T20 World Cup 2026: షెపర్డ్‌ హ్యాట్రిక్‌ సహా 5 వికెట్లు.. స్కాట్లాండ్‌పై విండీస్ విజయం!

టీ20 ప్రపంచకప్‌ 2026లో వెస్టిండీస్‌ బోణీ కొట్టింది. కోల్‌కతాలో స్కాట్లాండ్‌తో జరిగిన మ్యాచ్‌లో 35 పరుగుల తేడాతో విజయం సాధించింది. 183 పరుగుల లక్ష్య ఛేదనలో 18.5 ఓవర్లలో స్కాట్లాండ్‌ 147 పరుగులకు ఆలౌట్ అయింది. బెర్రింగ్‌టన్‌ (42; 24 బంతుల్లో 3 ఫోర్లు, 2 సిక్సులు), టామ్ బ్రూస్‌ (35; 28 బంతుల్లో 1 ఫోర్, 2 సిక్సులు) ఫర్వాలేదనిపించారు. స్కాట్లాండ్‌ మిగతా బ్యాటర్లు పూర్తిగా విఫలమయ్యారు. వెస్టిండీస్‌ బౌలర్లలో రోమారియో షెపర్డ్‌ హ్యాట్రిక్‌ సహా 5 వికెట్లు పడగొట్టాడు. జాసన్ హోల్డర్‌ 2 వికెట్లు పడగొట్టాడు. ఈ విజయంతో విండీస్ ఖాతాలో రెండు పాయింట్స్ చేరాయి.

Also Read: IND vs USA: టీమిండియాదే బ్యాటింగ్.. ముగ్గురు స్టార్స్ అవుట్, డీఎస్పీ ఇన్!

ఈ మ్యాచ్‌లో ముందుగా బ్యాటింగ్ చేసిన వెస్టిండీస్‌ నిర్ణీత 20 ఓవర్లలో 5 వికెట్ల నష్టానికి 182 పరుగులు చేసింది. షిమ్రాన్ హెట్‌మయెర్‌ హాఫ్ సెంచరీ బాదాడు. 36 బంతుల్లో 2 ఫోర్లు, 6 సిక్సులతో 64 రన్స్ చేశాడు. ఓపెనర్ బ్రాండన్‌ కింగ్‌ (35), షెర్ఫేన్ రూథర్‌ఫోర్డ్‌ (26), రోవ్‌మన్ పావెల్‌ (24), షై హోప్‌ (19) పరుగులు చేశారు. స్కాట్లాండ్‌ బౌలర్లలో బ్రాడ్‌ 2 వికెట్లు తీశారు. షరీఫ్‌, డేవిడ్సన్‌, లీస్క్‌ తలో వికెట్‌ పడగొట్టారు. విండీస్ విజయంలో కీలక పాత్ర పోషించిన హెట్‌మయెర్‌కు మ్యాన్ ఆఫ్ ది మ్యాచ్ అవార్డు దక్కింది.