Maruti Suzuki: బిగ్ అలర్ట్.. కారు కొనాలనుకుంటే ఇప్పుడే కొనేయండి.. భారీగా పెరగనున్న ధరలు..

Maruti Suzuki: కార్ల కొనుగోలుదారులకు దేశీయ ఆటోమొబైల్ దిగ్గజం మారుతి సుజుకి మళ్లీ షాక్ ఇచ్చేందుకు సిద్ధమైంది. ఆగస్టు 2026 నుంచి తన అన్ని మోడళ్ల ధరలను రూ. 30,000 వరకు పెంచుతున్నట్లు కంపెనీ సంచలన ప్రకటన చేసింది. గతేడాది జూన్‌లోనే ధరలను పెంచిన మారుతి, అతి స్వల్ప వ్యవధిలోనే మళ్లీ ఈ నిర్ణయం తీసుకోవడం ఆటోమొబైల్ వర్గాల్లో తీవ్ర చర్చనీయాంశంగా మారింది. వాహనాల తయారీకి అయ్యే ఇన్ పుట్ ఖర్చులు, ముడిసరుకుల ధరలు నిరంతరం పెరుగుతుండటమే ఈ నిర్ణయానికి ప్రధాన కారణమని కంపెనీ తెలిపింది.

ధరల పెంపుపై స్పందించిన మారుతి సుజుకి, పెరిగిన ఉత్పత్తి వ్యయాన్ని తగ్గించుకోవడానికి ఇప్పటికే ఎన్నో రకాల అంతర్గత పొదుపు చర్యలు చేపట్టినట్లు వెల్లడించింది. అయినప్పటికీ, కమోడిటీ ద్రవ్యోల్బణం తీవ్రంగా ఉండటంతో కంపెనీ లాభాల మార్జిన్లపై తీవ్ర ప్రభావం పడుతోందని, అందువల్లే తప్పనిసరి పరిస్థితుల్లో పెరిగిన భారంలో కొంత భాగాన్ని వినియోగదారులపై వేయాల్సి వస్తోందని రెగ్యులేటరీ ఫైలింగ్‌లో స్పష్టం చేసింది. ఈ ధరల పెంపు నిర్ణయం కేవలం మారుతి సుజుకికే పరిమితం కాలేదు. గత కొన్ని వారాలుగా ముడిసరుకుల ధరల్లో వస్తున్న హెచ్చుతగ్గుల వల్ల ఆటోమొబైల్ రంగమంతా ఇదే దారిలో పయనిస్తోంది. మహీంద్రా, బీవైడీ, టాటా మోటార్స్ వంటి ఇతర దిగ్గజ కంపెనీలు కూడా ఇప్పటికే తమ వాహనాల ధరలను సవరించాయి. కాగా, ఇటీవల బీవైడీ టాంగ్ కారు వెనుక మోటార్ విడిపోయిన ఘటనపై ఆ సంస్థ స్పందిస్తూ అండర్‌బాడీకి తీవ్రమైన దెబ్బ తగలడం వల్లే అలా జరిగిందని వివరణ ఇచ్చిన విషయాన్ని కూడా ఇక్కడ గమనించవచ్చు.

మారుతి సుజుకి లైనప్‌లో ఎంట్రీ లెవెల్ కార్ల నుంచి ప్రీమియం మోడళ్ల వరకు ఎన్నో రకాల వాహనాలు ఉన్నందున, ఈ పెంపు అన్ని వర్గాల కొనుగోలుదారులపై ప్రభావం చూపనుంది. అయితే, ఏ మోడల్ లేదా వేరియంట్‌పై ఎంత ధర పెరుగుతుందనే పక్కా వివరాలను కంపెనీ ఇంకా అధికారికంగా వెల్లడించలేదు. జూన్ నెలలో ధరలు పెంచినప్పుడు కూడా కంపెనీ ఇదే రకమైన సవాళ్లను ఎదుర్కొన్నట్లు పేర్కొంది. కొత్త కార్లు కొనాలనుకునే వారికి ఇప్పుడు సమయమే అత్యంత ముఖ్యం. ఎందుకంటే కొత్త ధరలు అమలులోకి రాకముందే బుక్ చేసుకుంటే, డీలర్ నిబంధనలు, డెలివరీ షెడ్యూల్ ఆధారంగా ప్రస్తుత పాత ధరలకే వాహనం పొందే అవకాశం ఉంటుంది. పరిశ్రమ వ్యాప్తంగా అన్ని కంపెనీలు తమ ఉత్పత్తి వ్యయాన్ని కాపాడుకోవడానికి ప్రయత్నిస్తున్న నేపథ్యంలో, మారుతి సుజుకి తీసుకున్న ఈ నిర్ణయం ప్రయాణీకుల వాహనాల మార్కెట్‌పై స్పష్టమైన ప్రభావాన్ని చూపనుంది.