అమెరికా వీసా ఇంటర్వ్యూలు తాత్కాలికంగా రద్దు

ఒమిక్రాన్ వేరియంట్ కరోనా వైరస్ విజృంభణ నేపథ్యంలో పలు వీసాలకు దరఖాస్తు చేసే అభ్యర్థులకు పర్సనల్ ఇంటర్వ్యూలను అమెరికా విదేశాంగ శాఖ తాత్కాలికంగా రద్దు చేసింది. నాన్ ఇమ్మిగ్రెంట్ వర్క్ వీసా హెచ్1బీతో పాటు హెచ్3, హెచ్4 వీసాల కోసం దరఖాస్తు చేసుకునే అభ్యర్థులకు ఈ రద్దు వర్తిస్తుందని తెలిపింది. వచ్చే ఏడాది 2022 వరకు వీటిని రద్దు చేస్తున్నట్లు అమెరికా ప్రభుత్వం పేర్కొంది. దీనిపై స్థానిక పరిస్థితులను బట్టి ఆయా ప్రాంతీయ కాన్సులేట్/ఎంబసీ అధికారులు తుది నిర్ణయం తీసుకుంటారని స్పష్టం చేసింది.

Read Also: వారెవ్వా : అవిభక్త కవలల విజయం.. అద్భుతం..

ఈ నేపథ్యంలో దరఖాస్తుదారులు ఎప్పటికప్పుడు తమ సంబంధిత ఎంబసీ, కాన్సులేట్ వెబ్‌సైట్లను పరిశీలన చేస్తుండాలని అమెరికా విదేశాంగ శాఖ సూచించింది. సాధారణంగా అమెరికా వీసాలకు వచ్చే దరఖాస్తులను కాన్సులేట్ సిబ్బంది పరిశీలించి అనంతరం దరఖాస్తుదారులను వ్యక్తిగతంగా ఇంటర్వ్యూ చేస్తారు. అందులో ఎంపికైతే వీసాలు మంజూరు చేస్తారు. కానీ కరోనా ఉధృతి నేపథ్యంలో 2022లో ఈ ఇంటర్వ్యూ విధానాన్ని పక్కనపెట్టి వీసాల జారీని సులభతరం చేయాలని అమెరికా సర్కారు భావిస్తోంది.