Israeli-Lebanon: లెబనాన్‌పై ఇజ్రాయెల్ దాడి.. 12 మంది మృతి

దక్షిణ లెబనాన్‌పై మరోసారి బాంబ్ దాడులు దద్దరిల్లాయి. ఇజ్రాయెల్ జరిపిన వైమానిక దాడుల్లో కనీసం 12 మంది ప్రాణాలు కోల్పోయారు. మృతుల్లో ఇద్దరు చిన్నారులు, నలుగురు మహిళలు ఉన్నట్లు లెబనాన్ ఆరోగ్య మంత్రిత్వ శాఖ వెల్లడించింది. క్ఫార్ రౌమ్మానే ప్రాంతంలో జరిగిన రెండు వేర్వేరు దాడుల్లో ఈ మరణాలు సంభవించాయి. మరోవైపు ఈ దాడుల్లో ఒక పారామెడిక్ కూడా ప్రాణాలు కోల్పోయినట్లు అధికారులు తెలిపారు.

ఇజ్రాయెల్ సైన్యం మాత్రం దక్షిణ లెబనాన్‌లోని హిజ్బుల్లాకు చెందిన మౌలిక వసతులపై, ఆయుధాలను తరలిస్తున్న పలువురు ఉగ్రవాదులపై దాడులు చేసినట్లు తెలిపింది. తమ సైనికులపై ఆక్రమిత ప్రాంతం నుంచి డ్రోన్ దాడి జరిగిన నేపథ్యంలో ప్రతీకార చర్యగా ఈ దాడులు చేపట్టినట్లు పేర్కొంది. గత మూడు రోజుల్లో దక్షిణ లెబనాన్‌లో ఇజ్రాయెల్ జరిపిన దాడుల్లో కనీసం 27 మంది మరణించినట్లు లెబనాన్ ఆరోగ్య మంత్రిత్వ శాఖ తెలిపింది.

దాడుల తీవ్రత పెరుగుతుండటంపై లెబనాన్ అధ్యక్షుడు జోసెఫ్ అవున్ ఆందోళన వ్యక్తం చేశారు. ఈ “ప్రమాదకరమైన ఉద్రిక్తత” జూన్‌లో అమెరికా మధ్యవర్తిత్వంతో కుదిరిన కాల్పుల విరమణ ఒప్పందాన్ని ప్రమాదంలోకి నెడుతోందని అన్నారు. దాడులను నిలిపివేయడానికి ఇజ్రాయెల్‌పై ఒత్తిడి తీసుకురావాలని అంతర్జాతీయ సమాజాన్ని కోరారు.

తాజా దాడుల్లో ప్రధానంగా క్ఫార్ రౌమ్మానే ప్రాంతం లక్ష్యంగా మారింది. నబాతియే జిల్లాలోని ఈ ప్రాంతం ఇజ్రాయెల్ సైన్యం ప్రకటించిన “సెక్యూరిటీ జోన్”కు కేవలం కొన్ని వందల మీటర్ల దూరంలో ఉంది. అర్ధరాత్రి దాటిన కొద్దిసేపటికే షుయుయా రౌండ్అబౌట్ సమీపంలోని మూడు అంతస్తుల నివాస భవనంపై వైమానిక దాడి జరిగింది. ఈ దాడిలో భవనం పూర్తిగా ధ్వంసమైంది. 11 మంది మరణించగా.. ఎనిమిది మంది గాయపడ్డారు. గాయపడిన వారిలో ముగ్గురు చిన్నారులు, ఇస్లామిక్ హెల్త్ అసోసియేషన్‌కు చెందిన ఓ పారామెడిక్ ఉన్నారు.

ఇదే సమయంలో పారామెడిక్స్ ప్రయాణిస్తున్న ఓ వాహనంపై మరో దాడి జరిగింది. ఇందులో ఒక పారామెడిక్ మృతి చెందగా.. మరో ఇద్దరు గాయపడ్డారు. ఈ సిబ్బంది హిజ్బుల్లాతో అనుబంధం ఉన్న అత్యవసర సేవా సంస్థకు చెందినవారని లెబనాన్ ఆరోగ్య మంత్రిత్వ శాఖ తెలిపింది.

క్ఫార్ రౌమ్మానేకు చెందిన 35 ఏళ్ల సారా ముఅల్లెమ్.. దాడుల భయానక పరిస్థితిని వివరించారు. తన ఐదుగురు పిల్లలతో కలిసి ఇంట్లో నిద్రిస్తున్న సమయంలో పేలుళ్ల శబ్దాలు వినిపించాయని తెలిపారు. వెంటనే పిల్లలను తీసుకుని ఇంట్లోని “సేఫ్ రూమ్”లోకి వెళ్లి.. పేలుళ్లు, సైరన్ల శబ్దాలు ఆగే వరకు అక్కడే ఉన్నట్లు చెప్పారు. దాడుల్లో మరణించిన వారిలో తన భర్తకు దూరపు బంధువులు కూడా ఉన్నారని తెలిపారు. వారు సాధారణ పౌరులేనని, హిజ్బుల్లాతో ఎలాంటి సంబంధం లేదని ఆమె పేర్కొన్నారు. పిల్లల భద్రత కోసం తీర ప్రాంత నగరమైన సిడాన్‌కు వెళ్లాలని నిర్ణయించుకున్నట్లు సారా తెలిపారు. రాత్రి సమయాల్లో పరిస్థితులు మరింత ఉద్రిక్తంగా మారుతున్నాయని, పిల్లలు భయపడుతున్నారని ఆవేదన వ్యక్తం చేశారు.

