Houthi vs Saudi: సౌదీ అరేబియా- హౌతీల మధ్య ఘర్షణ మధ్యప్రాచ్యంలో ఉద్రిక్తత పెంచుతోంది. అయితే, ఈ ఉద్రిక్తతల వేళ పాకిస్తాన్ మత గురువు, ఉలేమా కౌన్సిల్ చైర్మన్ హఫీజ్ తాహిర్ అష్రఫీ సంచలన వ్యాఖ్యలు చేశారు. ఇరాన్ మద్దతు ఉన్న హౌతీ సంస్థను టెర్రిరస్టులని, ఇస్లాంతో వారికి సంబంధం లేదని పేర్కొన్నారు. సౌదీ అరేబియాకు వ్యతిరేకంగా నిలిచే వారిని ఎదుర్కోవడంతో ముస్లింలు, ముఖ్యంగా పాకిస్తాన్ సౌదీకి అండగా నిలవాలని పిలుపునిచ్చారు. మదీనాలో జరిగిన అంతర్జాతీయ సదస్సులో అష్రఫీ ఈ వ్యాఖ్యలు చేశారు.
హౌతీలు ఇస్లాంకు సంబంధం లేని టెర్రరిస్టులు అని, సౌదీకి వ్యతిరేకంగా పనిచేస్తున్న శత్రువులకు వారు మద్దతుగా ఉన్నారని ఆరోపించారు. మక్కా, మదీనాలపై దాడులు చేయడాన్ని తీవ్రంగా ఖండదించారు. యెమెన్ ప్రజలకు సౌదీ భారీగా సాయం చేసినప్పటికీ హౌతీలు దానిని తిరస్కరించారని ఆరోపించారు. సౌదీకి పాకిస్తాన్ అండగా ఉంటుందని చెప్పారు. ప్రభుత్వంతో పాటు పాక్ సైన్యం, మతపెద్దలు, ప్రజలు వారికి మద్దతుగా ఉంటారని అన్నారు.
ఇటీవల హౌతీల దాడులు సౌదీపై తీవ్రమయ్యాయి. ఈ నేపథ్యంలో పాకిస్తాన్-సౌదీ అరేబియా-టర్కీల ‘‘మక్కా జాయింట్ అగ్రిమెంట్’’ విఫలమైంది. ఈ దేశాలు సౌదీకి కేవలం మాటలతో మాత్రమే అండగా నిలిచాయి. ఇలాంటి పరిస్థితుల్లో పాక్ మతపెద్ద అష్రఫీ చేసిన వ్యాఖ్యలు చర్చనీయాంశంగా మారాయి.