SIR Process : ఓటర్ల జాబితాలో పేరు గల్లంతైందా..?నమోదుకు మళ్లీ అవకాశం ఇచ్చిన ఈసీ

దేశవ్యాప్తంగా కొనసాగుతున్న ఓటర్ల జాబితా ప్రత్యేక సమగ్ర సవరణ (SIR) ప్రక్రియలో కేంద్ర ఎన్నికల సంఘం (ECI) ఓటర్లకు తీపి కబురు అందించింది. వివిధ కారణాల వల్ల ముసాయిదా ఓటర్ల జాబితాలో పేర్లు చోటు దక్కని అర్హులైన పౌరులకు తుది జాబితాలో తమ పేరు నమోదు చేసుకునేందుకు మరో సువర్ణ అవకాశాన్ని కల్పించింది. ఓటర్ల జాబితా నుంచి పేరు తొలగించినంత మాత్రాన నమోదును నిరాకరించినట్లు కాదని, సరైన నిబంధనల ప్రకారం దరఖాస్తు చేసుకుంటే తుది జాబితాలో పేరు చేరుతుందని స్పష్టం చేసింది. ఈ మేరకు ఎన్నికల సంఘం కార్యదర్శి పవన్ దివాన్ 2026 నవంబర్ 6న ఆంధ్రప్రదేశ్, తెలంగాణ, ఢిల్లీ, మహారాష్ట్ర, హర్యానా, జార్ఖండ్, నాగాలాండ్ రాష్ట్రాల ప్రధాన ఎన్నికల అధికారులకు (CEO) అధికారిక ఆదేశాలు జారీ చేశారు.

ఎవరికి ఈ అవకాశం కల్పిస్తున్నారు?

ఎన్యుమరేషన్ ఫారాలు అందకపోవడం వల్ల ముసాయిదా ఓటర్ల జాబితాలో చోటు లభించని ఎస్సెంట్ (గైర్హాజరైనవారు), షిఫ్టెడ్ (నివాసం మారినవారు), డెడ్ (మరణించినట్లు పొరపాటుగా నమోదైనవారు), డూప్లికేట్ కేటగిరీల (ASDD) ఓటర్లకు ఈ అవకాశం కల్పిస్తున్నారు. ఈ ప్రక్రియలో అత్యంత పారదర్శకత పాటించేందుకు సంబంధిత పోలింగ్ కేంద్రాలు, పంచాయతీ భవనాలు, పట్టణ స్థానిక సంస్థల కార్యాలయాల్లో ఈ ASDD ఓటర్ల జాబితాలను పేరు తొలగించడానికి గల కారణాలతో సహా మరోసారి ప్రదర్శించనున్నారు. అంతేకాకుండా, ప్రజలు సులభంగా చూసుకోవడానికి రాష్ట్రాల సీఈఓ వెబ్‌సైట్లలో ఈ వివరాలన్నింటినీ పీడీఎఫ్ (PDF) రూపంలో అందుబాటులో ఉంచనున్నారు.

సులభంగా దరఖాస్తు చేసుకునే డిజిటల్ వెసులుబాటు

సంబంధిత ఓటర్లకు పాక్షికంగా నింపిన ఎన్యుమరేషన్ ఫారాలను ECINET లో జనరేట్ చేసి, బూత్ స్థాయి అధికారుల (BLO) ద్వారా నేరుగా ఇళ్లకు పంపించే ఏర్పాటు చేస్తున్నారు. దీంతో పాటు వాట్సాప్, ఈ-మెయిల్, SMS ద్వారా కూడా ఫారాలు పొందే అవకాశం కల్పించారు. ఓటర్లు తమ పాత EPIC నంబర్‌ను ఉపయోగించి ECI వెబ్‌సైట్ లేదా ECINET యాప్ ద్వారా దరఖాస్తును డౌన్‌లోడ్ చేసుకుని పూర్తి చేయవచ్చు. దరఖాస్తు ప్రక్రియలో ఎలాంటి సందేహాలున్నా నివృత్తి చేసుకోవడానికి ECINET యాప్‌లో ‘Book a Call with BLO’ సదుపాయాన్ని కూడా అందుబాటులోకి తీసుకువచ్చారు.

నివాసం ఆధారంగా సమర్పించాల్సిన పత్రాలు

గతంలో ఉన్న నివాసంలోనే కొనసాగుతూ ఎన్యుమరేషన్ ఫారాన్ని సమర్పించలేకపోయినవారు, దానికి గల కారణాలను వివరిస్తూ ‘అనుబంధం-B’ (Annexure-B) ప్రకటనను జత చేసి సమర్పించాల్సి ఉంటుంది. అదేవిధంగా, రాష్ట్రంలోనే మరో నియోజకవర్గానికి లేదా కొత్త చిరునామాకు మారినవారు ఫారం-8 సమర్పించాల్సిన అవసరం లేకుండా, కొత్త చిరునామా వివరాలతో ఎన్యుమరేషన్ ఫారం, ‘అనుబంధం-C’ (Annexure-C) ప్రకటన , చిరునామా ధ్రువీకరణ పత్రం సమర్పిస్తే సరిపోతుంది. ఇక సొంత ఇల్లు లేదా నిర్దిష్టమైన చిరునామా ధ్రువీకరణ పత్రాలు లేని నిరుపేదలకు BLO క్షేత్రస్థాయి ధ్రువీకరణ నివేదిక ఆధారంగా పరిశీలన పూర్తి చేస్తారు.

పాత ఓటరు కార్డు నంబరే పునరుద్ధరణ

ఈ దరఖాస్తులను పరిశీలించి, అర్హత , నివాసాన్ని ధ్రువీకరించిన తర్వాత ఎలక్టోరల్ రిజిస్ట్రేషన్ ఆఫీసర్లు (ERO) తుది ఆమోదం తెలుపుతారు. ఆమోదం పొందిన ఓటర్లకు పాత EPIC నంబర్‌ను మాత్రమే తిరిగి కేటాయిస్తారు. అయితే, SIR ప్రక్రియ సమయంలో ఇప్పటికే కొత్త నమోదు కోసం ‘ఫారం-6’ సమర్పించిన వారు మళ్లీ ఎన్యుమరేషన్ ఫారం సమర్పించాల్సిన అవసరం లేదని ఎన్నికల సంఘం స్పష్టం చేసింది. అర్హులైన ఏ ఒక్క ఓటరూ తమ ఓటు హక్కును కోల్పోకుండా చూడాలని, ఈ ప్రక్రియపై విస్తృత ప్రచారం కల్పించాలని రాష్ట్ర ఎన్నికల అధికారులకు ఈసీ ఆదేశించింది.