LPG Cylinder Price: భారీగా పెరిగిన గ్యాస్ ధరలు.. 19 కిలోల వాణిజ్య LPG సిలిండర్ ధర రూ. 993 పెంపు

భారతదేశంలో వాణిజ్య (కమర్షియల్) LPG సిలిండర్ల ధరలు మళ్లీ పెరిగాయి. 19 కేజీల వాణిజ్య LPG సిలిండర్ ధర రూ.993 పెరిగింది. దీంతో ఢిల్లీలో ఇప్పుడు రూ.3,071.50కి చేరుకుంది. ఈ పెరుగుదల ప్రధానంగా అంతర్జాతీయ మార్కెట్‌లో క్రూడ్ ఆయిల్ ధరలు పెరగడం, మధ్యప్రాచ్యంలో (వెస్ట్ ఏషియా) జరుగుతున్న సంఘర్షణలు, హార్మూజ్ స్ట్రెయిట్‌లో సరఫరా సమస్యల వల్ల సంభవించింది. ఇండియన్ ఆయిల్ కార్పొరేషన్ (IOC), భారత్ పెట్రోలియం (BPCL), హిందుస్థాన్ పెట్రోలియం (HPCL) వంటి పబ్లిక్ సెక్టర్ ఆయిల్ కంపెనీలు ఈ ధరలను నిర్ణయిస్తాయి.

ఇది హోటళ్లు, రెస్టారెంట్లు, చిన్న వ్యాపారాలు, క్యాటరింగ్ సర్వీసెస్ వంటి వాణిజ్య వినియోగదారులపై భారీ ప్రభావం చూపుతుంది. 14.2 కేజీ గృహావసరాల LPG ధరలు (డొమెస్టిక్) ఈసారి మార్పు లేదు. ఎల్పీజీ సిలిండర్‌ ధరల్లో మార్పులు లేవని కేంద్రం స్పష్టం చేసింది. (ఢిల్లీలో సుమారు రూ.913 వద్ద స్థిరంగా ఉంది). ఈ ధరల పెరుగుదల వల్ల హోటల్ ఫుడ్ ధరలు, రెస్టారెంట్ బిల్లులు పెరగవచ్చని ఆందోళన వ్యక్తమవుతోంది. అయితే, వినియోగదారుల సంక్షేమం కోసం ప్రభుత్వం డొమెస్టిక్ సిలిండర్లపై సబ్సిడీని కొనసాగిస్తోంది.