Pawan Kalyan-TDP Leaders Meets: ఆంధ్రప్రదేశ్‌లో స్థానిక సంస్థల ఎన్నికలకు సమయం దగ్గర పడుతుండగా.. టీడీపీ, జనసేన పార్టీల మధ్య సీట్ల సర్దుబాటు అంశంపై చర్చలు కొనసాగుతున్నాయి. ఈ క్రమంలో జనసేన అధినేత, ఉప ముఖ్యమంత్రి పవన్ కల్యాణ్‌తో టీడీపీ నేతలు సమావేశమయ్యారు. టీడీపీ అధ్యక్షుడు పల్లా శ్రీనివాస్, మంత్రి నిమ్మల రామానాయుడు.. పవన్ కల్యాణ్‌తో దాదాపు 30 నిమిషాల పాటు భేటీ అయ్యారు. ఈ సమావేశంలో ప్రధానంగా సీట్ల సర్దుబాటు అంశంపై చర్చించినట్లు సమాచారం. అయితే, పవన్ కల్యాణ్‌తో సమావేశం ముగిసిన అనంతరం టీడీపీ నేతలు మంత్రి నాదెండ్ల మనోహర్‌తో భేటీ అయ్యారు. ఇరు పార్టీల మధ్య సీట్ల పంపకాలపై చర్చలు కొనసాగుతున్న నేపథ్యంలో ఈ సమావేశం ప్రాధాన్యత సంతరించుకుంది. జనసేన తరఫున కోరుతున్న సీట్లు, స్థానిక సంస్థల్లో ప్రాతినిధ్యం వంటి అంశాలపై చర్చలు జరిగినట్లు తెలుస్తోంది.
ఆరు కార్పొరేషన్లతో పాటు 26 మున్సిపాలిటీలను జనసేన కోరుతున్నట్లు సమాచారం. ఈ డిమాండ్లకు సంబంధించిన వివరాలను పవన్ కల్యాణ్‌కు టీడీపీ నేతలు వివరించారు. మిగిలిన అంశాలపై మంత్రి నాదెండ్ల మనోహర్‌తో పాటు లింగమనేని రమేశ్‌తో చర్చించాలని పవన్ కల్యాణ్ టీడీపీ నేతలకు సూచించినట్లు సమాచారం. నాదెండ్ల మనోహర్‌తో జరిగే చర్చల అనంతరం సీట్ల సర్దుబాటు అంశం కొలిక్కి వచ్చే అవకాశం ఉందని తెలుస్తోంది. టీడీపీ, జనసేన నేతల మధ్య కొనసాగుతున్న ఈ చర్చలు ఎలాంటి నిర్ణయానికి దారితీస్తాయన్నది రాజకీయ వర్గాల్లో ఆసక్తికరంగా మారింది.