పాకిస్థాన్కు ‘గులాబ్’ ముప్పు..!
బంగాళాఖాతంలో ఏర్పడిన గులాబ్ తుఫాన్ ప్రస్తుతం ఆరేబియా సముద్రంలో కేంద్రీకృతమై తుఫాన్గా మారి సెప్టెంబర్ 30న పాకిస్థాన్ వైపుగా దూసుకోస్తోందని భారత వాతావరణ శాఖ తెలిపింది. ఈ గులాబ్ తుఫాన్ కళింగపట్నం- గోపాలపూర్ మధ్య తీరం దాటినప్పటికీ దాని ప్రభావం ఇంకా భారత్లో కొన్నిప్రాంతాల్లో అక్కడక్కడ కొనసాగుతోంది. ఈ అల్పపీడనం గుజరాత్ దిశగా రావడంతో గుజరాత్లోనూ పక్కనే ఉన్నఖంభాట్ గల్ఫ్లోనూ ఒక మోస్తారుగా భారీ వర్షాలు పడే అవకాశం ఉందని వాతావరణ శాఖ వెల్లడించింది.
ఈ క్రమంలో ఇది పశ్చిమ-వాయువ్య దిశగా కదులుతూ, ఈశాన్య అరేబియా సముద్రంలోకి ఉద్భవించి, గురువారం నాటికి అల్పపీడనంగా మారే అవకాశం ఉందని పేర్కొంది. ఆ తర్వాత అది పశ్చిమ-వాయువ్య దిశగా కదిలి 24 గంటల్లో తుపానుగా మారే అవకాశం ఉందని వివరించింది. ఈ మేరకు పశ్చిమ తీరం నుంచి పశ్చిమ వాయువ్య దిశలో ఉన్న పాకిస్థాన్ మక్రాన్ తీరాలకు వెళ్లే అవకాశం ఉందని పేర్కొంది. అయితే భారత తీరం నుంచి మాత్రం దూరంగా వెళుతుందని వాతావరణ శాఖ వెల్లడించింది. ఈ గులాబ్ తుఫాన్ ప్రభావంగా తెలుగు రాష్ట్రాల్లో భారీ నుంచి అతి భారీ వర్షాలు పడిన సంగతి తెలిసిందే. మరోవైపు.. వాయవ్య బంగాళాఖాతం, దానిని ఆనుకుని ఉన్న పశ్చిమ బెంగాల్ తీరంలో మరో అల్పపీడనం ఏర్పడే అవకాశం ఉంది. రానున్న 24 గంటల్లో బలపడనుందని వాతావరణ కేంద్రం తెలిపింది. దీని ప్రభావం వల్ల రానున్న 48 గంటల్లో తెలుగు రాష్ట్రల్లోని పలు ప్రాంతాల్లో ఉరుములు, మెరుపులతో కూడిన వర్షాలు కురిసే అవకాశం ఉంది.