Swarnagiri Gold Mine : జొన్నగిరి గోల్డ్ మైన్ ఇకపై ‘స్వర్ణగిరి గోల్డ్ మైన్’
- జొన్నగిరి గనికి కొత్త పేరు పెట్టిన ప్రభుత్వం
- 30 ఏళ్ల లీజుతో బంగారం తవ్వకాలు
- అన్ని అధికారిక రికార్డుల్లో ‘స్వర్ణగిరి’
- Follow Us :
-
-
Add as a preferred
source on google
Swarnagiri Gold Mine : ఆంధ్రప్రదేశ్ ప్రభుత్వం కర్నూలు జిల్లాలోని ప్రముఖ బంగారు గనికి సరికొత్త నామకరణం చేస్తూ కీలక నిర్ణయం తీసుకుంది. స్వాతంత్య్రం తర్వాత దేశంలోనే తొలిసారిగా ప్రైవేట్ భాగస్వామ్యంతో ఏర్పాటైన జొన్నగిరి గోల్డ్ మైన్ పేరును అధికారికంగా ‘స్వర్ణగిరి గోల్డ్ మైన్’గా మారుస్తూ రాష్ట్ర ప్రభుత్వం ఉత్తర్వులు జారీ చేసింది. ప్రభుత్వ గనుల శాఖ ముఖ్య కార్యదర్శి ముఖేష్ కుమార్ మీనా ఈ మేరకు ఆదేశాలు ఇచ్చారు. భవిష్యత్తులో దేశంలోనే అత్యంత కీలకమైన బంగారం ఉత్పత్తి కేంద్రంగా ఎదిగే అవకాశం ఉన్న ఈ గనికి, ప్రాంతీయ ప్రాధాన్యత , జాతీయ ప్రాముఖ్యతను దృష్టిలో ఉంచుకుని ఈ పేరును ఖరారు చేశారు.
‘స్వర్ణగిరి’ పేరు వెనుక ఉన్న ప్రత్యేకత
తెలుగులో ‘స్వర్ణం’ అంటే బంగారం, ‘గిరి’ అంటే కొండ అని అర్థం. ఈ ప్రాంతంలోని కొండల్లో సమృద్ధిగా బంగారం లభిస్తుండటంతో ఈ గనికి ‘స్వర్ణగిరి’ అనే పేరు అత్యంత సార్థకతను ఇస్తుందని ప్రభుత్వం పేర్కొంది. చారిత్రకంగా కూడా జొన్నగిరి ప్రాంతానికి ఖనిజ వనరుల విషయంలో గొప్ప చరిత్ర ఉంది. ఈస్ట్రన్ ధార్వార్ క్రేటన్లోని జొన్నగిరి గ్రీన్స్టోన్ బెల్ట్లో భాగమైన ఈ ప్రాంతంలో పురాతన కాలం నాటి తవ్వకాల ఆనవాళ్లు, రాళ్లను పగలగొట్టిన గుర్తులు ఇప్పటికీ కనిపిస్తాయి. శతాబ్దాల క్రితమే ఇక్కడ బంగారం వెలికితీసినట్లు చారిత్రక ఆధారాలు స్పష్టం చేస్తున్నాయి.
విస్తీర్ణం , తవ్వకాల వివరాలు
ఈ స్వర్ణగిరి బంగారు గని కర్నూలు జిల్లా తుగ్గలి మండలం పరిధిలోని పగిడిరాయి, జొన్నగిరి, ఎర్రగుడి గ్రామాల సరిహద్దు ప్రాంతాల్లో విస్తరించి ఉంది. మొత్తం 597.820 హెక్టార్ల భారీ విస్తీర్ణంలో ఉన్న ఈ గనిలో కేవలం బంగారం మాత్రమే కాకుండా వెండి, రాగి, సీసం, జింక్ వంటి ఇతర కీలక ఖనిజాలను కూడా తోడితీసే అవకాశం ఉంది. బంగారం వెలికితీత బాధ్యతలను చేపట్టిన ‘జియో మైసూర్ సర్వీసెస్ ఇండియా ప్రైవేట్ లిమిటెడ్’ సంస్థకు ప్రభుత్వం 30 సంవత్సరాల పాటు మైనింగ్ లీజును మంజూరు చేసింది.
చంద్రబాబు నాయుడు ప్రారంభోత్సవం.. అధికారిక రికార్డుల్లో మార్పులు
ఈ ఏడాది జూన్లో ముఖ్యమంత్రి నారా చంద్రబాబు నాయుడు ఈ గనిని స్వయంగా సందర్శించి, ప్రాసెసింగ్ ప్లాంట్లో వాణిజ్య ప్రాతిపదికన బంగారం ఉత్పత్తిని లాంఛనంగా ప్రారంభించారు. ఈ సందర్భంగా జొన్నగిరి గోల్డ్ మైన్ పేరును ‘స్వర్ణగిరి’గా మార్చాలని రాష్ట్ర గనుల శాఖ డైరెక్టర్ ప్రభుత్వానికి విజ్ఞప్తి చేయడంతో ఈ ప్రక్రియ పూర్తయింది. ఇకపై మైనింగ్ ప్లాన్లు, చట్టపరమైన అనుమతులు, ఇండియన్ బ్యూరో ఆఫ్ మైన్స్, పర్యావరణ శాఖ, కాలుష్య నియంత్రణ మండలి , డైరెక్టరేట్ జనరల్ ఆఫ్ మైన్స్ సేఫ్టీ వంటి అన్ని అధికారిక రికార్డులలోనూ ‘స్వర్ణగిరి గోల్డ్ మైన్’గానే నమోదు చేయాలని ప్రభుత్వం స్పష్టమైన ఆదేశాలు ఇచ్చింది.