T20 World Cup 2024: సూపర్‌ 8కు అఫ్గానిస్థాన్‌.. న్యూజిలాండ్‌ ఎలిమినేట్!

Afghanistan Enters T20 World Cup 2024 Super 8: టీ20 ప్రపంచకప్‌ 2024లో అఫ్గానిస్థాన్‌ సంచలనం సృష్టించింది. శుక్రవారం పాపువా న్యూగినీతో జరిగిన మ్యాచ్‌లో 7 వికెట్ల తేడాతో విజయం సాధించి.. సూపర్‌ 8కు దూసుకెళ్లింది. గ్రూప్-సీలో ఉన్న అఫ్గాన్.. ఆడిన మూడింట్లో గెలిచి టేబుల్ టాపర్‌గా నిలిచింది. మూడు మ్యాచ్‌లలో గెలిచిన వెస్టిండీస్ కూడా ఇప్పటికే సూపర్‌ 8కు దూసుకెళ్లింది. దాంతో గ్రూప్-సీలో ఉన్న న్యూజిలాండ్‌ అధికారికంగా ఎలిమినేట్ అయింది.

టీ20 ప్రపంచకప్ 2024 గ్రూప్-సీలో వెస్టిండీస్‌, అఫ్గానిస్థాన్‌, ఉగాండా, పపువా న్యూగినియా, న్యూజిలాండ్‌ ఉన్నాయి. మూడింట మూడు మ్యాచ్‌లు గెలిచిన వెస్టిండీస్‌, అఫ్గానిస్థాన్‌ సూపర్‌ 8కు దూసుకెళ్లాయి. ఆడిన రెండు మ్యాచ్‌లలో ఓడిన న్యూజిలాండ్‌.. టోర్నీ నుంచి నిష్క్రమించింది. మిగిలిన రెండు మ్యాచ్‌లలో కివీస్ గెలిచినా పెద్దగా ఉపయోగం ఉండదు. ఉగాండా ఒక మ్యాచ్ గెలవగా.. పపువా న్యూగినియా ఖాతా తెరవలేదు.

Also Read: Today Gold Price: మగువలకు శుభవార్త.. భారీగా తగ్గిన బంగారం ధరలు!

ఈ మ్యాచ్‌లో ముందుగా బ్యాటింగ్ చేసిన పపువా న్యూగినియా 19.5 ఓవర్లలో 95 పరుగులకు ఆలౌట్ అయింది. కిప్లిన్ (27; 32 బంతుల్లో 2 ఫోర్లు) టాప్ స్కోరర్. అఫ్గానిస్థాన్‌ పేసర్ ఫజల్లా ఫరూకీ (3/16) మూడు వికెట్లతో సత్తాచాటాడు. స్వల్ప ఛేదనను అఫ్గాన్‌ టీమ్‌ 15.1 ఓవర్లలోనే ఛేదించింది. గుల్బదీన్‌ నైబ్‌ 49 పరుగులతో నాటౌట్‌గా నిలిచాడు. మహ్మద్ నబీ (16 నాటౌట్), అజ్మతుల్లా (13; 18 బంతుల్లో, 1 ఫోర్) రాణించారు.