US Defense Budget: ప్రపంచాన్ని వణికిస్తున్న అమెరికా డిఫెన్స్ బడ్జెట్.. షాక్‌కు గురి చేస్తున్న లక్షల కోట్లు!

US Defense Budget: ప్రపంచంలోనే అత్యంత శక్తివంతమైన దేశంగా కొనసాగుతున్న అమెరికా మరోసారి తన సైనిక ఆధిపత్యాన్ని ప్రపంచానికి చాటిచెప్పింది. తాజాగా అమెరికా ప్రతినిధుల సభ (US House of Representatives) 1.15 ట్రిలియన్ డాలర్ల (సుమారు రూ.111 లక్షల కోట్లు) భారీ రక్షణ బడ్జెట్‌కు ఆమోదం తెలిపింది. ఈ మొత్తం ప్రపంచంలోని దాదాపు 178 దేశాల వార్షిక స్థూల దేశీయోత్పత్తి (GDP) కంటే ఎక్కువగా ఉండటం విశేషం.

178 దేశాల ఆర్థిక వ్యవస్థల కంటే భారీ బడ్జెట్

ప్రపంచంలో దాదాపు 195 దేశాలు ఉండగా, అంతర్జాతీయ ద్రవ్య నిధి (IMF), ప్రపంచ బ్యాంకు గణాంకాల ప్రకారం కేవలం 17 దేశాల GDP మాత్రమే 1.15 ట్రిలియన్ డాలర్లను మించిపోయింది. అమెరికా, చైనా, భారత్, జపాన్, జర్మనీ, బ్రిటన్, ఫ్రాన్స్, ఇటలీ వంటి పెద్ద ఆర్థిక వ్యవస్థలు మాత్రమే ఈ జాబితాలో ఉన్నాయి. అంటే మిగిలిన సుమారు 178 దేశాలు ఏడాది మొత్తం సంపాదించే ఆర్థిక విలువ కంటే అమెరికా ఒక్క ఏడాదిలో తన రక్షణ రంగంపై ఎక్కువ ఖర్చు చేయబోతోంది.

పాకిస్థాన్ GDP కంటే మూడు రెట్లు ఎక్కువ
ఈ బడ్జెట్‌ను పాకిస్థాన్ ఆర్థిక వ్యవస్థతో పోల్చితే తేడా మరింత స్పష్టంగా కనిపిస్తుంది. పాకిస్థాన్ వ్యవసాయం, పరిశ్రమలు, ఐటీ, సేవా రంగాలు కలిపి ఒక ఏడాదిలో సృష్టించే మొత్తం GDP కంటే అమెరికా రక్షణ ఖర్చు దాదాపు మూడు రెట్లు ఎక్కువగా ఉంది. అంటే పాకిస్థాన్ ఏడాది మొత్తం ఆర్థిక కార్యకలాపాల విలువ కంటే అమెరికా తన సైన్యం, నౌకాదళం, వైమానిక దళం, అత్యాధునిక ఆయుధాల అభివృద్ధిపై మరింత భారీగా పెట్టుబడి పెడుతోంది. అమెరికా ఈ రికార్డు స్థాయి బడ్జెట్‌ను పలు కీలక రంగాలకు వినియోగించనుంది. ఇరాన్‌తో ఉద్రిక్తతలు, ఎర్ర సముద్ర భద్రత, మధ్యప్రాచ్యంలోని సైనిక కార్యకలాపాల కోసం ప్రత్యేక నిధులు. అలాగే ఇండో-పసిఫిక్ ప్రాంతంలో చైనా ప్రభావాన్ని ఎదుర్కొనేందుకు నౌకాదళం, క్షిపణి వ్యవస్థల ఆధునీకరణ. వీటితో పాటు కృత్రిమ మేధస్సు ఆధారిత డ్రోన్లు, సైబర్ వార్‌ఫేర్, హైపర్‌సోనిక్ క్షిపణుల అభివృద్ధికి ఈ భారీ పెట్టుబడులు పెట్టనున్నట్లు పేర్కొంది. అణు జలాంతర్గాములు, బాంబర్లు, అంతర్మహాద్వీప క్షిపణుల సామర్థ్యాన్ని మరింత పెంచడం.

ప్రపంచ రాజకీయాలపై ప్రభావం ఎలా ఉంటుంది..
అమెరికా రక్షణ వ్యయం పెరగడం వల్ల ప్రపంచ భద్రతా సమీకరణాల్లో కీలక మార్పులు చోటు చేసుకునే అవకాశం ఉందని అంటున్నారు. ముఖ్యంగా అమెరికా – చైనా మధ్య సైనిక పోటీ మరింత తీవ్రమయ్యే అవకాశముందని విశ్లేషకులు అభిప్రాయపడుతున్నారు. అలాగే మధ్యప్రాచ్యంలో పెరుగుతున్న సైనిక కార్యకలాపాలు ముడి చమురు ధరలు, సముద్ర వాణిజ్య మార్గాలపై ప్రభావం చూపే అవకాశం ఉందని నిపుణులు భావిస్తున్నారు. ఇండో-పసిఫిక్ ప్రాంతంలో వ్యూహాత్మక భాగస్వామ్యాన్ని మరింత బలోపేతం చేసేందుకు అమెరికా భారీ రక్షణ పెట్టుబడులు భారత్‌కు కూడా ప్రయోజనకరంగా మారే అవకాశం ఉంది. రక్షణ సాంకేతికత, ఆయుధ తయారీ, సంయుక్త సైనిక విన్యాసాల్లో రెండు దేశాల మధ్య సహకారం మరింత పెరిగే అవకాశాలు కనిపిస్తున్నాయి. అమెరికా ఈ భారీ బడ్జెట్ ద్వారా ప్రపంచంలో తన సైనిక ఆధిపత్యాన్ని కొనసాగించాలనే సంకల్పాన్ని స్పష్టంగా చాటుతోంది. చైనాలో పెరుగుతున్న సైనిక శక్తి, ఇరాన్‌తో కొనసాగుతున్న ఉద్రిక్తతలు, మధ్యప్రాచ్య భద్రత, భవిష్యత్ యుద్ధాల్లో AI వంటి సాంకేతికతల ప్రాధాన్యం దృష్ట్యా ఈ స్థాయి పెట్టుబడులు పెడుతున్నట్లు విశ్లేషకులు చెబుతున్నారు.