వెనిజులా అధ్యక్ష భవనంపై అమెరికా దాడి చేసి అధ్యక్షుడు నికోలస్ మదురో, అతని భార్యను కిడ్నాప్ చేసుకుని వెళ్లిపోయారు. నిమిషాల వ్యవధిలోనే అమెరికా ఆపరేషన్ ముగించేసింది. ఈ వ్యవహారం ప్రపంచ వ్యాప్తంగా పెను సంచలనం సృష్టించింది. వెనిజులా దగ్గర చైనా, రష్యా ఆయుధాలు ఉన్నాయి. అవి ఏ మాత్రం పని చేయలేదు. దీంతో ప్రపంచ వ్యాప్తంగా పెద్ద చర్చనీయాంశం అయింది. అయితే దీనికి కారణం అమెరికా రహస్య ఆయుధాన్ని ఉపయోగించిందని ప్రచారం జరిగింది. ఆ మధ్య ట్రంప్ కూడా ఒప్పుకున్నారు.
తాజాగా వెనిజులాపై ఉపయోగించిన సీక్రెట్ వెపన్ పేరును ట్రంప్ వెల్లడించారు. వెనిజులా సైన్యాన్ని నిర్వీర్యం చేసేందుకు అమెరికా ‘‘ది డిస్కాంబోబ్యులేటర్’’ ఆయుధాన్ని ఉపయోగించినట్లు చెప్పారు. శుక్రవారం న్యూయార్క్ పోస్ట్కు ఇచ్చిన ఇంటర్వ్యూలో ట్రంప్ ఈ వ్యాఖ్యలు చేశారు. ఆ యుధం కారణంగా కారకాస్లో దాదాపు అన్ని లైట్లను ఆర్పేసిందని.. అంతేకాకుండా ఆ ఆయుధం వెనిజులా ఆయుధాలు పని చేయకుండా చేసిందని వివరించారు. ఇంతకు మంచి ఆ ఆయుధం గురించి ఇంకేమి చెప్పబోనని పేర్కొన్నారు. దాని గురించి ఎక్కువ మాట్లాడదల్చుకోలేదు. తమ సైన్యం ఎలా విజయం సాధించగలిగిందో వివరించలేనని చెప్పుకొచ్చారు. అయితే ‘డిస్కాంబోబ్యులేటర్ గురించి మాట్లాడటానికి నాకు అనుమతి లేదు.’’ అని ట్రంప్ పేర్కొన్నారు. అయితే ఆ ఆయుధం వెనిజులా పరికరాలను పనిచేయకుండా చేసిందని తెలిపారు.
వెనిజులా దగ్గర రష్యా, చైనా రాకెట్లు ఉన్నాయని.. కానీ ఒక్కటి కూడా ప్రయోగించలేకపోయారని.. తమ సైన్యం వెనిజులాలోకి ప్రవేశించగానే వారు బటన్లు నొక్కినప్పుడు ఏమీ పని చేయలేదని.. అప్పటికే వారంతా సిద్ధంగా ఉన్నారని చెప్పారు. తమ సైన్యం దాడులు కొనసాగుతాయని.. మాదకద్రవ్యాల కార్టెల్లను లక్ష్యంగా చేసుకోవడానికి ప్రయత్నిస్తున్నందున దక్షిణ అమెరికా నుంచి ఉత్తర అమెరికాకు విస్తరించవచ్చని ట్రంప్ సూచించారు. ‘‘మాకు వారి మార్గాలు తెలుసు. వారి గురించి మాకు అన్నీ తెలుసు. వారి ఇళ్లు మాకు తెలుసు. వారి గురించి మాకు అన్నీ తెలుసు.’’ అని ట్రంప్ అన్నారు.
ఇక వెనిజులా ప్రతిపక్ష నాయకురాలు మచాడో అందజేసిన నోబెల్ శాంతి బహుమతిని ఎక్కడ పెట్టాలో ఆలోచిస్తున్నామని.. ప్రస్తుతం ఓవల్ కార్యాలయంలోని విగ్రహానికి ఆనుకుని ఉందని చెప్పారు.