iPhone 17 Demand: సీన్ రివర్స్.. ఐఫోన్ 17 సిరీస్‌కు ఊహించని డిమాండ్.. అసలు కారణం ఏంటో తెలుసా?

Here Is Why iPhone 17 Out Of Stock: సాధారణంగా ‘యాపిల్’ కొత్త ఐఫోన్ సిరీస్‌ మార్కెట్లోకి వచ్చినపుడు.. పాత మోడళ్ల ధరలు తగ్గడం ఆనవాయితీ. ధరలు తగ్గడంతో యాపిల్ లవర్స్ పాత మోడళ్ల కొనుగోలుకు ఎక్కువగా ఆసక్తి చూపుతుంటారు. అయితే ఈసారి పరిస్థితి పూర్తిగా భిన్నంగా మారింది. 18 సిరీస్ విడుదలకు ఇంకా కొన్ని వారాల సమయం ఉండగానే.. ప్రస్తుతం మార్కెట్లో ఉన్న ‘ఐఫోన్ 17’ సిరీస్ మోడళ్లకు ఊహించని స్థాయిలో డిమాండ్ పెరిగింది. దీంతో ప్రముఖ ఈ-కామర్స్ ప్లాట్‌ఫారమ్‌లు అమెజాన్, ఫ్లిప్‌కార్ట్‌తో పాటు అనేక ఆఫ్‌లైన్ రిటైల్ స్టోర్లలో కూడా ఐఫోన్ 17 మోడళ్లు ‘ఔట్ ఆఫ్ స్టాక్’గా మారాయి.

ఐఫోన్ 17 సిరీస్ అనూహ్య డిమాండ్ వెనుక ప్రధాన కారణంగా యాపిల్ సీఈఓ టిమ్ కుక్ చేసిన తాజా వ్యాఖ్యలే అని టెక్ నిపుణులు అంటున్నారు. అంతర్జాతీయ మార్కెట్లో మెమొరీ చిప్‌ల ధరలు భారీగా పెరగడంతో యాపిల్ ఉత్పత్తుల తయారీ వ్యయం గణనీయంగా పెరిగిందని టిమ్ కుక్ ఇటీవల వెల్లడించారు. భవిష్యత్తులో కంపెనీ లాభదాయకంగా కొనసాగాలంటే కొన్ని ఉత్పత్తుల ధరలను పెంచక తప్పదని సంకేతాలు ఇచ్చారు. సీఈఓ ప్రకటన అనంతరం ఐప్యాడ్‌లు, మ్యాక్‌బుక్‌లు, మ్యాక్ కంప్యూటర్ల ధరలను యాపిల్ పెంచింది. అయితే ప్రస్తుతం ఐఫోన్‌ల ధరల్లో ఎలాంటి మార్పు చేయలేదు. దీంతో తదుపరి ధరల పెంపు ఐఫోన్‌లకే వర్తించే అవకాశం ఉందని టెక్ ప్రియులు అంచనా వేస్తున్నారు. ముఖ్యంగా ఐఫోన్ 17 సిరీస్ ధరలు త్వరలోనే పెరగవచ్చనే ప్రచారం వినియోగదారులను ముందుగానే కొనుగోలు చేసేలా ప్రేరేపిస్తోంది.

ధరలు పెరిగిన తర్వాత కొనుగోలు చేయడం కంటే ప్రస్తుతం ఉన్న ధరలకే ఐఫోన్ 17ను కొనడం మంచిదని కొనుగోలుదారులు భావిస్తున్నారు. అందుకే భారీ సంఖ్యలో ఆర్డర్లు పెడుతున్నారు. దీంతో ప్రముఖ ఈ-కామర్స్ ప్లాట్‌ఫారమ్‌లతో పాటు దేశవ్యాప్తంగా అనేక యాపిల్ రిటైల్ స్టోర్లలో కూడా ఐఫోన్ 17 స్టాక్ క్షణాల్లో అమ్ముడవుతోంది. ప్రస్తుతం చాలా చోట్ల స్టాక్ అందుబాటులో లేకపోవడంతో కొనుగోలుదారులు ఎదురుచూస్తున్నారు.

కొత్త మోడల్ మార్కెట్లోకి రాకముందే పాత మోడల్‌కు ఈ స్థాయిలో డిమాండ్ ఏర్పడటం యాపిల్ బ్రాండ్ ప్రత్యేకతకు నిదర్శనంగా టెక్ వర్గాలు అభిప్రాయపడుతున్నాయి. ఒకవేళ మీరు కూడా ఐఫోన్ 17 కొనుగోలు చేయాలని భావిస్తుంటే.. అమెజాన్, ఫ్లిప్‌కార్ట్ వంటి ఈ-కామర్స్ వెబ్‌సైట్లు లేదా సమీపంలోని యాపిల్ స్టోర్లలో స్టాక్ అందుబాటును ఎప్పటికప్పుడు పరిశీలించడం మంచిది. ఎందుకంటే కొత్త స్టాక్ అందుబాటులోకి వచ్చిన వెంటనే కొనుగోలు చేసే అవకాశం ఉంటుంది.