AP Liquor Shops: మద్యం దుకాణాల దరఖాస్తుల గడువు పెంపు.. ఫీజులు, తేదీలు ఇవే

AP Liquor Shops: ఆంధ్రప్రదేశ్‌లో మద్యం దుకాణాల తాజా కేటాయింపులకు సంబంధించి ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా గుర్తించిన 807 ఏ4 మద్యం దుకాణాలకు దరఖాస్తుల గడువును మరో మూడు రోజులు పొడిగించింది. దీంతో దరఖాస్తుదారులు అక్టోబర్ 6వ తేదీ అర్ధరాత్రి వరకు దరఖాస్తులు సమర్పించుకోవచ్చు. మొత్తం 807 దుకాణాల్లో 799 ఓపెన్ కేటగిరీకి, 8 రిజర్వుడ్ కేటగిరీకి చెందినవి ఉన్నాయి. పునరుద్ధరణ జరగని లేదా ప్రస్తుతం పనిచేయని మద్యం దుకాణాల స్థానంలో ఈ తాజా కేటాయింపులు చేపడుతున్నట్లు ప్రభుత్వం తెలిపింది. దరఖాస్తుల పరిశీలనను అక్టోబర్ 7న, డ్రా ఆఫ్ లాట్స్‌ను అక్టోబర్ 8న నిర్వహించనున్నారు.

21 సంవత్సరాలు పైబడిన, నిబంధనల ప్రకారం అనర్హత లేని వ్యక్తులు దరఖాస్తు చేసుకోవచ్చు. ఒక వ్యక్తి ఎన్ని దుకాణాలకైనా దరఖాస్తు చేసుకునే అవకాశం ఉంది. ప్రతి దరఖాస్తుకు రూ.3 లక్షల నాన్‌రిఫండబుల్ అప్లికేషన్ ఫీజు, రూ.1,000 ప్రాసెసింగ్ ఫీజు చెల్లించాలి. ఏ4 మద్యం దుకాణాల లైసెన్స్ కోసం అర్హత కలిగిన అభ్యర్థులు నోటిఫికేషన్‌లో పేర్కొన్న నిబంధనల ప్రకారం ఆన్‌లైన్, హైబ్రిడ్ లేదా ఆఫ్‌లైన్ విధానాల్లో దరఖాస్తు చేసుకోవచ్చు. నిర్ణీత గడువులో అర్హులైన అభ్యర్థులు దరఖాస్తులు సమర్పించుకోవాలని అధికారులు సూచించారు.