CM Revanth Reddy : రాహుల్ గాంధీ పర్యటనపై బీజేపీకి ఎందుకంత భయం.?

హైదరాబాద్ వేదికగా జరుగుతున్న ‘భారత్ సమ్మిట్’పై ప్రతిపక్షాలు చేస్తున్న విమర్శలను ముఖ్యమంత్రి ఎ. రేవంత్ రెడ్డి తీవ్రంగా ఖండించారు. సమ్మిట్ రెండో రోజు జరిగే ముఖ్య సమావేశాల్లో లోక్‌సభలో ప్రతిపక్ష నాయకుడు రాహుల్ గాంధీ పాల్గొని ప్రసంగించనున్నారు. ఈ నేపథ్యంలో రాహుల్ గాంధీ పర్యటనను, భారత్ సమ్మిట్‌ను బీజేపీ, బీఆర్ఎస్ నేతలు గుడ్డిగా వ్యతిరేకించడంపై సీఎం తీవ్రస్థాయిలో మండిపడ్డారు. దేశ ప్రయోజనాలు, రాష్ట్ర అభివృద్ధిని కాపాడుకోవడానికి బదులుగా రాజకీయ కక్ష సాధింపు చర్యలకు పాల్పడటం సరికాదని హితవు పలికారు.

రాజీవ్ గాంధీ సంస్కారం.. మోదీ విధానాలు.. బీజేపీ ద్వంద్వ వైఖరి

చరిత్రను గుర్తుచేస్తూ సీఎం రేవంత్ రెడ్డి కీలక వ్యాఖ్యలు చేశారు. గతంలో కాంగ్రెస్ హయాంలో ప్రధానిగా ఉన్న రాజీవ్ గాంధీ.. ప్రతిపక్ష నేత అటల్ బిహారీ వాజ్‌పేయిని భారత ప్రతినిధిగా విదేశాలకు పంపి గొప్ప రాజకీయ సంస్కారాన్ని ప్రదర్శించారని కొనియాడారు. దేశ ప్రయోజనాల కోసం రాజకీయాలకు అతీతంగా వ్యవహరించిన ఆనాడు ఉన్న గొప్ప ప్రజాస్వామ్య సంప్రదాయాన్ని నేడు బీజేపీ ఎందుకు పాటించడం లేదని ప్రశ్నించారు. ప్రధానమంత్రి నరేంద్ర మోదీ విదేశాల్లో ప్రసంగించడం, ప్రపంచ నేతలను ఆహ్వానించడం, చైనా లేదా పాకిస్థాన్ విషయాల్లో ఎలాంటి నిర్ణయాలు తీసుకున్నా కరెక్ట్ అంటున్న బీజేపీ.. రాహుల్ గాంధీ హైదరాబాద్‌కు వస్తే మాత్రం ఎందుకు జీర్ణించుకోలేకపోతోందని నిలదీశారు. కేంద్ర కేబినెట్ మంత్రి హోదా కలిగిన లోక్‌సభ ప్రతిపక్ష నేత రాహుల్ గాంధీ భారత్ సమ్మిట్‌లో మాట్లాడితే తప్పేంటని మండిపడ్డారు.

రాహుల్ గాంధీ రాకపై భయమే కారణం

రాహుల్ గాంధీ పట్ల, ఆయన ఎదుగుదల పట్ల బీజేపీకి తీవ్రమైన భయం పట్టుకుందని సీఎం రేవంత్ ఎద్దేవా చేశారు. రాబోయే ఎన్నికల్లో రాహుల్ గాంధీ తమను ఓడిస్తారనే భయంతోనే బీజేపీ నేతలు ఆయనపై చులకన వ్యాఖ్యలు చేస్తున్నారని, దేశానికి ఆయన భవిష్యత్తులో ప్రధాని అవుతారనే ఆందోళనే వారి విమర్శలకు కారణమని స్పష్టం చేశారు. కడుపులో విషం పెట్టుకుని, రాష్ట్రానికి, దేశానికి మంచి జరిగే అంశాలను కూడా వ్యతిరేకించడం కిషన్ రెడ్డి, కేటీఆర్‌లకు తగదని హెచ్చరించారు. ప్రజాస్వామ్యంలో భిన్నాభిప్రాయాలను గౌరవించాలని, చర్చల ద్వారానే సమస్యలు పరిష్కారమవుతాయని చెబుతూ.. నియంతృత్వ ధోరణులను విడనాడాలని హితవు పలికారు.

దేశంలోనే అత్యుత్తమ గిగ్ వర్కర్స్ పాలసీ అంకితం

భారత్ సమ్మిట్ వేదికగా తెలంగాణ ప్రభుత్వం తెచ్చిన ‘గిగ్ వర్కర్స్ పాలసీ’ని రాహుల్ గాంధీకి అంకితం చేస్తున్నట్లు సీఎం ప్రకటించారు. గిగ్ కార్మికుల సంక్షేమం కోసం తమ ప్రభుత్వం అత్యుత్తమ విధానాలను అమలు చేస్తోందని, ఈ సమ్మిట్‌లో జరిగే చర్చలు, తీర్మానాలు భవిష్యత్ తరాలకు ఎంతో ఉపయోగపడతాయని తెలిపారు. రాష్ట్రానికి విచ్చేస్తున్న రాహుల్ గాంధీకి తెలంగాణ ప్రభుత్వం తరఫున ఘనంగా స్వాగతం పలుకుతున్నామని, ఈ సమ్మిట్ ముగింపు సమావేశంలో ఆయన కార్మికుల సంక్షేమంపై తమ అమూల్యమైన అభిప్రాయాలను పంచుకోనున్నారని సీఎం రేవంత్ రెడ్డి వెల్లడించారు.