ఇజ్రాయెల్ సైన్యం ఏమంటోంది?

ఇజ్రాయెల్ డిఫెన్స్ ఫోర్సెస్ (IDF) ప్రకారం.. దక్షిణ లెబనాన్‌లో హిజ్బుల్లాకు చెందిన పలు మౌలిక వసతుల ప్రాంతాలను లక్ష్యంగా చేసుకుని రాత్రిపూట దాడులు జరిగాయి. ఇజ్రాయెల్ సైనికులు ఉన్న అలీ అల్-తాహెర్ రిడ్జ్ ప్రాంతం వైపు హిజ్బుల్లా రెండు పేలుడు డ్రోన్లను ప్రయోగించిన తర్వాత ఈ చర్యలు చేపట్టినట్లు IDF తెలిపింది. అలాగే క్ఫార్ రౌమ్మానే ప్రాంతంలో ఆయుధాలను తరలిస్తున్న పలువురిని గుర్తించి వారిపై దాడి చేసినట్లు ఇజ్రాయెల్ సైన్యం పేర్కొంది. దాడుల్లో “సంబంధం లేని పలువురు వ్యక్తులు గాయపడ్డారనే లేదా మరణించారనే ఆరోపణలను పరిశీలిస్తున్నట్లు” IDF తెలిపింది. ఆదివారం కూడా నబాతియే ప్రాంతంలో జరిగిన వేర్వేరు దాడుల్లో పలువురు హిజ్బుల్లా సభ్యులను హతమార్చినట్లు ఇజ్రాయెల్ సైన్యం వెల్లడించింది.

ఆదివారం మరో 11 మంది మృతి

ఆదివారం దక్షిణ లెబనాన్‌లో జరిగిన ఇజ్రాయెల్ దాడుల్లో మరో 11 మంది మరణించినట్లు లెబనాన్ ఆరోగ్య మంత్రిత్వ శాఖ తెలిపింది. వీరిలో క్ఫార్ రౌమ్మానేకు దక్షిణంగా ఉన్న నబాతియే అల్-ఫౌకా ప్రాంతంలో తొమ్మిది మంది, గ్రామానికి ఉత్తరంగా ఉన్న అరబ్ సలీమ్ ప్రాంతంలో ఇద్దరు మహిళలు ఉన్నారు. ఈ దాడులపై హిజ్బుల్లా నుంచి వెంటనే ఎలాంటి స్పందన రాలేదు. అయితే ఆ సంస్థకు చెందిన ఎంపీ అలీ అమ్మర్ ఆదివారం మాట్లాడుతూ.. ఇజ్రాయెల్‌కు వ్యతిరేకంగా “ప్రతిఘటన భాషే సమర్థవంతమైన ఏకైక భాష” అని వ్యాఖ్యానించారు.

కాల్పుల విరమణ ఒప్పందం ఏం చెబుతోంది?

లెబనాన్, ఇజ్రాయెల్, అమెరికా మధ్య కుదిరిన కాల్పుల విరమణ ఒప్పందం ప్రకారం హిజ్బుల్లా ఆయుధాలను విడిచిపెట్టాలి. దక్షిణ లెబనాన్ నుంచి ఇజ్రాయెల్ సైన్యం క్రమంగా వెనక్కి వెళ్లాలి. అదే సమయంలో ఆ ప్రాంతంలో లెబనాన్ సైన్యం మోహరించాలి. అయితే ఈ ప్రతిపాదనను హిజ్బుల్లా వ్యతిరేకిస్తోంది. ఇజ్రాయెల్ ఉపసంహరణను హిజ్బుల్లా నిరాయుధీకరణతో ముడిపెట్టడం తమ “అన్ని హద్దులను దాటిన” అంశమని ఆ సంస్థ పేర్కొంది.

యుద్ధంలో ఇప్పటివరకు వేలాది మంది మృతి

ఇజ్రాయెల్, అమెరికా, ఇరాన్ మధ్య యుద్ధంలో మార్చి 2న లెబనాన్ కూడా భాగమైంది. ఇరాన్ మద్దతు ఉన్న హిజ్బుల్లా.. ఇరాన్ సుప్రీం లీడర్‌ను హతమార్చిన దాడికి ప్రతీకారంగా ఇజ్రాయెల్‌పై రాకెట్లను ప్రయోగించింది. అనంతరం ఇజ్రాయెల్ లెబనాన్ అంతటా బాంబు దాడులు ప్రారంభించడంతో పాటు దేశంలోని దక్షిణ ప్రాంతంలోని గణనీయమైన భూభాగంలోకి తన సైన్యాన్ని పంపింది. ఈ ఘర్షణల్లో ఇప్పటివరకు లెబనాన్‌లో కనీసం 4,362 మంది మరణించినట్లు ఆ దేశ ఆరోగ్య మంత్రిత్వ శాఖ తెలిపింది. మృతుల్లో 395 మంది మహిళలు, 259 మంది చిన్నారులు ఉన్నారు. అయితే ఈ గణాంకాల్లో సాధారణ పౌరులు, సాయుధ పోరాటదారులను వేర్వేరుగా చూపించలేదు. ఇక ఈ ఘర్షణల్లో తమ దేశానికి చెందిన 40 మంది సైనికులు, నలుగురు పౌరులు మరణించినట్లు ఇజ్రాయెల్ అధికారులు తెలిపారు.