World’s Largest Green Ammonia Project in AP: గ్రీన్‌ ఎనర్జీ రంగంలో ఏపీకి భారీ పెట్టుబడి.. ప్రపంచంలోనే అతిపెద్ద గ్రీన్ అమ్మోనియా ప్రాజెక్టు..!

World’s Largest Green Ammonia Project in AP: గ్రీన్‌ ఎనర్జీ రంగంలో ఆంధ్రప్రదేశ్ మరో చారిత్రక మైలురాయిని అందుకోబోతోంది. కాకినాడలో ప్రపంచంలోనే అతిపెద్ద గ్రీన్ అమ్మోనియా ప్రాజెక్టును ఏర్పాటు చేయడానికి రాష్ట్ర ప్రభుత్వం సిద్ధమవుతోంది. ఈ ప్రాజెక్టుకు దాదాపు 10 బిలియన్ డాలర్లు (సుమారు రూ.83 వేల కోట్లు) పెట్టుబడి రానుందని మంత్రి నారా లోకేష్ వెల్లడించారు. ఈ మేరకు మంత్రి లోకేష్ ట్వీట్ చేస్తూ, గ్రీన్ ఎనర్జీలో ఏపీ గ్లోబల్ హబ్‌గా మారబోతోందని స్పష్టం చేశారు. ఈ ప్రాజెక్టు ద్వారా కాకినాడ నుంచి జర్మనీ, జపాన్, సింగపూర్ వంటి దేశాలకు గ్రీన్ ఎనర్జీ ఎగుమతులు జరగనున్నాయి. అంతేకాదు, ఈ భారీ ప్రాజెక్టుతో సుమారు 8 వేల మందికి ప్రత్యక్షంగా ఉద్యోగ అవకాశాలు కలగనున్నాయి.

2030 నాటికి ఏటా 5 మిలియన్ టన్నుల ఉత్పత్తి లక్ష్యం..!
గ్రీన్ అమ్మోనియా ఆధ్వర్యంలో, గ్రీన్కో గ్రూప్ మద్దతుతో అభివృద్ధి చేయనున్న ఈ ప్రాజెక్టు 2030 నాటికి ఏటా 5 మిలియన్ టన్నుల గ్రీన్ అమ్మోనియాను ఉత్పత్తి చేయడం లక్ష్యంగా పెట్టుకుంది. ఇది నేషనల్ గ్రీన్ హైడ్రోజన్ మిషన్‌కు అనుసంధానంగా అమలుకానుంది. భారతదేశాన్ని ప్రపంచ క్లీన్ ఎనర్జీ ఎగుమతిదారుగా నిలబెట్టే దిశగా ఇది కీలక అడుగు కానుంది. కాకినాడలో ఇప్పటికే ఉన్న సంప్రదాయ (గ్రే) అమ్మోనియా ప్లాంట్‌ను పూర్తిగా గ్రీన్ అమ్మోనియా సౌకర్యంగా మార్చనున్నారు. అబుదాబి ఇన్వెస్ట్‌మెంట్ అథారిటీ (ADIA) వంటి ప్రపంచ పెట్టుబడిదారుల భాగస్వామ్యంతో ఈ ప్రాజెక్టు ముందుకు సాగుతోంది. దీని ద్వారా భారత్ శక్తి దిగుమతిదారు నుంచి ప్రపంచానికి గ్రీన్ ఎనర్జీ సరఫరా చేసే దేశంగా మారనుంది.

గ్రీన్ అమ్మోనియా అంటే ఏమిటి?
గ్రీన్ అమ్మోనియాను.. “ద్రవ సీసాలో శుభ్రమైన ఇంధనం”గా పిలుస్తారు. ఇది పూర్తిగా సౌర, గాలి వంటి పునరుత్పాదక శక్తితో నీరు మరియు గాలి నుంచి తయారవుతుంది. విద్యుత్తుతో నీటిని హైడ్రోజన్‌గా విభజించి, వాతావరణంలోని నైట్రోజన్‌తో కలపడం ద్వారా గ్రీన్ అమ్మోనియా ఉత్పత్తి చేస్తారు. దీంతో కార్బన్ ఉద్గారాలు పూర్తిగా నివారించవచ్చు.

ప్రాజెక్ట్ ప్రాముఖ్యత
ఈ ప్రాజెక్టు ఆంధ్రప్రదేశ్ ఇంటిగ్రేటెడ్ క్లీన్ ఎనర్జీ పాలసీ–2024కు అనుగుణంగా ఉంది. రాష్ట్రాన్ని “గ్రీన్ ఎనర్జీ సౌదీ అరేబియా”గా మార్చాలనే లక్ష్యానికి ఇది బలమైన పునాది వేస్తుంది. ప్రతి ఏడాది సుమారు 2 మిలియన్ టన్నుల CO₂ ఉద్గారాలను తగ్గించగల సామర్థ్యం ఈ ప్రాజెక్టుకు ఉంది. ఇది 2070 నాటికి భారత్ నికర-సున్నా కార్బన్ లక్ష్యాన్ని చేరుకోవడంలో కీలక పాత్ర పోషించనుంది. 2028 నుంచి ఏటా 5 లక్షల టన్నుల గ్రీన్ అమ్మోనియాను జర్మన్ దిగ్గజం యూనిపర్‌కు సరఫరా చేసేందుకు ఇప్పటికే ఒప్పందాలు కుదిరాయి. ఇది భారతదేశానికి గ్రీన్ ఎనర్జీ రంగంలో అంతర్జాతీయ గుర్తింపును తెస్తుందని నిపుణులు భావిస్తున్నారు. కాకినాడలో ఏర్పాటు కానున్న ఈ గ్రీన్ అమ్మోనియా ప్రాజెక్టు ద్వారా ఆంధ్రప్రదేశ్ పునరుత్పాదక ఇంధన రంగంలో ప్రపంచ పటంలో ప్రత్యేక స్థానాన్ని సంపాదించనుంది. ఉపాధి అవకాశాలు, పెట్టుబడులు, పర్యావరణ పరిరక్షణ—అన్ని కోణాల్లో ఇది రాష్ట్ర భవిష్యత్తుకు గేమ్‌చేంజర్‌గా మారనుందని విశ్లేషకులు అంటున్నారు.

Happy to share that AM Green will set up a 1.5 MTPA green ammonia export terminal at Kakinada, powered by ~7.5 GW of renewable energy and ~1 GW of pumped hydro storage.

A historic first for India – exporting green energy in the form of ammonia to Germany, Singapore, and Japan.… https://t.co/OBytJJPio9

— Lokesh Nara (@naralokesh) January 16, 2026