RCB అభిమానులకు నథింగ్ సర్‌ప్రైజ్.. జూలై 7న Nothing Phone (4b) RCB Edition విడుదల

Nothing Phone (4b) RCB Edition: స్మార్ట్‌ఫోన్ తయారీ సంస్థ నథింగ్ (Nothing) క్రికెట్ ఫ్రాంచైజీ రాయల్ చాలెంజర్స్ బెంగళూరు (RCB)తో భాగస్వామ్యంగా రూపొందించిన ప్రత్యేక ఎడిషన్ స్మార్ట్‌ఫోన్ Nothing Phone (4b) RCB ఎడిషన్ డిజైన్‌ను అధికారికంగా ఆవిష్కరించింది. ఇప్పటికే పలు టీజర్ల ద్వారా ఆసక్తిని పెంచిన సంస్థ.. ఇప్పుడు ఈ లిమిటెడ్ ఎడిషన్ ఫోన్ రూపురేఖలను విదుదల చేసింది.

RCB విజయాలకు గుర్తుగా:

ఈ ప్రత్యేక స్మార్ట్‌ఫోన్‌ను RCBతో నథింగ్ సంస్థకు ఉన్న రెండేళ్ల భాగస్వామ్యాన్ని పురస్కరించుకుని రూపొందించారు. 2025 టీ20 సీజన్‌లో అసోసియేట్ స్పాన్సర్‌గా వ్యవహరించిన నథింగ్, 2026 సీజన్‌లో టైటిల్ స్పాన్సర్‌గా మారింది. ఈ భాగస్వామ్య కాలంలో RCB వరుసగా రెండు సీజన్లలో ఛాంపియన్‌షిప్ విజయాలు సాధించడంతో.. ఆ విజయాలను స్మరించుకునేలా ఈ ప్రత్యేక ఎడిషన్‌ను తీసుకువచ్చారు.

జూలై 7న మాత్రమే అమ్మకాలు:

Nothing Phone (4b) RCB ఎడిషన్ జూలై 7, 2026న మాత్రమే విక్రయానికి అందుబాటులో ఉంటుంది. బెంగళూరులోని నథింగ్ స్టోర్‌లో సాయంత్రం 4 గంటల నుంచి ఫస్ట్ కమ్–ఫస్ట్ సర్వ్ విధానంలో ఈ ఫోన్‌ను విక్రయించనున్నారు. పరిమిత సంఖ్యలో మాత్రమే అందుబాటులో ఉండటంతో RCB అభిమానులలో భారీ ఆసక్తి నెలకొంది. ఈ ప్రత్యేక ఎడిషన్ ఫోన్‌కు సంబంధించిన తాజా సమాచారం, లాంచ్ నోటిఫికేషన్లు పొందాలనుకునే వినియోగదారుల కోసం నథింగ్ తన అధికారిక వెబ్‌సైట్‌లో ప్రత్యేక రిజిస్ట్రేషన్ పేజీని ప్రారంభించింది. ఆసక్తి ఉన్నవారు ముందుగానే నమోదు చేసుకుని అప్డేట్స్ పొందవచ్చు.

View this post on Instagram

A post shared by Nothing India (@nothingindia)

ఈ సందర్భంగా నథింగ్ సహ వ్యవస్థాపకుడు, ఇండియా ప్రెసిడెంట్ అకిస్ ఎవాంజెలిడిస్ మాట్లాడుతూ.. “సాంకేతికత కేవలం ఉత్పత్తులను మాత్రమే కాకుండా ఒక ప్రత్యేక సంస్కృతిని కూడా సృష్టించాలని మాకు ఉంది. RCBతో మా భాగస్వామ్యం సంప్రదాయాలను సవాలు చేసే రెండు కమ్యూనిటీలను ఒక వేదికపైకి తీసుకొచ్చింది. RCB చారిత్రాత్మక ఛాంపియన్‌షిప్ విజయాన్ని, మా సంయుక్త ప్రయాణాన్ని గుర్తు చేసుకునే ప్రయత్నమే Phone (4b) RCB ఎడిషన్ అని తెలిపారు.