ఇక రిమోట్‌తో పనిలేదు.. వాయిస్‌తోనే ఫుల్ కంట్రోల్..! Siri AI, A19 చిప్‌తో కొత్త Apple TV 4K లాంచ్..

Apple TV 4K: యాపిల్ తన నెక్స్ట్ జనరేషన్ Apple TV 4K (2026) స్ట్రీమింగ్ డివైజ్‌ను ప్రకటించింది. మరింత శక్తివంతమైన A19 చిప్, కొత్త Siri AI, హ్యాండ్స్ ఫ్రీ వాయిస్ కంట్రోల్స్, మెరుగైన స్మార్ట్ హోమ్ ఫీచర్లతో దీన్ని తీసుకొచ్చింది. హోమ్ థియేటర్ అనుభూతిని మరింత మెరుగుపరిచేందుకు నాలుగు స్పీకర్ల సరౌండ్ సౌండ్ సపోర్ట్‌ను కూడా అందించింది.

రిమోట్ అవసరం లేకుండానే

కొత్త Apple TV 4Kలో Apple Intelligence ఆధారంగా రూపొందించిన Siri AI ప్రధాన ఆకర్షణగా నిలుస్తోంది. ఇందులో ఫుల్ స్క్రీన్ డిస్కవరీ మోడ్‌తో పాటు వీడియో చూస్తున్న సమయంలోనే నటీనటుల వివరాలు, ఏజ్ రేటింగ్స్, ఇతర సమాచారాన్ని తెలుసుకునేందుకు ప్రత్యేక ఓవర్‌లే ఇంటర్‌ఫేస్ అందించారు. Apple Intelligence సపోర్ట్ చేసే ఐఫోన్‌తో కనెక్ట్ చేసినప్పుడు వ్యక్తిగత కమ్యూనికేషన్లలో వచ్చిన కంటెంట్ సిఫార్సులను గుర్తించడంలో కూడా Siri సహాయపడుతుంది. ఈ స్ట్రీమింగ్ బాక్స్‌లో ఎకో క్యాన్సిలేషన్ టెక్నాలజీతో మూడు ఫార్-ఫీల్డ్ మైక్రోఫోన్లను అమర్చారు. దీంతో రిమోట్ చేతిలో లేకపోయినా “Siri” లేదా “Hey Siri” అని పిలిచి వాయిస్ కమాండ్స్ ఇవ్వవచ్చు. టీవీలో వీడియో ప్లే అవుతున్న సమయంలోనూ ఈ ఫీచర్ పనిచేసేలా రూపొందించారు.

A19 చిప్‌

కొత్త Apple TV 4Kకు A19 ప్రాసెసర్ శక్తినిస్తుంది. గత మోడల్‌తో పోలిస్తే CPU పనితీరు గరిష్ఠంగా 50% వేగంగా, GPU పనితీరు రెండింతలు మెరుగ్గా ఉంటుందని యాపిల్ పేర్కొంది. తక్కువ బిట్‌రేట్‌లోనూ సమర్థవంతమైన వీడియో స్ట్రీమింగ్ కోసం AV1 వీడియో కోడెక్‌కు ప్రత్యేక హార్డ్‌వేర్ డీకోడర్‌ను చిప్‌లో అందించారు. Apple TV 4Kతో వచ్చే Siri Remote డిజైన్‌లో పెద్దగా మార్పులు చేయలేదు. అయితే కొత్తగా Find My, Precision Finding సపోర్ట్‌ను జోడించారు. రిమోట్ ఎక్కడైనా కనిపించకుండా పోతే డైరెక్షనల్ ట్రాకింగ్, సౌండ్ అలర్ట్స్ సహాయంతో దాన్ని సులభంగా గుర్తించవచ్చు.

నాలుగు స్పీకర్స్

హోమ్ థియేటర్ ప్రియుల కోసం కొత్త Apple TV 4Kలో నాలుగు స్పీకర్ల సరౌండ్ సౌండ్ సెటప్‌కు సపోర్ట్ అందించారు. నాలుగు HomePod mini 2 స్పీకర్లు లేదా నాలుగు రెండో తరం HomePod స్పీకర్లను ఫ్రంట్, రియర్ పెయిర్స్‌గా ఏర్పాటు చేసుకోవచ్చు. గది నిర్మాణం, స్పీకర్ల పొజిషన్ ఆధారంగా ఆడియో డిలే, సౌండ్ లెవల్స్‌ను సిస్టమ్ ఆటోమేటిక్‌గా కాలిబ్రేట్ చేస్తుంది. కొత్త Apple TV 4Kను HomeKit, Matter కంపాటిబుల్ స్మార్ట్ హోమ్ హబ్‌గా కూడా ఉపయోగించుకోవచ్చు. Wi-Fiతో పాటు Thread కనెక్టివిటీని అందించారు. HomeKit Secure Video ఫీడ్స్ నుంచి వచ్చే నోటిఫికేషన్లు, వివరణలను Apple Intelligence సంక్షిప్తంగా అందించగలదు.

Fitness+ నుంచి FaceTime వరకు..

ఈ డివైజ్ Apple Fitness+, Apple Arcade వంటి యాపిల్ సేవలకు సపోర్ట్ చేస్తుంది. Continuity Camera ద్వారా FaceTime ఉపయోగించుకోవచ్చు. అలాగే iCloudలోని ఫొటోలతో కస్టమ్ స్క్రీన్ సేవర్లను ఏర్పాటు చేసుకునే అవకాశం ఉంది. ప్రైవసీ, సెక్యూరిటీ విషయంలోనూ యాపిల్ ప్రత్యేక జాగ్రత్తలు తీసుకుంది. మైక్రోఫోన్ డేటాను A19 చిప్‌లోని హార్డ్‌వేర్ స్థాయి Secure Exclaves ద్వారా ప్రాసెస్ చేసేలా రూపొందించారు. క్లౌడ్ సహాయం అవసరమైన Siri AI రిక్వెస్టుల కోసం Private Cloud Compute వ్యవస్థను ఉపయోగిస్తుంది. HomeKit వీడియో మాత్రం ఎండ్-టు-ఎండ్ ఎన్‌క్రిప్షన్‌తో రక్షణ పొందుతుంది.

ధర

కొత్త Apple TV 4K (2026) ప్రీ-ఆర్డర్లు 30కి పైగా ప్రాంతాల్లో ప్రారంభమయ్యాయి. నవంబర్ 13 నుంచి సాధారణ విక్రయాలు ప్రారంభం కానున్నాయి. భారత మార్కెట్లో Apple TV 4K ధరను రూ.39,900గా నిర్ణయించారు. A19 చిప్, Siri AI, హ్యాండ్స్-ఫ్రీ వాయిస్ కంట్రోల్, నాలుగు స్పీకర్ల సరౌండ్ సౌండ్, అధునాతన స్మార్ట్ హోమ్ ఫీచర్లతో ఈసారి Apple TV 4Kకు భారీ అప్‌గ్రేడ్ లభించింది.

Here is the launch video for the new Apple TV 4K (4th generation) https://t.co/hyaK44atdM

— Aaron (@aaronp613) October 13, 2026