Bigg Boss 10 Telugu: బిగ్‌బాస్ హౌస్‌లో రోహిత్ నాయుడికి దెబ్బ మీద దెబ్బ.. వరుస ఓటములు..

బిగ్ బాస్ తెలుగులో సామాన్యులకు అవకాశం కల్పించేందుకు నిర్వహించిన ‘అగ్నిపరీక్ష 2’ ద్వారా రోహిత్ నాయుడు హౌస్‌లోకి ఎంట్రీ సాధించాడు. టాస్క్‌లు, ఫిజికల్ పర్ఫార్మెన్స్ పరంగా నంబర్ 1 కంటెస్టెంట్‌గా నిలిచి భారీ ఫ్యాన్ ఫాలోయింగ్‌ను సంపాదించుకోవడంతో జ్యూరీ సభ్యులు అతడిని ప్రధాన బిగ్ బాస్ హౌస్‌లోకి పంపించారు. అయితే, హౌస్‌లోకి అడుగుపెట్టిన వెంటనే అతనికి అనుకోని ఎదురుదెబ్బ తగిలింది. సినీ హీరో కృష్ణుడు భాగస్వామిగా సాగిన ‘మ్యాజిక్ కీ’ టాస్క్‌లో రోహిత్ ఓడిపోవడంతో ఆ కీ ద్వారా వచ్చే ప్రత్యేక ప్రయోజనాలను కోల్పోయాడు.

మరోవైపు, అగ్నిపరీక్షలో రోహిత్ సాధించిన విజయాన్ని చూసి హౌస్‌లోని కొందరు సెలబ్రిటీలు అతడిని టార్గెట్ చేస్తున్నట్లు లైవ్ షో ద్వారా స్పష్టమవుతోంది. ముఖ్యంగా ‘చెన్నై లవ్ స్టోరీ’ ఫేమ్ త్రిగుణ్ అనవసర వాదనలకు దిగుతూ ఇతరులలో కూడా రోహిత్ పై ప్రతికూల అభిప్రాయం కలిగిస్తున్నాడు. హీరో కృష్ణుడు సైతం “నీకు లీడర్‌ననే అహంకారం ఎక్కువైంది” అని కామెంట్ చేయడం వివాదాస్పదమైంది. సెలబ్రిటీలంతా కలిసి ఒక సామాన్యుడిని టార్గెట్ చేయడంపై నెటిజన్లు తీవ్రంగా స్పందిస్తుండటంతో, ప్రేక్షకుల్లో రోహిత్ పట్ల సానుభూతి మరింత పెరుగుతోంది.

అయితే, బయట ఉన్న ఆదరణకు భిన్నంగా హౌస్ లోపల టాస్క్‌లలో రోహిత్ తడబడుతున్నాడు. కంటెస్టెంట్లను రెండు టీమ్‌లుగా విభజించగా రెడ్ టీమ్‌కు రోహిత్, బ్లూ టీమ్‌కు జబర్దస్త్ రాంప్రసాద్ లీడర్లుగా వ్యవహరించారు. సోషల్ మీడియా లీక్స్ ప్రకారం, రోహిత్ నాయకత్వం వహించిన రెడ్ టీమ్ ఓడిపోవడమే కాకుండా, ఆ గేమ్ నుండి వారి టీమ్ సభ్యుడు చరణ్ కూడా బయటకు వెళ్లిపోయాడు.

ఒకవైపు సెలబ్రిటీల టార్గెట్లు, విమర్శలు, మరోవైపు మొదటి ముఖ్యమైన గేమ్‌లోనే ఓటమి చెందడంతో రోహిత్ మానసిక ఒత్తిడికి గురవుతున్నాడు. ఈ నేపథ్యంలో రోహిత్ అగ్నిపరీక్షలో చూపించిన సత్తాను, ఫిజికల్ స్ట్రెంత్‌ను బిగ్ బాస్ హౌస్‌లో మళ్లీ చూపిస్తూ విమర్శకులకు బలమైన సమాధానం చెప్పాలని అతడి అభిమానులు కోరుకుంటున్నారు. అంతేకాకుండా, సెలబ్రిటీల మాటలకు లేదా రెచ్చగొట్టే వ్యాఖ్యలకు ప్రభావితం కాకుండా ప్రశాంతంగా ఉంటూ మైండ్ గేమ్ ప్లాన్‌ను మార్చుకోవాలని, ఒత్తిడికి గురికాకుండా టీమ్‌ను సమర్థవంతంగా నడిపిస్తూ తదుపరి టాస్క్‌లలో విజయం సాధించి మళ్లీ ఫామ్‌లోకి రావాలని సోషల్ మీడియా వేదికగా తమ అభిప్రాయాలను వ్యక్తపరుస్తున్నారు.