Pete Hegseth: ప్రతిపక్షానికి ఎదురుదెబ్బ.. పీట్ హెగ్సెత్‌పై అభిశంసన ప్రయత్నం విఫలం.. ట్రంప్ సంచలన వ్యాఖ్యలు

Pete Hegseth Survives Impeachment Challenge: అమెరికా రక్షణ శాఖ మంత్రి పీట్ హెగ్సెత్‌పై అభిశంసన చేపట్టాలన్న ప్రయత్నం ప్రతినిధుల సభలో తాత్కాలికంగా నిలిచిపోయింది. 211-204 స్వల్ప ఓట్ల తేడాతో అభిశంసన తీర్మానాన్ని సంబంధిత కమిటీకి పంపేందుకు సభ్యులు అంగీకరించారు. దీంతో ఈ తీర్మానంపై వెంటనే సభలో చర్చ లేదా ప్రత్యక్ష ఓటింగ్ జరగకుండా అడ్డుకట్ట పడింది. మధ్యంతర ఎన్నికల్లో పార్టీకి ఎదురైన నిరాశాజనక ఫలితాల తర్వాత రిపబ్లికన్ నాయకత్వం ఐక్యతను ప్రదర్శించినట్లు ఈ పరిణామం భావిస్తున్నారు. హౌస్ రిపబ్లికన్ నాయకులు, వైట్ హౌస్ ఉన్నతాధికారులతో కలిసి ఈ అభిశంసన ప్రయత్నాన్ని అడ్డుకునేందుకు మద్దతును సమీకరించినట్లు నివేదికలు వెల్లడించాయి.

థామస్ మాస్సీ ప్రవేశపెట్టిన తీర్మానం

రిపబ్లికన్ ప్రతినిధి థామస్ మాస్సీ, పీట్ హెగ్సెత్‌పై ఎనిమిది అభిశంసన అభియోగాలతో కూడిన ప్రత్యేక తీర్మానాన్ని ప్రవేశపెట్టారు. ఇరాన్, యెమెన్‌పై కాంగ్రెస్ అనుమతి లేకుండా సైనిక దాడులకు అనుమతి ఇవ్వడం ద్వారా అమెరికా రాజ్యాంగం, అలాగే వార్ పవర్స్ చట్టాన్ని ఉల్లంఘించారని ఆయన ఆరోపించారు. అదేవిధంగా, వెనిజులా అధ్యక్షుడు నికోలాస్ మదురోను పట్టుకునేందుకు దారితీసిన ఆపరేషన్ పర్యవేక్షణలో హెగ్సెత్ పాత్ర కూడా ఈ తీర్మానంలో ప్రస్తావించారు. అయితే, తీర్మానాన్ని కమిటీకి పంపడంతో అభిశంసన ప్రక్రియ ప్రస్తుతం ముందుకు సాగకుండా నిలిచిపోయింది.

అభిశంసన ప్రయత్నం పూర్తిగా ముగిసిందా?

ప్రస్తుత ఓటింగ్ అభిశంసన ప్రయత్నాన్ని పూర్తిగా ముగించకపోవచ్చని రాజకీయ విశ్లేషకులు భావిస్తున్నారు. జనవరిలో డెమోక్రాట్లు హౌస్, సెనేట్‌పై నియంత్రణ సాధించే అవకాశం ఉన్న నేపథ్యంలో, భవిష్యత్తులో ఈ అంశం మళ్లీ తెరపైకి రావచ్చని భావిస్తున్నారు.

పీట్ హెగ్సెత్‌పై అభిశంసన ప్రయత్నం విఫలమైన తర్వాత అధ్యక్షుడు డొనాల్డ్ ట్రంప్ స్పందించారు. డెమోక్రాట్ల ప్రయత్నం “ఘోరంగా విఫలమైంది” అంటూ ఆయన వ్యాఖ్యానించారు. ఓటింగ్ అనంతరం తన సోషల్ మీడియా వేదిక ట్రూత్ సోషల్ ద్వారా స్పందించిన ట్రంప్, హెగ్సెత్‌కు మద్దతుగా రిపబ్లికన్ పార్టీ ఐక్యంగా నిలబడిందని ప్రశంసించారు. అదే సమయంలో అభిశంసన తీర్మానాన్ని ప్రవేశపెట్టిన రిపబ్లికన్ ప్రతినిధి థామస్ మాస్సీపై తీవ్ర విమర్శలు చేశారు. హెగ్సెత్‌కు మద్దతుగా ప్రతి రిపబ్లికన్ సభ్యుడు ఓటు వేశారని, మాస్సీ మాత్రమే భిన్నంగా వ్యవహరించారని ట్రంప్ పేర్కొన్నారు.

పెంటగాన్ పనితీరుపై ట్రంప్ ప్రశంసలు

పెంట్‌గాన్‌లో హెగ్సెత్ పనితీరును కూడా ట్రంప్ ప్రశంసించారు. విదేశాల్లో సైనిక విజయాలు, సాయుధ దళాల్లో రిక్రూట్‌మెంట్ పెరగడం వంటి అంశాలను ఆయన ప్రస్తావించారు. వెనిజులా, ఇరాన్‌కు సంబంధించిన సైనిక విజయాలు, సైన్యంలో చేరేందుకు పెరుగుతున్న ఆసక్తి హెగ్సెత్ నాయకత్వానికి నిదర్శనమని ట్రంప్ అభిప్రాయపడ్డారు.

రాజకీయంగా మరో కీలక ఘట్టం

ఈ ఓటింగ్ అమెరికా రాజకీయాల్లో మరో కీలక పరిణామంగా మారింది. ప్రస్తుతం అభిశంసన ప్రయత్నాన్ని అడ్డుకున్నప్పటికీ, భవిష్యత్తులో కాంగ్రెస్‌లో రాజకీయ సమీకరణాలు మారితే ఈ అంశం మళ్లీ చర్చకు వచ్చే అవకాశం ఉంది.