Cricketer Nandini : వికారాబాద్‌లో విషాదం.. బీసీసీఐ అండర్-19 క్రికెటర్ నందిని ఆత్మహత్య

వికారాబాద్ జిల్లాలో తీవ్ర కలకలం రేపిన ఉదంతంలో, బీసీసీఐ అండర్-19 మహిళా క్రికెట్ క్రీడాకారిణి బలవన్మరణానికి పాల్పడింది. వికారాబాద్ పట్టణంలోని మధు కాలనీలో నివాసముంటున్న 17 ఏళ్ల నందిని ఉరివేసుకుని ఆత్మహత్య చేసుకుంది. ఈ ఘటన స్థానికంగా తీవ్ర దిగ్భ్రాంతిని, ఆగ్రహాన్ని నింపింది.

క్రికెట్‌లో రాణిస్తున్న తరుణంలోనే..

యాలాల్ మండలం సంగయ్యపల్లి గ్రామానికి చెందిన నందిని, వికారాబాద్‌లోని తన అమ్మమ్మ గారి ఇంట్లో ఉంటూ చదువుతో పాటు క్రికెట్ కోచింగ్ తీసుకుంటోంది. తన ప్రజ్ఞతో ఇటీవల బీసీసీఐ అండర్-19 జట్టుకు ఎంపికై అద్భుతంగా రాణిస్తోంది. భవిష్యత్తులో దేశం తరఫున ఆడాల్సిన యువ సంచలనం ఇలా అర్ధాంతరంగా తనువు చాలించడం పట్ల క్రీడాకారులు, స్థానికులు తీవ్ర విచారం వ్యక్తం చేస్తున్నారు.

ప్రేమ పేరుతో వేధింపులే కారణం: కుటుంబ సభ్యుల ఆరోపణ

నందిని మృతికి వేధింపులే కారణమని ఆమె కుటుంబ సభ్యులు, బంధువులు తీవ్ర ఆరోపణలు చేస్తున్నారు. గత కొద్దిరోజులుగా అనిల్ అనే యువకుడు ప్రేమ పేరుతో నందిని వెంటపడుతూ తీవ్రంగా వేధించాడని, ఈ అక్రమ వేధింపులకు కృష్ణ అనే మరో విద్యార్థి కూడా సహకరించాడని వారు వాపోయారు. వారి వేధింపుల భరించలేకే తమ కూతురు ఈ తీవ్ర నిర్ణయం తీసుకుందని కన్నీరుమున్నీరవుతున్నారు.

న్యాయం చేయాలని రోడ్డుపై ధర్నా.. పోలీసుల దర్యాప్తు

యువతి ఆత్మహత్యకు కారణమైన నిందితులను వెంటనే అరెస్టు చేసి, బాధిత కుటుంబానికి కఠినమైన శిక్ష ద్వారా న్యాయం చేయాలని డిమాండ్ చేస్తూ కుటుంబ సభ్యులు, స్థానికులు రోడ్డుపై బైఠాయించి ధర్నా నిర్వహించారు. సమాచారం అందుకున్న వెంటనే పోలీసులు ఘటనా స్థలానికి చేరుకుని ఆందోళనకారులను శాంతింపజేసే ప్రయత్నం చేశారు. మృతదేహాన్ని పోస్టుమార్టం నిమిత్తం ఆసుపత్రికి తరలించారు. కుటుంబ సభ్యుల ఫిర్యాదు మేరకు కేసు నమోదు చేసుకున్న పోలీసులు, ఆరోపణలు ఎదుర్కొంటున్న యువకుల కోసం గాలింపు చర్యలు చేపట్టి సమగ్ర విచారణ జరుపుతున్నారు.