Crane Accident : హైదరాబాద్ నగర శివార్లలోని శంకర్ పల్లి పరిధిలో ఉన్న ఎన్సీసీ (NCC) కన్స్ట్రక్షన్ కంపెనీలో సోమవారం సాయంత్రం ఒక విషాదకర సంఘటన చోటుచేసుకుంది. నిర్మాణ రంగ పనుల్లో భాగంగా వినియోగిస్తున్న ఒక భారీ క్రేన్ ఒక్కసారిగా కుప్పకూలి కార్మికులపై పడటంతో ఈ ప్రమాదం సంభవించింది. ఈ ఘోర ఘటనలో ముగ్గురు కార్మికులు అక్కడికక్కడే ప్రాణాలు కోల్పోగా, సుమారు పది మందికి పైగా కార్మికులు తీవ్రంగా గాయపడ్డారు. నగరంలో ఒక్కసారిగా మారిన వాతావరణం, ఈదురు గాలులతో కూడిన భారీ వర్షమే ఈ ప్రమాదానికి ప్రధాన కారణమని ప్రాథమిక సమాచారం ద్వారా తెలుస్తోంది. గాలివాన తీవ్రతకు నిర్మాణ స్థలంలో ఉన్న క్రేన్ తన పట్టు కోల్పోయి పక్కకు ఒరిగిపోయింది. ఆ సమయంలో అక్కడ పనిలో నిమగ్నమై ఉన్న కార్మికులు క్రేన్ కింద చిక్కుకుపోయారు. వర్షం కారణంగా రెస్క్యూ ఆపరేషన్ నిర్వహించడం కూడా తొలత కొంత కష్టంగా మారింది.
ప్రమాదం జరిగిన వెంటనే సమాచారం అందుకున్న రెస్క్యూ బృందాలు , పోలీసులు ఘటనా స్థలానికి చేరుకుని సహాయక చర్యలు చేపట్టారు. గాయపడిన వారిని వెంటనే అంబులెన్స్ల ద్వారా చికిత్స నిమిత్తం ఆసుపత్రికి తరలించారు. గాయపడిన వారిలో కొందరి పరిస్థితి అత్యంత విషమంగా ఉండటంతో మృతుల సంఖ్య ఇంకా పెరిగే అవకాశం ఉందని అధికారులు ఆందోళన వ్యక్తం చేస్తున్నారు. క్రేన్ కింద ఇంకా ఎవరైనా చిక్కుకున్నారా అనే కోణంలో శిథిలాలను తొలగించే ప్రక్రియ కొనసాగుతోంది. ఈ ప్రమాదంలో మరణించిన వారు ఇతర ప్రాంతాల నుంచి పనుల కోసం వచ్చిన వలస కార్మికులుగా తెలుస్తోంది. ఒక్కసారిగా జరిగిన ఈ అవాంఛనీయ ఘటనతో ఎన్సీసీ కన్స్ట్రక్షన్ ప్రాంగణంలో విషాద ఛాయలు అలుముకున్నాయి. పోలీసులు కేసు నమోదు చేసి, వాతావరణ పరిస్థితులతో పాటు క్రేన్ నిర్వహణలో ఏవైనా లోపాలు ఉన్నాయా అనే కోణంలో దర్యాప్తు చేస్తున్నారు.