రూ.9,999కే Lava Smart 4 Plus లాంచ్.. 6.75 అంగుళాల డిస్‌ప్లే, 5000mAh బ్యాటరీతో అదిరిపోయే ఫీచర్లు.!

Lava Smart 4 Plus Launched: లావా నుండి ‘స్మార్ట్’ సిరీస్‌లో భాగంగా కొత్త బడ్జెట్ 4G స్మార్ట్‌ఫోన్ Lava Smart 4 Plusను లాంచ్ చేసింది. ఈ మధ్యనే Bold N2 స్మార్ట్‌ఫోన్‌ను మార్కెట్లోకి తీసుకొచ్చిన కంపెనీ.. ఇప్పుడు తక్కువ ధరలో ఆకట్టుకునే ఫీచర్లతో ఈ కొత్త ఫోన్‌ను తీసుకొచ్చింది.

ఈ స్మార్ట్‌ఫోన్‌లో 6.75 అంగుళాల HD+ LCD డిస్‌ప్లేను అందించారు. 90Hz రిఫ్రెష్ రేట్‌తో వచ్చే ఈ స్క్రీన్ స్మూత్ స్క్రోలింగ్, మంచి విజువల్ అనుభూతిని అందిస్తుంది. పెద్ద డిస్‌ప్లే కారణంగా వీడియోలు, సోషల్ మీడియా బ్రౌజింగ్ అండ్ గేమింగ్ మరింత సౌకర్యవంతంగా ఉంటుంది. ఇంకా ఇందులో ఆక్టా-కోర్ UNISOC 9863A ప్రాసెసర్‌ను అమర్చారు. ఇది 4GB RAMతో పాటు అదనంగా 4GB వర్చువల్ RAM పెంచుకొనే ఫీచర్‌ను అందిస్తుంది. దీంతో మొత్తం 8GB వరకు ర్యామ్ అనుభవాన్ని పొందవచ్చు. ఫోన్‌లో 64GB ఇంటర్నల్ స్టోరేజ్ లభిస్తుంది. మైక్రో ఎస్‌డీ కార్డ్ ద్వారా స్టోరేజ్‌ను 512GB వరకు పెంచుకొనే అవకాశం ఉంది. ఈ స్మార్ట్‌ఫోన్ కొత్త ఆండ్రాయిడ్ 15 గో ఎడిషన్ ఆపరేటింగ్ సిస్టమ్‌పై పనిచేస్తుంది.

ఫోటోగ్రఫీ కోసం లావా స్మార్ట్ 4 ప్లస్ లో 13MP ప్రధాన కెమెరాతో పాటు సెకండరీ AI కెమెరాను అందించారు. HDR, పోర్ట్రెయిట్, నైట్ మోడ్ వంటి ఫీచర్లు ఇందులో ఉన్నాయి. సెల్ఫీలు, వీడియో కాల్స్ కోసం ముందుభాగంలో 5MP కెమెరా అందుబాటులో ఉంది. ఈ స్మార్ట్‌ఫోన్‌లో 5000mAh సామర్థ్యంతో ఉన్న బ్యాటరీని అందించారు. ఇది 10W ఛార్జింగ్‌కు మద్దతు ఇస్తుంది. USB టైపు-C పోర్ట్ ద్వారా ఛార్జింగ్ సౌకర్యం ఉంటుంది. వీటితోపాటు సైడ్-మౌంటెడ్ ఫింగర్‌ప్రింట్ సెన్సార్, 3.5mm ఆడియో జాక్, FM రేడియో, స్పీకర్ వంటి ఫీచర్లు కూడా ఉన్నాయి.

ఈ స్మార్ట్‌ఫోన్ నీలగిరి బ్లూ, హిమాలయన్ సిల్వర్ రంగుల్లో అందుబాటులోకి వచ్చింది. దీని ధర రూ.9,999గా నిర్ణయించారు. ఫోన్‌పై 1 సంవత్సరం వారంటీతో పాటు ఉచిత హోమ్ సర్వీస్ సౌకర్యాన్ని కూడా కంపెనీ అందిస్తోంది. దేశవ్యాప్తంగా ఆఫ్‌లైన్ రిటైల్ స్టోర్లలో, ఫైనాన్షియల్ స్కీమ్స్ ద్వారా ఈ స్మార్ట్‌ఫోన్ కొనుగోలు చేయవచ్చు.