Bhu Bharati: రైతులకు ఊరట.. భూ సమస్యలపై ప్రభుత్వం కీలక నిర్ణయం.!

వనపర్తి జిల్లా కేంద్రంలో రాష్ట్ర రెవెన్యూ, గృహనిర్మాణ శాఖ మంత్రి పొంగులేటి శ్రీనివాస్ రెడ్డి రెవెన్యూ శాఖ పనితీరుపై సమగ్ర సమీక్షా సమావేశాన్ని నిర్వహించారు. మండల స్థాయి అధికారుల నుంచి రెవెన్యూ శాఖ ప్రిన్సిపల్ సెక్రటరీ వరకు ఉన్నతాధికారులతో కలిసి దాదాపు 5 గంటల పాటు ఆయన సుదీర్ఘంగా చర్చించారు. రాష్ట్రంలో ఏళ్లతో పాటు పేరుకుపోయిన భూ సమస్యలకు శాశ్వత పరిష్కారం చూపడమే కాంగ్రెస్ ప్రభుత్వ ప్రధాన లక్ష్యమని ఈ సందర్భంగా మంత్రి స్పష్టం చేశారు. రైతులు, భూ యజమానులు ఎదుర్కొంటున్న ఇబ్బందులను క్షేత్రస్థాయి నుంచి పరిశీలించి వేగంగా పరిష్కరించాలని అధికారులను ఆదేశించారు.

ధరణి స్థానంలో ‘భూ భారతి’.. 75 గ్రామాల్లో సమగ్ర భూ సర్వే

గత ప్రభుత్వంలో అనేక లోపాలతో ప్రజలను తీవ్ర ఇబ్బందులకు గురిచేసిన ధరణి పోర్టల్ స్థానంలో, ప్రజల సౌకర్యార్థం అత్యంత పారదర్శకమైన ‘భూ భారతి’ వ్యవస్థను అందుబాటులోకి తీసుకొచ్చామని మంత్రి పొంగులేటి తెలిపారు. భూ వివాదాలకు శాశ్వతంగా చెక్ పెట్టాలంటే సమగ్ర భూ సర్వే ఒక్కటే సరైన మార్గమని ఆయన ఉద్ఘాటించారు. అందులో భాగంగానే మొదటి దశ కింద రాష్ట్రవ్యాప్తంగా అత్యంత సమస్యాత్మకంగా ఉన్న 75 రెవెన్యూ గ్రామాలను ఎంపిక చేసి సర్వే ప్రారంభించినట్లు వెల్లడించారు. ఈ డిజిటల్ భూ సర్వే ప్రక్రియ పూర్తయిన తర్వాత ప్రతి భూ యజమానికి ఆధార్ తరహాలో ప్రత్యేకమైన “భూదార్ నంబర్” కేటాయించనున్నట్లు ప్రకటించారు.

ప్రతిపక్షాల తప్పుడు ప్రచారాన్ని నమ్మొద్దు.. నిరంతరాయంగా ఇందిరమ్మ ఇళ్లు

ప్రభుత్వం అత్యంత ప్రతిష్టాత్మకంగా చేపడుతున్న భూ సర్వేపై ప్రజల నుంచి విశేష స్పందన వస్తోందని, తమ గ్రామాల్లో కూడా తక్షణమే సర్వే నిర్వహించాలంటూ వివిధ ప్రాంతాల నుంచి డిమాండ్లు వస్తున్నాయని మంత్రి పేర్కొన్నారు. ఇదే సమయంలో ప్రభుత్వం చేపడుతున్న రెవెన్యూ సంస్కరణలు, సంక్షేమ కార్యక్రమాలపై ప్రతిపక్షాలు చేస్తున్న తప్పుడు ప్రచారాలను ప్రజలు ఎట్టి పరిస్థితుల్లోనూ నమ్మవద్దని విజ్ఞప్తి చేశారు. పేదల సొంతింటి కలను నెరవేర్చడానికి ప్రభుత్వం కట్టుబడి ఉందని, అర్హులైన ప్రతి ఒక్కరికీ విడతల వారీగా ఇందిరమ్మ ఇళ్ల మంజూరు ప్రక్రియ నిరంతరాయంగా కొనసాగుతుందని మంత్రి పొంగులేటి శ్రీనివాస్ రెడ్డి స్పష్టం చేశారు.