాంటి అధికారిక ప్రకటన వెలువడలేదు.

ఈ KC-135 స్ట్రాటోట్యాంకర్ విమానం అమెరికా సైన్యంలో అత్యంత కీలక ఆస్తిగా భావించబడుతుంది. ఇది ప్రధానంగా యుద్ధవిమానాలు, బాంబర్లకు గాల్లోనే ఇంధనం నింపే ‘ఫ్లయింగ్ గ్యాస్ స్టేషన్’గా పనిచేస్తుంది. అలాగే నౌకాదళం, మెరైన్ కార్ప్స్, మిత్ర దేశాలకు కూడా మద్దతు అందిస్తుంది. అవసరమైతే సిబ్బంది రవాణా, వైద్య సహాయం (ఎయిర్ అంబులెన్స్) కోసం కూడా ఉపయోగిస్తారు.

గతంలో కూడా ఇలాంటి ఘటన చోటుచేసుకుంది. ఈ ఏడాది మార్చిలో పశ్చిమ ఇరాక్‌లో జరిగిన దాడిలో ఇదే తరహా విమానం కూలిపోయినట్లు సమాచారం. ఆ దాడికి బాధ్యతను ఇస్లామిక్ రెసిస్టెన్స్ స్వీకరించింది. ప్రస్తుతం అదృశ్యమైన ఈ విమానం స్థితిగతులపై స్పష్టత లేకపోవడంతో ఆందోళన నెలకొంది. ఇది ప్రమాదమా? లేక దాడా? అన్నది తెలియాల్సి ఉంది. మధ్యప్రాచ్యంలో పరిస్థితులు మరింత ఉద్రిక్తంగా మారే అవకాశాలు కనిపిస్తున్నాయి.

 

US Military Fuel Tanker Vanishes Over Qatar After Declaring Emergency

A US Air Force Boeing KC-135 Stratotanker issued a 7700 distress signal while flying over the Persian Gulf near Iran, indicating an in-flight emergency. pic.twitter.com/5iXEV9PP3M

— Tasnim News Agency (@Tasnimnews_EN) May 5, 2026