Sir Garfield Sobers: ప్రముఖ క్రికెట్ దిగ్గజం కన్నుమూత.. బర్త్‌డేకు ముందు గార్‌ఫీల్డ్ సోబర్స్ మృతి
- ప్రముఖ క్రికెట్ దిగ్గజం కన్నుమూత
- బర్త్‌డేకు ముందు గార్‌ఫీల్డ్ సోబర్స్ మృతి
- క్రికెట్ ప్రపంచం దిగ్భ్రాంతి
- Follow Us :
-
-
Add as a preferred
source on google
క్రికెట్ చరిత్రలో అత్యుత్తమ ఆల్‌రౌండర్‌గా గుర్తింపు పొందిన వెస్టిండీస్ దిగ్గజం సర్ గార్‌ఫీల్డ్ సోబర్స్(89) కన్నుమూశారు. మరో 10 రోజుల్లో 90వ సంవత్సరంలోకి అడుగు పెట్టబోతున్న తరుణంలో తుదిశ్వాస విడిచారు. ఈ విషయాన్ని క్రికెట్ వెస్టిండీస్ (CWI) అధికారికంగా ప్రకటించింది. సోబర్స్ మరణంతో ప్రపంచ క్రికెట్ ఒక యుగాన్ని కోల్పోయిందని క్రీడా ప్రముఖులు, మాజీ క్రికెటర్లు నివాళులర్పిస్తున్నారు.
1936 జూలై 28న బార్బడోస్‌లో జన్మించిన సోబర్స్.. బ్యాటింగ్, బౌలింగ్, ఫీల్డింగ్ మూడు విభాగాల్లోనూ అసాధారణ ప్రతిభ కనబరిచి ప్రపంచ క్రికెట్‌లో తనకంటూ ప్రత్యేక స్థానం సంపాదించుకున్నారు. ఎడమచేతి వాటం బ్యాటర్‌గా రాణించిన ఆయన.. ఎడమచేతి ఫాస్ట్-మీడియం, స్పిన్ బౌలింగ్‌లోనూ సమానంగా మెప్పించారు. అద్భుతమైన ఫీల్డర్‌గా కూడా పేరు తెచ్చుకుని ‘సంపూర్ణ క్రికెటర్’గా గుర్తింపు పొందారు. కేవలం 17 ఏళ్ల వయస్సులోనే వెస్టిండీస్ తరఫున టెస్టు అరంగేట్రం చేసిన సోబర్స్.. మొత్తం 93 టెస్టులు ఆడి 57.78 సగటుతో 8,032 పరుగులు చేశారు. ఇందులో 26 సెంచరీలు ఉన్నాయి. బౌలింగ్‌లో 235 వికెట్లు పడగొట్టడంతో పాటు ఫీల్డింగ్‌లో 109 క్యాచ్‌లు అందుకున్నారు.
చరిత్రలో నిలిచిపోయిన రికార్డులు
1958లో పాకిస్థాన్‌పై అజేయంగా 365 పరుగులు చేసి అప్పటి వరకు టెస్టు క్రికెట్‌లో అత్యధిక వ్యక్తిగత స్కోరు నమోదు చేశారు. ఈ రికార్డు ఎన్నో సంవత్సరాల పాటు చెక్కుచెదరలేదు. అలాగే 1968లో ఫస్ట్‌క్లాస్ క్రికెట్‌లో ఒకే ఓవర్‌లో ఆరు సిక్సర్లు బాదిన తొలి క్రికెటర్‌గా చరిత్ర సృష్టించారు. ఈ ఘనత ఇప్పటికీ క్రికెట్‌లో అత్యంత అరుదైన, చిరస్మరణీయ విజయాల్లో ఒకటిగా నిలిచింది.
వెస్టిండీస్ జట్టుకు కెప్టెన్‌గా కూడా సేవలందించిన సోబర్స్.. కరీబియన్ ప్రాంతంతో పాటు ప్రపంచవ్యాప్తంగా ఎన్నో తరాల క్రికెటర్లకు స్ఫూర్తిగా నిలిచారు. మ్యాచ్‌ను బ్యాటింగ్, బౌలింగ్, ఫీల్డింగ్ ఏ విభాగంలోనైనా ఒంటిచేత్తో మలుపు తిప్పగల సామర్థ్యంతో ఆయన ప్రత్యేక గుర్తింపు పొందారు. క్రికెట్‌కు చేసిన విశిష్ట సేవలకు గాను బ్రిటిష్ ప్రభుత్వం ఆయనకు ‘సర్’ బిరుదు ప్రదానం చేసింది. అంతేకాకుండా విజ్డెన్ క్రికెటర్స్ ఆఫ్ ది సెంచరీ జాబితాలో స్థానం సంపాదించడంతో పాటు ఐసీసీ హాల్ ఆఫ్ ఫేమ్లోనూ చోటు దక్కించుకున్నారు.
సర్ గార్‌ఫీల్డ్ సోబర్స్ మరణంతో క్రికెట్ ప్రపంచం ఓ మహోన్నత వ్యక్తిత్వాన్ని కోల్పోయింది. ఆయన సృష్టించిన రికార్డులు, ఆటతీరు, క్రికెట్‌కు అందించిన సేవలు ఎప్పటికీ చిరస్మరణీయంగా నిలిచిపోనున్నాయి.