Home Cleaning : దీపావళి వేళ.. ఇంట్లో బల్లులు, బొద్దింకల బెడద ఎక్కువగా ఉందా? ఈ చిట్కాలు ట్రై చేయండి.!

అక్టోబర్ నెలలో వాతావరణంలో వచ్చే మార్పులు, ముఖ్యంగా వర్షాలు , పెరిగిన తేమ కారణంగా ఇళ్లలో బల్లులు, బొద్దింకల బెడద గణనీయంగా పెరుగుతుంది. వర్షాకాలంలో బయటి వాతావరణంలో తేమ పెరగడం వల్ల, బొద్దింకలు పొడి , సురక్షితమైన ప్రదేశాల కోసం వెతుకుతూ ఇళ్లలోకి వస్తుంటాయి. అదేవిధంగా, ఇళ్ల చుట్టూ కీటకాల సంఖ్య పెరిగితే, వాటిని ఆహారంగా తీసుకునే బల్లులు కూడా ఇళ్లలోకి తరచుగా ప్రవేశిస్తాయి. అధిక తేమ , ఉష్ణోగ్రత ఉన్న వాతావరణం బల్లులు, బొద్దింకల పునరుత్పత్తికి అత్యంత అనుకూలమైనది. త్వరలో రానున్న దీపావళి పండుగ సమయంలో ఇల్లు శుభ్రం చేసుకునే వేళ, ఈ కీటకాలను పూర్తిగా నివారించడానికి కొన్ని ప్రభావవంతమైన, సులభమైన ఇంటి చిట్కాలు ఇక్కడ ఉన్నాయి.

వెల్లుల్లి, ఉల్లిపాయల ఘాటుతో బల్లులకు చెక్

ఇంట్లో బల్లులు, బొద్దింకల బెడద ఎక్కువగా ఉంటే హానికరమైన రసాయన స్ప్రేల కంటే సహజమైన ఇంటి చిట్కాలు ఎంతో సురక్షితం. వెల్లుల్లి, ఉల్లిపాయల ఘాటైన వాసన బల్లులను దూరంగా ఉంచుతుంది. బల్లులను తరిమికొట్టడానికి ఇంటి మూలల్లో ఉల్లిపాయ ముక్కలు, వెల్లుల్లి రెబ్బలు పెట్టవచ్చు. లేదా వెల్లుల్లి పేస్ట్‌ను నీటిలో కరిగించి, స్ప్రే బాటిల్‌లో నింపి గోడలపై చల్లవచ్చు. ఉల్లిపాయలు, వెల్లుల్లిలో ఉండే సల్ఫర్ సమ్మేళనాల ఘాటైన వాసన కీటకాలను దరిచేరనీయకుండా చేస్తుంది.

లవంగాలు , బిర్యానీ ఆకులతో బొద్దింకలకు స్వస్తి

వంటగదిలో బొద్దింకలను వదిలించుకోవడానికి లవంగాలు అత్యంత ప్రభావవంతమైన సహజ పరిష్కారం. లవంగాల బలమైన సువాసన బొద్దింకలను తరిమికొట్టడంలో సహాయపడుతుంది. బొద్దింకలు ఎక్కువగా తిరిగే వంటగది మూలల్లో, అల్మారాల్లో, సింక్ కింద 4-5 లవంగాలు ఉంచాలి. లవంగ నూనెలోని యూజినాల్ సమ్మేళనం బొద్దింకలను పారద్రోలడంలో బాగా పనిచేస్తుందని పరిశోధనలు కూడా నిరూపించాయి. అలాగే, బిర్యానీ ఆకులను బాగా నలిపి బొద్దింకలు వచ్చే చోట్ల ఉంచితే వాటి ఘాటు వాసనకు బొద్దింకలు ఆ ప్రదేశం వైపు రావు.

బల్లులు, కీటకాలను నివారించడానికి పాటించాల్సిన ఇతర పద్ధతులు

మిరపకాయల ఘాటైన వాసన బల్లుల సున్నితమైన నాడీ వ్యవస్థను చికాకు పెడుతుంది కాబట్టి, కొంచెం కారం పొడిని నీళ్లలో కలిపి బల్లులు తిరిగే ప్రదేశాలలో చల్లవచ్చు. ఇవే కాకుండా ఇళ్లలో కీటకాల బెడదను నివారించడానికి కొన్ని ప్రాథమిక జాగ్రత్తలు తీసుకోవడం ముఖ్యం. తలుపులు , కిటికీలలోని పగుళ్లను మూసివేయడంతో పాటు కిటికీలకు దోమతెరలు అమర్చాలి. ఇంటి మూలల్లో, వంటగదిలో పరిశుభ్రత పాటించడం చాలా ముఖ్యం. రాత్రిపూట వంట పాత్రలు, భోజన పళ్ళాలను సింక్‌లో వదిలిపెట్టకుండా శుభ్రం చేసుకోవాలి. ఏ ఆహార పదార్థాలను గాలికి వదిలిపెట్టకుండా గాలి చొరబడని డబ్బాలలో నిల్వ చేయాలి. వంటగదిలో లేదా బాత్రూంలో పైపులు లీక్ అయితే వెంటనే రిపేర్ చేయించడం ద్వారా తేమను తగ్గించి బొద్దింకలు ఆశ్రయం పొందకుండా నివారించవచ్చు.