AP LocalBody Elections : తూర్పుగోదావరిలో ఎన్నికల వేడి.. రెండో రోజు భారీగా నామినేషన్లు

తూర్పుగోదావరి జిల్లాలో స్థానిక సంస్థల ఎన్నికల నామినేషన్ల పర్వం రెండో రోజు అత్యంత ఉత్సాహంగా, భారీ స్పందన మధ్య కొనసాగింది. జిల్లా వ్యాప్తంగా నామినేషన్ల స్వీకరణ ప్రక్రియ ఊపందుకోవడంతో రాజకీయ వేడెక్కింది. రాజమహేంద్రవరం జిల్లా పరిషత్ కార్యాలయంలో నామినేషన్ల ప్రక్రియ పూర్తిగా ప్రశాంత వాతావరణంలో జరిగింది. జిల్లా ఎస్పీ నరసింహ కిషోర్ ఆధ్వర్యంలో పోలీసులు ఎలాంటి అవాంఛనీయ సంఘటనలు జరగకుండా పటిష్టమైన బందోబస్తును ఏర్పాటు చేశారు. సుమారు 12 లక్షల మంది ఓటర్లు ఉన్న ఈ జిల్లాలో పార్టీ గుర్తులపై జరగనున్న ఈ ఎన్నికలను అన్ని ప్రధాన రాజకీయ పార్టీలు చాలా ప్రతిష్టాత్మకంగా తీసుకున్నాయి.

భారీగా దాఖలైన జడ్పీటీసీ, ఎంపీటీసీ నామినేషన్లు

మొత్తం 21 జడ్పీటీసీ స్థానాలకు గాను రెండో రోజు ఏకంగా 37 నామినేషన్లు దాఖలయ్యాయి. తొలి రోజు కేవలం మూడు జడ్పీటీసీ నామినేషన్లు మాత్రమే రాగా, రెండో రోజు నామినేషన్ల సంఖ్య భారీగా పెరిగింది. వీటిలో టీడీపీ నుంచి 13, వైఎస్సార్‌సీపీ నుంచి 13, జనసేన నుంచి ఆరు, కాంగ్రెస్ నుంచి రెండు, బీజేపీ నుంచి రెండు , బీఎస్పీ నుంచి రెండు చొప్పున నామినేషన్లు దాఖలయ్యాయి. మరోవైపు 412 ఎంపీటీసీ స్థానాలకు సంబంధించి తొలి రోజు 200 మంది అభ్యర్థులు నామినేషన్లు వేయగా, రెండో రోజు ఏకంగా 428 మంది అభ్యర్థులు తమ నామినేషన్లను సమర్పించారు.

ఉత్కంఠ రేపుతున్న జడ్పీ చైర్మన్ పీఠం..

తూర్పుగోదావరి జిల్లా పరిషత్ చైర్మన్ పదవిని జనరల్ మహిళకు కేటాయించడంతో రాజకీయ వర్గాల్లో ఆసక్తి నెలకొంది. అధికార కూటమిలో జడ్పీ చైర్మన్ అభ్యర్థి ఎవరవుతారనే దానిపై సర్వత్రా ఉత్కంఠ కొనసాగుతోంది. ముఖ్యంగా సీతానగరం జడ్పీటీసీ స్థానం నుంచి జనసేన ఎమ్మెల్యే బత్తుల బలరామకృష్ణ సతీమణి వెంకటలక్ష్మి బరిలో నిలవడం స్థానికంగా ప్రాధాన్యత సంతరించుకుంది. మరోవైపు ప్రతిపక్ష వైఎస్సార్‌సీపీ అన్ని స్థానాల్లోనూ తమ పార్టీ తరఫున గట్టి పోటీ ఇచ్చేందుకు అభ్యర్థులను రంగంలోకి దించుతోంది. ఈ వ్యూహాల్లో భాగంగా జిల్లా వైఎస్సార్‌సీపీ అధ్యక్షుడు చెల్లుబోయిన వేణు, మాజీ ఎమ్మెల్యే జక్కంపూడి రాజా తదితర నేతలు పార్టీ శ్రేణులను సమాయత్తం చేస్తూ నామినేషన్ల ప్రక్రియను దగ్గరుండి పర్యవేక్షిస్తున్నారు.