US-Iran Deal: యురేనియం వదులుకోవడానికి ఇరాన్ సిద్ధం..!

US-Iran Deal: అమెరికా, ఇరాన్ మధ్య కొనసాగుతున్న ఉద్రిక్తతలు తగ్గే అవకాశాలు కనిపిస్తున్నాయి. ఇరు దేశాల మధ్య డీల్ కుదిరే ఛాన్స్ ఉంది. ఇప్పటికే, దాదాపుగా డీల్ పూర్తయిందని అమెరికా అధ్యక్షుడు డొనాల్డ్ ట్రంప్ అన్నారు. ఇదిలా ఉంటే, రెండు దేశాల మధ్య చర్చల్లో ప్రతిష్టంభనకు కారణమైన ‘‘యురేనియం’’పై ఇరాన్ కీలక నిర్ణయం తీసుకున్నట్లు తెలుస్తోంది. ఎన్ రిచ్డ్ యురేనియం నిల్వల్ని వదులుకోవడానికి సిద్ధమైనట్లు తెలుస్తోంది. ఈమేరకు అమెరికన్ మీడియా నివేదిస్తోంది.

ప్రతిపాదిత ఒప్పందం ప్రకారం ఇరాన్ తన ఎన్‌రిచ్డ్ యురేనియాన్ని అమెరికాకు కానీ, అంతర్జాతీయ ఏర్పాటు ద్వారా గానీ అప్పగించేందుకు అంగీకరించిందని అమెరికా అధికారులు పేర్కొన్నారు. అయితే, ఈ యురేనియాన్ని నేరుగా అమెరికాకు అప్పగిస్తారా లేక రష్యాకు పంపుతారా లేక తక్కువ ఎన్‌రిచ్డ్ స్థాయికి మారస్తారా? అనేది స్పష్టత రాలేదు. ఇదిలా ఉంటే హార్ముజ్ జలసంధిపై హక్కుల కోెసం ఇరాన్ డిమాండ్ చేస్తున్నట్లు తెలుస్తోంది.

గతంలో చర్చల్లో భాగంగా యురేనియం అప్పగించేందుకు ఇరాన్ సిద్ధపడలేదు. ఇరాన్ సుప్రీంలీడర్ మొజ్తబా ఖమేనీ ఒక సందేశంలో, యురేనియాన్ని ఇరాన్ వదులుకోదని చెప్పారు. కానీ ఇప్పుడు ఈ విషయంపై మెత్తపడినట్లు తెలుస్తోంది. అంతర్జాతీయ అణుశక్తి సంస్థ ప్రకారం, ఇరాన్ వద్ద 60 శాతం వరకు సుసంపన్నం చేయబడిన సుమారు 970 పౌండ్ల యురేనియం ఉంది. అణ్వాయుధాన్ని అభివృద్ధి చేయడానికి ఈ స్థాయి కీలకమని నిపుణులు భావిస్తున్నారు.